5 ແຂວງພາກອີສານຕຣຽມ ໃສ່ເສຖກິຈອາຊ໊ຽນ

ໃນຈໍານວນ 5 ແຂວງ ທີ່ຈະເຂົ້າຮ່ວມ ງານສະແດງ ເທື່ອນີ້ ນອກຈາກ ແຂວງ ອຸດອນທານີ ແລ້ວ ກໍມີແຂວງເລີຍ ຂ.ໜອງຄາຍ ຂ.ບຶງການ ແລະ ຂ.ໜອງບົວລຳພູ. ງານສະແດງ ສິນຄ້າ ແລະ ສິລປະ ຈະເລິ້ມແຕ່ ວັນທີ່ 30 ເດືອນນີ້ ຈົນເຖິງວັນທີ່ 5 ເດືອນໜ້າ ສິນຄ້າທີ່ ຈະວາງສະແດງ ສ່ວນນຶ່ງແມ່ນ ສິນຄ້າໂອທ໊ອປ ຫລື ສິນຄ້າທ້ອງຖິ່ນ ຕ່າງໆຂອງໄທ ອີກສ່ວນນຶ່ງ ຈະແມ່ນສິນຄ້າ ຈາກສປປລາວ ວຽດນາມ ແລະ ມາເລເຊັຍ.

ເວັບໄຊຕ໌ໜັງສືພິມ ຜູ້ຈັດການ ຂອງໄທ ຣາຍງານວ່າ ຈຸດປະສົງ ຂອງການຈັດງານ ສະແດງຄັ້ງນີ້ ແມ່ນເພື່ອສົ່ງເສີມ ການຜລິດສິນຄ້າ ຂອງ ປະຊາຊົນ ໃນພາກອີສານ ແລະ ເພື່ອຂຍາຍ ການສົ່ງສິນຄ້າ ເຫລົ່ານີ້ອອກໄປສູ່ ປະເທດອື່ນໆ ໃນອາຊ່ຽນ. ສິນຄ້າທີ່ຈະຖືກ ວາງສະແດງມີ ຫລາຍປະເພດ ເຊັ່ນປະເພດ ອາຫານ ສຸດຍອດອີສານ ເສື້ອຜ້າ ແລະ ແຜ່ນແພ ທີ່ຜລິດໂດຍ ຊາວທ້ອງຖິ່ນ ແລະ ສິນຄ້າແປຮູບອື່ນໆ.

ເຈົ້າໜ້າທີ່ຂັ້ນສູງ ຂອງຫ້າແຂວງ ປະຊຸມ ປຶກສາຫາລຶກັນ ກ່ຽວກັບການ ຈັດງານ ດັ່ງກ່າວມື້ວານນີ້ ທີ່ໂຮງແຮມ ເຊັນທາຣາ ໃນກາງເມືອງ ອຸດອນ.