ຍັງບໍ່ມີຮ່ອງຮອຍຂອງ ທ.ສົມບັດ ສົມພອນ

ໃນມື້ວັນທີ 18 ທັນວາ 2012 ນີ້ ກຸ່ມນັກເຄື່ອນໄຫວ ຈາກອົງການ ທີ່ບໍ່ຂື້ນກັບ ຣັຖບານ (NGO) ທີ່ ປະເທດໄທ ໄດ້ພາກັນ ຮຽກຮ້ອງ ໃຫ້ ຣັຖບານລາວ ສືບສວນ ກ່ຽວກັບ ການ ຫາຍສາບສູນ ຂອງ ທ່ານ ສົມບັດ ສົມພອນ ຫົວຫນ້າ ຫ້ອງການ ອົງການ ທີ່ບໍ່ຂື້ນກັບ ຣັຖບານ ໃນລາວ ຜູ້ທີ່ໄດ້ຮັບ ລາງວັນ ແມaກໄຊໄຊ ທີ່ໄດ້ຫາຍໂຕໄປ ເປັນເວລາ ຫລາຍວັນ ນັ້ນໂດຍດ່ວນ.

ໃນຈົດຫມາຍ ທີ່ ກຸ່ມດ່ັງກ່າວ ສົ່ງໄປຍັງ ຣັຖບານລາວ ສະພາ ແຫ່ງຊາດ ແລະ ສະຖານທູດ ຕ່າງປະເທດ ໃນ ສປປລາວ ກຸ່ມນັກເຄື່ອນໄຫວ ໄດ້ສະແດງ ຄວາມເປັນຫ່ວງ ເຖິີງຄວາມປອດພັຍ ຂອງ ທ່ານ ສົມບັດ ສົມພອນ ແລະ ໄດ້ຮຽກຮ້ອງ ໃຫ້ທາງການລາວ ດຳເນີນມາຕການ ຢ່າງຮີບດ່ວນ ໃນກໍຣະນີ ດັ່ງກ່າວ.

ທ່ານ ສົມບັດ ສົມພອນ ເປັນທີ່ຄຸ້ນເຄີຍ ໃນກຸ່ມນັກ ເຄື່ອນໄຫວ ທາງດ້ານ ສັງຄົມໃນໄທ ເປັນຢ່າງດີ ເພາະເຮັດວຽກ ຂ້າມແດນ ໃນການພັທນາ  ສັງຄົມ ຣະຫວ່າງ ປະເທດ ມາຕຣອດ. ທ່ານໄດ້ ສ້າງຕັ້ງ ອົງການ ທີ່ບໍ່ຂື້ນກັບ ຣັຖບານ ເພື່ອສົ່ງເສີມ ການພັທນາ ສັງຄົມ ໃນລາວ ແລະ ເຄີຍໄປສຶກສາ ທີ່ ສະຫະຣັຖ ອະເມຣິກາ.

ແຫລ່ງຂ່າວ AP ຣາຍງານວ່າ ຫມູ່ຂອງທ່ານ ສົມບັດ ຜູ້ທີ່ບໍ່ປະສົງ ອອກຊື່ ຄົນນຶ່ງ ໃຫ້ການ ຕໍ່ນັກຂ່າວ AP ທາງ ໂທລະສັບ ວ່າ ເລົາໄດ້ເຫັນ ຮູບພາບ ຈາກກ້ອງ ວົງຈອນປິດ ທີ່ເຫັນທ່ານ ສົມບັດ ສົມພອນ ຖືກນຳໂຕ ເຂົ້າໄປໃນ ສະຖານນີ ຕຳຣວດ ແລະວ່າ ໃນມື້ວັນຈັນ ຍາດພີ່ນ້ອງ ຂອງລາວ ກໍໄດ້ທົບທວນ ເບີ່ງຮູບພາບດັ່ງກ່າວ ກໍພົບວ່າ ໃນເວລາ 6 ໂມງແລງ ຂອງ ມື້ວັນເສົາ ທ່ານ ສົມບັດ ຖືກເຈົ້າໜ້າທີ່ ຕໍາຣວດ ຢຸດຣົຖ ໃນເວລາ ກັບບ້ານ ແລະ ຖືກນຳໂຕ ເຂົ້າໄປໃນ ສະຖານີ ຕຳຣວດ ເມືອງ ສີສັດຕະນາກ ຕໍ່ມາ ມີຜູ້່ຊາຍ ຜູ້ນຶ່ງ ຍ່າງອອກຈາກ ສະຖານີ ຕຳຣວດ ແລ້ວຂື້ນຣົຖກະບະ ສີຂາວ ໄປກັບເລົາ ຫລັງຈາກນັ້ນ ກໍບໍ່ຮູ້ຂ່າວຄາວ ຂອງເລົາເລີຍ.

ເລົາບໍ່ໄດ້ບອກ ຣາຍລະອຽດ ວ່າ ກ້ອງວົງຈອນປິດ ນັ້ນແມ່ນ ມາຈາກໃສ ຈຸດໃດ?