ໄທກວ້ານຈັບຄົນງານເຖື່ອນ

ທາງການ ແຂວງບູຣີຣັມ ຂອງໄທ ກວດກາ ຈັບຄົນງານ ຕ່າງດ້າວເຖື່ອນ ໄດ້ທັງໝົດ 38 ຄົນ.
ໂພໄຊສວັດ
2012.05.23
F-Illegal-workers ຄົນງານເຖື່ອນ ທີ່ທາງການ ແຂວງບູຣີຣັມ ໄດ້ຈັບຄວບຄຸມ ໂຕໄວ້ໄດ້ ທັງໝົດ38 ຄົນ ຊື່ງມີຄົນງານລາວ ຮວມຢູ່ນໍາ 3 ຄົນ
Web77

ເຈົ້າໜ້າທີ່ ຊຸດປາບປາມ ແຮງງານ ຕ່າງດ້າວ ແຂວງ ບູຣີຣັມ ປະເທດໄທ ໄດ້ອອກກວດກາ ຈັບຄວບຄຸມ ແຮງງານ ຕ່າງດ້າວ ທີ່ລັກເຂົ້າມາ ເຮັດວຽກ ຕາມໂຮງງານ ຮ້ານບໍຣິການ ຮ້ານອາຫານ ທີ່ບໍ່ມີໃບ ອະນຸຍາດ ໃຫ້ເຮັດການ 9 ບ່ອນ ແລະຈັບໄດ້ 38 ຄົນ ບາງບ່ອນ ລັກຄ້າ ປະເວນີ ເຈົ້າໜ້າທີ່ ຈຶ່ງຈັບເຈົ້າ ຂອງຮ້ານສົ່ງໄປ ດໍາເນີນຄະດີ ຕາມກົດໝາຍ.

ພາຍໃນເດືອນ ພຶສພາ 2012 ນີ້ ເຈົ້າໜ້າທີ່ ຊຸດປາບປາມ ແຮງງານຕ່າງດ້າວ ແຂວງບູຣີຣັມ ໄດ້ອອກ ປະຕິບັດງານ ກວດຄົ້ນ ຊອກຫາຄົນງານ ຕ່າງດ້າວ ຜິດກົດໝາຍ ໃນ 3 ເມືອງຊຶ່ງມີ ເມືອງບູຣີຣັມ ເມືອງ ພຸທໄທສົງ ແລະເມືອງນາງລອງ ຮວມທັງໝົດ 9 ແຫ່ງ.

ໃນການອອກ ກວດກາເທື່ອນີ້ ເຈົ້າໜ້າທີ່ ໄດ້ຈັບຄົນງານ ເຖື່ອນຈາກ 4 ສັນຊາດ ທັງຊາຍແລະຍິງ ຮວມທັງໝົດ 38 ຄົນ ເປັນຊາວພະມ່າ 21 ຄົນ ກໍາພູຊາ 11 ຄົນ ວຽດນາມ 3 ຄົນ ແລະຈາກລາວ 3 ຄົນ. ຫລັງຈາກນັ້ນ ເຈົ້າໜ້າທີ່ ກໍສົ່ງໃຫ້ ພະນັກງານ ສອບສວນ ເພື່ອດໍາເນີນຄະດີ ໃນຂໍ້ຫາ “ຄົນຕ່າງດ້າວ ເຂົ້າໄທໂດຍ ບໍ່ມີໃບ ອະນຸຍາດ ຫລື ໃບອະນຸຍາດ ໝົດອາຍຸ ຫລື ຖືກຖອດຖອນ” ຊຶ່ງຈະຖືກ ປັບໃໝ ປະມານ 2000 ຫາ 1 ແສນບາດ ຈໍາຄຸກ ບໍ່ເກີນ 5 ປີ ກ່ອນທີ່ຈະສົ່ງ ກັບຄືນ ພູມລໍາເນົາ.

ສ່ວນນາຍຈ້າງ ຈະຖືກ ດໍາເນີນຄະດີ ຂໍ້ຫາ “ຮັບຄົນຕ່າງດ້າວ ຜິດກົດໝາຍ ເຂົ້າເຮັດການ ໃນປະເທດ” ຕ້ອງຖືກປັບໃໝ ປະມານ 10 ພັນຫາ 1 ແສນບາດ ຕໍ່ຄົນງານ ຕ່າງດ້າວ 1 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.