ເຂື່ອນຈະທໍາລາຍປາ ແລະສີ່ງແວດລ້ອມ

ທ່ານ ຫງຽນວັນດ່ວນ ນັກຊ່ຽວຊານ ຂອງ ຄນະກັມມາທິການ ແມ່ນ້ຳຂອງ ຂອງວຽດນາມ ກ່າວວ່າ ການສ້າງເຂື່ອນ ທຸກແຫ່ງ ໃສ່ແມ່ນ້ຳຂອງ ໃນເຂດລຸ່ມ ແມ່ນ້ຳຂອງ ຈະສົ່ງຜົນ ກະທົບ ຂ້າມຊາດ ໄປສູ່ປະເທດໄທ ວຽດນາມ ແລະ ກຳພູຊາ. ການສ້າງເຂື່ອນ ອາດຈະຜລິດ ໄຟຟ້າ ໃຫ້ແກ່ປະເທດ ນຶ່ງ ແຕ່ສົ່ງຜົນ ກະທົບ ຕໍ່ທຸກໆປະເທດ ແລະ ແນ່ນອນວ່າ ການສ້າງເຂື່ອນ ໄຊຍະບຸຣີ ຊຶ່ງຈະເປັນ ເຂື່ອນແມ່ນ້ຳຂອງ ແຫ່ງທຳອິດ ໃນລາວ ກໍຈະທຳຣາຍ ປາ ແລະ ສິ່ງແວດລ້ອມ ໃນທຸກໆ ປະເທດ.

ທ່ານ ຫງຽນວັນດ່ວນ ກ່າວອີກວ່າ ການສຶກສາ ສຳຣວດ ຜົນກະທົບ ຈາກການສ້າງ ເຂື່ອນໄຟຟ້າ ໃສ່ແມ່ນ້ຳຂອງ ທີ່ຈະມີຕໍ່ ປະເທດອື່ນໆ ຈະເຮັດໄດ້ຍາກ ເກືອບວ່າ ຈະເປັນໄປບໍ່ໄດ້ ເພາະແຕ່ລະ ປະເທດ ກໍມີ ກົດໝາຍ ວ່າດ້ວຍການ ປົກປັກຮັກສາ ສິ່ງແວດລ້ອມ ແຕກຕ່າງກັນ. ຕົວຢ່າງ ການສ້າງເຂື່ອນ ທີ່ທຳຣາຍ ປາ ສິ່ງແວດລ້ອມ ແລະ ວິຖີຊີວິດ ຂອງ ປະຊາຊົນ ຫລາຍລ້ານຄົນ ອາດເປັນສິ່ງທີ່ ຜິດກົດໝາຍ ໃນປະເທດ ນຶ່ງ ແຕ່ຖືກຕ້ອງ ຕາມກົດໝາຍ ໃນປະເທດ ອື່ນໆ.

ທ່ານ ຫງຽນວັນດ່ວນ ກ່າວ ໃນຕອນທ້າຍວ່າ ການສໍາຣວດ ຜົນກະທົບ ຂ້າມຊາດ ບາງເທື່ອ ອາດຈະສ້າງ ຂໍ້ຂັດແຍ້ງຂື້ນ ຣະຫວ່າງ ປະເທດ ຕົວຢ່າງ ປັດຈຸບັນ ວຽດນາມ ແລະ ກຳພູຊາ ກໍບໍ່ພໍໃຈ ຕໍ່ການເຊັນ ສັນຍາ ຈະສ້າງເຂື່ອນ ໄຊຍະບຸຣີ ນັ້ນຢ່າງແຮງ. ບໍ່ພຽງແຕ່ ບໍ່ພໍໃຈ ເທົ່ານັ້ນ ສອງປະເທດນີ້ ຍັງຢາກໃຫ້ ຣັຖບານລາວ ຍຸຕິການກໍ່ສ້າງ ເຂື່ອນ ດັ່ງກ່າວ.

ສ່ວນ ນັກຊ່ຽວຊານ ອີກຜູ້ນຶ່ງ ຄື ທ່ານ Timo Koivurova ອາຈານສອນ ມະຫາວິທຍາໄລ ກ່ຽວກັບ ສິ່ງແວດລ້ອມ ແລະ ຊົນເຜົ່າສ່ວນນ້ອຍ ສເນີວ່າ ຢາກໃຫ້ປະເທດ ໃນເຂດລຸ່ມ ແມ່ນ້ຳຂອງ ລົງນາມ ໃນສົນທິ ສັນຍາ ວ່າດ້ວຍຜົນກະທົບ ຂ້າມຊາດ ຫລັງຈາກນັ້ນ ຈຶ່ງສຳຣວດ ຜົນກະທົບ ກ່ຽວກັບ ການສ້າງເຂື່ອນ ແມ່ນ້ຳຂອງ ໃໝ່.