ທາງການເມືອງໄຊບູຣີ ສັ່ງປິດໂບດ

ໂບດຄຣິສຈຽນ ຄາໂທລິກ ບ້ານແກ້ງແວງ ໃນເມືອງ ໄຊບູຣີ ແຂວງ ສວັນນະເຂດ ຖືກທາງການ ຍຶດເປັນຂອງຣັຖ ເມື່ອວັນທີ່ 22 ກຸມພາ ນີ້ ພາຍຫລັງທີ່ ເຈົ້າໜ້າທີ່ ອໍານາດ ການປົກຄອງ ເມືອງ ໄດ້ເປີດ ສັມມະນາ ໃນບ້ານ ແກ້ງແວງ ເຣື້ອງ “ ເຄັດລັບ ຂອງສັຕຣູ” ແລະ ໄດ້ຈົບລົງ ໃນຕອນບ່າຍ 4 ໂມງ ຂອງ ວັນດຽວກັນ. ຈາກນັ້ນ ເຈົ້າໜ້າທີ່ເມືອງ ໄດ້ປະກາດ ຫ້າມບໍ່ໃຫ້ ຊາວຄຣິສຈຽນ ໃຊ້ສະຖານທີ່ ນັ້ນອີກ ແລະ ສັ່ງຫ້າມ ໂຮມຊຸມນຸມ ທໍາພິທີ ສວດມົນ ໄຫ້ວພຣະເຈົ້າ ຖ້າບໍ່ໄດ້ຮັບ ອະນຸຍາດ ຈາກທາງການ.

ໂບດນີ້ ເປັນແຫ່ງທີ 3 ທີ່ອໍານາດ ການປົກຄອງ ເມືອງ ໄຊບູຣີ ໄດ້ຍຶດ ເປັນຂອງຣັຖ ຕາມລາຍງານ ຈາກ ແວັບໄຊທ໌ ຂອງ International Christian concern ແຕ່ເຈົ້າໜ້າທີ່ ປ້ອງກັນ ຄວາມສງົບ ແຂວງ ສວັນນະເຂດ ອະທິບາຍ ວ່າ:

"ບໍ່ແມ່ນວ່າຍຶດ ມັນມີເງື່ອນໄຂ ມອບໃຫ້ ອໍານາດ ການປົກຄອງ ເຮັດເປັນ ໂຮງຮຽນກົດໝາຍ ມັນບໍ່ຖືກກັບ ກົດໝາຍ ຂອງ ສປປ ລາວ ກ່ຽວກັບການ ເຄື່ອນໄຫວ ຂອງກຸ່ມຄົນ ບໍ່ດີ ບໍ່ຖືກກັບ ດໍາຣັດ ເລກທີ 92 ຂອງ ນາຍົກ ຣັຖມົນຕຣີ ມີບ້ານ ດົງໄພວັນ ບ້ານແກ້ງແວງ ບ້ານນາແດງ ເມືອງໄຊບູຣີ".

ເຈົ້າໜ້າທີ່ລາວ ວ່າ ການປະກອບ ພິທີທາງ ສາສນາ ຂອງຊາວ ຄຣິສຈຽນ ຕາມກົດໝາຍ ຂອງລາວນັ້ນ ຈະຕ້ອງຂໍ ອະນຸຍາດ ຈາກອໍານາດ ການປົກຄອງ ໃນເມືອງນັ້ນ ເສັຽກ່ອນ ແຕ່ຊາວ ຄຣິສຈຽນ ກຸ່ມນື່ງບໍ່ ປະຕິບັດ ຕາມລະບຽບ ຈື່ງໄດ້ສັ່ງ ໃຫ້ປິດ ແລ້ວນໍາໃຊ້ ເປັນໂຮງຮຽນ ສອນກົດໝາຍ. ເຈົ້າໜ້າທີ່ລາວ ຍັງກ່າວວ່າ ລາຍງານ ໃນແວັບໄຊທ໌ ຂອງ ຊາວຄຣິສຈຽນ ສາກົນ ອາດບໍ່ຖືກ ກັບຄວາມຈິງ:

"ເຣື້ອງແວັບໄຊທ໌ ນີ້ກໍແລ້ວແຕ່ ສີ່ເຮັດ ມັນທັນສະໄໝ ກໍກາຍເປັນ ສິ່ງທີ່ບໍ່ດີ ມັນບໍ່ແນ່ນອນ ຄວາມເປັນຈິງ ບິດເບືອນກັນ ຄືຟ້າກັບດິນ ມັນຫ່າງໄກກັນ".

ປັດຈຸບັນ ມີໂບດ ຄຣິສຈຽນ ໃນທົ່ວແຂວງ ສວັນນະເຂດ ຈໍານວນ 30 ໂບດ ແຕ່ ທາງການລາວ ຮັບຮູ້ພຽງແຕ່ 7 ໂບດ ເທົ່ານັ້ນ ທີ່ຖືກຕ້ອງ ຕາມກົດໝາຍ. ອົງການ ຄຣິສຈຽນ ສາກົນ ກ່າວວ່າ ເຖິງແມ່ນວ່າ ກົດໝາຍລາວ ຮັບປະກັນ ສິດ ເສຣີພາບ ໃນການ ນັບຖື ສາສນາ ແຕ່ອໍານາດ ການປົກຄອງ ທ້ອງຖິ່ນ ບໍ່ຍອມຮັບຮູ້ ຄວາມຖືກຕ້ອງ ແລະສິທທິ ຂອງໂບດ.