ລາວໄດ້ຮັບເງິນຊ່ວຍເຫຼືອ ເກັບກູ້ຣະເບີດ

ສະຫະພາບ ຢູໂຣບ ໃຫ້ເງິນ ຊ່ວຍເຫລືອ ປະມານ 6 ແສນ ຢູໂຣ ຫລື ປະມານ 8 ແສນ 4 ໝື່ນ ດອນລ່າ ສະຫະຣັຖ. ສ່ວນ ຣັຖບານ ສະຫະຣັຖ ຊ່ວຍ 1 ແສນ ແລະ 4 ໝື່ນ ດອນລ່າ.
ເວບໄຊຕ໌ ຂອງ ສະຖານທູດ ສະຫະຣັຖ ປະຈຳລາວ ຣາຍງານວ່າ ພິທີເຊັນ ບົດບັນທຶກ ຄວາມເຂົ້າໃຈ ກັນກ່ຽວກັບ ການມອບ ການຊ່ວຍເຫລືອ ດັ່ງກ່າວ ໄດ້ຈັດຂື້ນ ຢູ່ສຳນັກງານ ສະຫະພັນ ແມ່ຍິງລາວ ທີ່ ນະຄອນຫລວງ ວຽງຈັນ ເມື່ອ ວັນທີ່ 8 ເດືອນ ກໍຣະດາ. ເຂົ້າຮ່ວມ ພິທີ ທາງ ຝ່າຍລາວ ກໍມີ ຜູ້ຕາງໜ້າ ກະຊວງ ສວັດດີການ ສັງຄົມ ກະຊວງການ ຕ່າງປະເທດ ແລະ ຜູ້ຕາງໜ້າ ແຂວງ ຄຳມ່ວນ. ຝ່າຍ ສະຫະຣັຖ ກໍມີ ຜູ້ຕາງໜ້າ ສະຖານທູດ ສະຫະຣັຖ ປະຈຳລາວ ແລະ ອຸປທູດ ຂອງ ສະຫະພາບ ຢູໂຣບ ປະຈຳລາວ.

ທ່ານ David Hayter ຜູ້ອຳນວຍການ ອົງການ ທີ່ປຶກສາ ດ້ານຣະເບີດ ປະຈຳລາວ ກ່າວວ່າ ເງິນ ຊ່ວຍເຫລືອ ຈຳນວນນີ້ ເປັນເງິນທຶນ ແລະ ເປັນການ ລົງທຶນ ທີ່ຫລາຍ ສົມຄວນ ທີ່ ສະຫະພາບ ຢູໂຣບ ແລະ ສະຫະຣັຖ ໄດ້ມອບໃຫ້ ແກ່ລາວ ຊຶ່ງມີ ຈຸດປະສົງ ບໍ່ພຽງແຕ່ ຈະເພື່ອ ເກັບກູ້ ຣະເບີດ ທີ່ຍັງ ບໍແຕກ ເທົ່ານັ້ນ ແຕ່ຍັງ ເພື່ອເຮັດໃຫ້ ການໃຊ້ເງິນ ຈຳນວນ ດັ່ງກ່າວ ມີຄຸນນະພາບ ແລະ ປະສິດທິພາບ ສູງຂື້ນ ນຳອີກ.

ທາງການລາວ ຈະໃຊ້ເງິນ ຈຳນວນນີ້ ເພື່ອ ເກັບກູ້ ຣະເບີດ ຢູ່ໃນເຂດ ເມືອງ ບົວລະພາ ມະຫາໄຊ ແລະ ໄຊບົວທອງ ໃນແຂວງ ຄຳມ່ວນ ຂອງລາວ.