ຂ.ຊຽງຂວາງມີອຸປສັກ ສ້າງສາພັທນາຫົນທາງ

ທາງການ ລາວ ເລິ້ມ ສ້າງຂົວ ແລະ ຖນົນຫົນທາງ ຫລາຍເສັ້ນ ທີ່ ແຂວງຊຽງຂວາງ ນັບແຕ່ ຕົ້ນປີນີ້ ເປັນຕົ້ນມາ. ແຕ່ ປັດຈຸບັນ ຖນົນ ສ່ວນຫລາຍ ຍັງເປັນ ທາງດິນແດງ ຍັງບໍ່ທັນ ປູຢາງເທື່ອ. ສະນັ້ນ ເວລາ ຝົນຕົກ ໜັກ ຖນົນແດງ ຈຶ່ງເປ່ເພ ແລະ ມີຂີ້ຕົມ ຫລາຍ ຈົນ ບໍ່ສາມາດ ສ້າງຕໍ່ ແລະ ສັນຈອນ ໄປມາໄດ້. ດັ່ງເຈົ້າໜ້າທີ່ ຜແນກ ໂຍທາທິການ ແລະ ຂົນສົ່ງ ແຂວງຊຽງຂວາງ ເວົ້າວ່າ:

“ຝົນກໍມັນເປັນ ປົກກະຕິ ຢູ່ແລ້ວ ເນາະ ເພາະວ່າ ຫົນທາງເຮົາ ມັນເປັນທາງ ເອິ້ນວ່າ ປູດິນແດງ ບໍ່ທັນເປັນ ທາງຢູຢາງ ຍາມຝົນ ກໍຖືວ່າ ການສັນຈອນ ກໍມີຄວາມ ຫຍຸ້ງຍາກ ເມືອງເປັນເມືອງ ພູດອຍ ເນາະ ຖ້າວ່າ ເສັ້ນທາງເຮົາ ສ້າງສຳເຣັດ ສິເຮັດ ໃຫ້ການ ຈາຣະຈອນ ສິນຄ້າຕ່າງໆ ສະດວກ ສະບາຍ ຂື້ນ”.

ເຈົ້າໜ້າທີ່ ກ່າວອີກວ່າ ອີກ ສາເຫດນຶ່ງ ທີ່ເຮັດໃຫ້ ການສ້າງຂົວ ແລະ ຖນົນຫົນທາງ ຊັກຊ້າ ຢູ່ ແຂວງ ຊຽງຂວາງ ກໍແມ່ນ ບໍຣິສັດ ກໍ່ສ້າງ ບໍ່ສາມາດ ຂົນອຸປກອນ ການກໍ່ສ້າງ ໄປບ່ອນ ກໍ່ສ້າງໄດ້ ເພາະ ຖນົນ ຫົນທາງ ຖືກຕັດຂາດ ຍ້ອນນ້ຳຖ້ວມ ຢ່າງແຮງ ເມື່ອບໍ່ດົນ ຜ່ານມາ.

ໃນເບື້ອງຕົ້ນ ຜແນກ ໂຍທາທິການ ແລະ ຂົນສົ່ງ ແຂວງຊຽງຂວາງ ຣາຍງານວ່າ ຖນົນ 41 ເສັ້ນ ແລະ ຂົວ 19 ແຫ່ງ ໄດ້ຮັບ ຄວາມເສັຍຫາຍ ຈາກ ໄພນ້ຳຖ້ວມ. ປັດຈຸບັນ ທາງການ ກຳລັງ ພຍາຍາມ ສ້ອມແປງ ເສັ້ນທາງ ແລະ ຂົວ ທີ່ສຳຄັນ ໃຫ້ໄວ ເທົ່າທີ່ ຈະໄວໄດ້ ເຖິງວ່າ ຈະຂາດເຂີນ ງົບປະມານ.