ຜູ້ນໍາລາວຄວນປົດປ່ອຍ ນັກໂທດການເມືອງ

ໃນວາຣະ ກອງປະຊຸມ ສຸດຍອດ ເອເຊັຍ-ຢູໂຣບ ຫລື ອາເຊັມ ກຳລັງດຳເນີນຢູ່ ໃນຂະນະນີ້ ທີ່ນະຄອນຫລວງ ວຽງຈັນ ອົງການ ສິດທິມະນຸດ ຕ່າງໆ ໄດ້ອອກ ຖແລງການ ຮຽກຮ້ອງ ໃຫ້ຣັຖບານ ສປປລາວ ປ່ອຍນັກຮຽນ ນັກສຶກສາ ທີ່ພຍາຍາມ ປະທ້ວງ ແລະ ນັກໂທດການເມືອງ ທີ່ມີແນວຄິດ ທີ່ຂັດຕໍ່ ພັກແລະ ຣັຖບານລາວ.

ຕົວຢ່າງເມື່ອ ອາທິດທີ່ແລ້ວ ສະຫະພັນ ນານາຊາດ ເພື່ອສິດທິມະນຸດ ກໍຮຽກຮ້ອງ ໃຫ້ສປປລາວ ປ່ອຍຕົວ ນັກໂທດການເມືອງ. ທ່ານ  Shiwei Ye ຫົວໜ້າຫ້ອງການ ສະຫະພັນ ນານາຊາຕ ເພື່ອສິດທິມະນຸດ ທີ່ບາງກອກ ກ່າວກັບນັກຂ່າວ ເອເຊັຽເສຣີ ວ່າ:

“ພວກທ່ານ ມີບັນຫາ ເປັນຫ່ວງ ສໍາຄັນຫລາຍຢ່າງ ກ່ຽວກັບ ການລ່ວງຣະເມີດ ສິດທິມະນຸດ ຢູ່ສປປລາວ. ອັນທີ່ນື່ງກໍແມ່ນ ຄວາມສຸກທຸກ ຂອງ ນັກໂທດການເມືອງ ຈໍານວນທີ່ຖືກຈັບ ເມື່ອປີ 1999 ແລະ ປີ 2009. ພວກທ່ານ ມີຄວາມເປັນຫ່ວງ ວ່າຈໍານວນນື່ງ ອາດຫາຍສາບສູນ ໄປແລ້ວ. ອັນທີສອງ ພວກທ່ານ ມີຄວາມເປັນຫ່ວງ ນໍາການຣະເມີດ ສິດເສຣີພາບ ໃນການນັບຖື ສາສນາ ຍ້ອນວ່າ ໃນແຕ່ລະປີ ພວກທ່ານ ໄດ້ຮັບຣາຍງານວ່າ ທາງການລາວ ຈໍາກັດ ການນັບຖື ສາສນາ ຂອງບາງກຸ່ມ ໃນການດໍາເນີນ ກິຈກັມ ທາງສາສນາ ຂອງເຂົາເຈົ້າ“.

ຕໍ່ມາເມື່ອວັນອາທິດ ທີ່ຜ່ານມາ ອົງການ ນິຣະໂທດກັມສາກົນ ກໍອອກຖແລງການ ວ່າປະຊາຄົມໂລກ ຄວນຮຽກຮ້ອງ ໃຫ້ທາງການລາວ ປ່ອຍຕົວນັກຮຽນ ນັກສຶກສາ ທີ່ຖືກຈັບແຕ່ປີ 1999 ເປັນຕົ້ນ ໃຫ້ປ່ອຍຕົວ ທ່ານ ທອງປະເສີດ ເກື້ອກູນ ທ່ານ ແສງອາຣຸນ ແພງພັນ ແລະ ບົວວັນ ຈັນມະນິວົງ.

ອົງການ ນິຣະໂທດກັມສາກົນ ຖແລງອີກວ່າ ເປັນການອັບອາຍ ຂາຍໜ້າທີ່ສຸດ ສຳຣັບຣັຖບານ ສປປລາວ ທີ່ຕັດສິນຈຳຄຸກ ຊາວລາວ ທັງສາມ ເປັນເວລາສິບ ກວ່າປີ ຍ້ອນວ່າ ພວກເຂົາຮຽກຮ້ອງ ຂໍມີສິດທິ ເສຣີພາບ.

ນັກໂທດການເມືອງ ເຊັ່ນ ທ່ານ ທອງປະເສີດ ເກື້ອກູນ ແສງອາຣຸນ ແພງພັນ ແລະ ທ່ານ ບົວວັນ ຈັນມະນີວົງ ບໍ່ຄວນຖືກ ຫລົງລືມ ບັນດາຜູ້ນຳ ເອເຊັຍ ແລະ ຢູໂຣບ ທີ່ກຳລັງປະຊຸມກັນ ຢູ່ລາວ ຄວນຮຽກຮ້ອງ ໃຫ້ທາງການລາວ ປ່ອຍຕົວນັກໂທດ ທັງສາມ ແລະຄົນອື່ນໆ ໃນທັນທີ່ທັນໃດ ແລະ ຢ່າງບໍ່ມີ ເງື່ອນໄຂ.