ເສື້ອແດງຢາກໃຫ້ ທັກສິນກັບບ້ານ

ທ່ານ ຂວັນໄຊ ຜູ້ນຳ ຊົມຣົມ ຄົນຮັກອຸດອນ ກ່າວວ່າ ຊາວເສື້ອແດງ ຈາກ 20 ແຂວງ ໃນພາກອີສານ ຈະມາໂຮມ ຊຸມນຸມ ໃນຄ່ຳຄືນນີ້ ເພື່ອຕ້ານ ຢາເສພຕິດ ແລະ ສິ່ງທີ່ສຳຄັນ ກໍເພື່ອ ຮຽກຮ້ອງ ໃຫ້ອະດີດ ນາຍົກ ຣັຖມົນຕຣີ ທັກສິນ ຊິນນະວັດ ໃຫ້ກັບຄືນ ປະເທດໄທ ເພື່ອສ້າງຄວາມ ຖືກຕ້ອງ ປອງດອງຊາດ.

ທ່ານ ຂວັນໄຊ ຮັບ ປະກັນວ່າ ພວກເສື້ອແດງ ຈະຮັກສາ ຄວາມປອດໄພ ຂອງທ່ານ ທັກສິນ ຢ່າງເຕັມທີ່ ທ່ານ ທັກສິນ ຊິນນະວັດ ຈະເດີນທາງໄປ ນະຄອນຫລວງ ວຽງຈັນ ວັນທີ່ 11 ເດືອນ ເມສາ ນີ້ ເພື່ອສລອງ ບຸນປີໃໝ່ລາວ ແລະ ພົບປະກັບ ພວກເສື້ອແດງ ກຸ່ມສນັບສນູນ ທ່ານ ໃນວັນທີ່ 12 ພວກເສື້ອແດງ ຫລາຍພັນຄົນ ຈະເດີນທາງໄປ ນະຄອນຫລວງ ວຽງຈັນ. ໜັງສືພິມ The Nation ຂອງໄທ ຣາຍງານ ອີກວ່າ ພວກເສື້ອແດງ ຜູ້ນຶ່ງ ຕ້ອງໃຊ້ເງິນ ເຖິງ 7,000 ບາດ ຈຶ່ງຈະສາມາດ ເຂົ້າໃກ້ ທ່ານທັກສິນ ຊິນນະວັດ ຢູ່່ລາວໄດ້.

ເຖິງຢ່າງໃດ ກໍຕາມ ທ່ານ ທັກສິນ ອາດຈະມີຂໍ້ ຈຳກັດ ຫລາຍຢ່າງ ໃນການພົບປະ ກັບພວກ ເສື້ອແດງ ຢູ່ວຽງຈັນ ເຊັ່ນທ່ານ ອາດຈະບໍ່ໄດ້ ກ່າວຄຳປາໃສ ຕໍ່ພວກເສື້ອແດງ ແຕ່ໃນ ກຳພູຊາ ທ່ານ ທັກສິນ ອາຈຈະມີ ອິສຣະ ຫລາຍກວ່າ ໃນການພົບປະ ແລະ ສັງສັນ.

The Nation ຂຽນອີກວ່າ ທາງການໄທ ແລະ ຊາວໄທ ຫລາຍຄົນ ຈະໃຫ້ຄວາມ ສົນໃຈ ໃນການ ຢ້ຽມຢາມລາວ ແລະ ກຳພູຊາ ຂອງທ່ານ ທັກສິນ ຊິນນະວັດ ໃນຍາມ ສົງການ ປີນີ້ ເປັນພິເສດ ຫຼາຍຄົນ ຄິດວ່າ ມັນເປັນ ບາດກ້າວ ສໍາຄັນ ຂອງ ທ່ານ ທັກສິນ ເພື່ອສ້າງຄວາມ ຖືກຕ້ອງ ປອງດອງຊາດ ແຕ່ອີກຝ່າຍນຶ່ງ ຄິດຢ້ານວ່າ ທ່ານ ທັກສິນ ຍິ່ງຈະສ້າງ ຄວາມແຕກແຍກ ແຮງຂື້ນ ໃນສັງຄົມໄທ ເພາະວ່າ ທ່ານ ທັກສິນ ຍັງມີຄະດີ ຕິດໂຕ ແລະ ຫລົບໜີໂທດ ຢູ່.