ໃນປັດຈຸບັນ ເຂື່ອນຜລິດໄຟຟ້າ ນໍ້າອູ 5 ຢູ່ແຂວງ ຜົ້ງສາລີ ກໍາລັງເລີ່ມ ການກໍ່ສ້າງ ຈື່ງໄດ້ໂຍກຍ້າຍ ປະຊາຊົນ ໃນເຂດໃກ້ຄຽງ ຈໍານວນນື່ງ ອອກຈາກ ບໍຣິເວນ ການກໍ່ສ້າງແລ້ວ. ເຈົ້າໜ້າທີ່ ກະຊວງ ພະລັງງານ ແລະບໍ່ແຮ່ ໄດ້ກ່າວວ່າ:
"ນໍ້າອູ 5 ດຽວນີ້ເຂົາເຈົ້າ ກໍາລັງກໍ່ສ້າງ ພວກປະຊາຊົນ ຫັ້ນ ເຂົາເຈົ້າເອົາ ປະຊາຊົນ ຫັ້ນຍ້າຍໄປໄວ້ ຊົ່ວຄາວກ່ອນ ເຂົາຈະຕັ້ງເຮືອນໃຫ້ ຖາວອນນະ ຊ່ວງນີ້ ຊົ່ວຄາວ ຢູ່ບ່ອນຂອບເຂດ ການກໍ່ສ້າງ".
ທ່ານແຈ້ງໃຫ້ຮູ້ ອີກວ່າ ຊາວບ້ານ ທີ່ຖືກຍ້າຍໄປນັ້ນ ແມ່ນໃຫ້ໄປຢູ່ບ້ານ ຄານນາກ ບ່ອນທີ່ທາງການໄດ້ ປຸກທີ່ຢູ່ ແບບຊົ່ວຄາວ ໃຫ້ກ່ອນ ແລະຂັ້ນຕໍ່ໄປ ກໍຈະປຸກເຮືອນ ແບບຖາວອນໃຫ້ຢູ່. ໂຄງການ ເຂື່ອນນໍ້າອູ 5 ຕັ້ງຢູ່ ເມືອງສັມພັນ ເປັນນື່ງໃນຈໍານວນ 3 ໂຄງການທໍາອິດ ທີ່ຈະສ້າງໃສ່ນໍ້າອູ ອັນມີໂຄງການ ນໍ້າອູ-5 ແລະ ນໍ້າອູ-6 ຢູ່ແຂວງ ຜົ້ງສາລີ ແລະ ນໍ້າອູ-2 ຈະຢູ່ແຂວງ ຫລວງພະບາງ. ທັງ 3 ເຂື່ອນ ຈະສາມາດຜລິດ ກະແສໄຟຟ້າໄດ້ 540 MW. ບໍຣິສັດ Syno-hydro ຈາກປະເທດຈີນ ເປັນຜູ້ໄດ້ຮັບ ສັມປະທານ.
ສໍາລັບເຂື່ອນນໍ້າອູ-6 ເຈົ້າໜ້າທີ່ບອກວ່າ ກໍາລັງສືກສາ ແລະ ອອກແບບຢູ່. ຂໍ້ມູນ ຂອງກົມພະລັງງານ ແຈ້ງວ່າ ຣັຖບານ ໄດ້ເຊັນສັນຍາ ໃຫ້ບໍຣິສັດ Syno-hydro ສືກສາ ຄວາມເປັນໄປໄດ້ ໃນໂຄງການ ສ້າງເຂື່ອນໃສ່ນໍ້າອູ ທັງໝົດ 7 ແຫ່ງ ຊື່ງຈະສາມາດ ຜລິດໄຟຟ້າໄດ້ 1,100 MW. ໄຟຟ້າທີ່ຜລິດໄດ້ ຈະຂາຍໃຫ້ ປະເທດໄທ ຫລືຈີນ ແລະ ຈະໃຊ້ ພາຍໃນປະເທດ.