ຄົນງານຈີນຈະມາພ້ອມ ໂຄງການທາງຣົດໄຟ

ທາງການລາວ ຄາດວ່າ ເມື່ອໂຄງການ ສ້າງທາງຣົຖໄຟ ຄວາມໄວສູງ ລາວ-ຈີນ ເລີ້ມຂື້ນ ທາງບໍຣິສັດ ຈີນ ກໍຈະນໍາເອົາ ຄົນງານຈີນ ທີ່ມີຝີມື ແລະ ຜູ້ຊ່ຽວຊານ ການສ້າງ ທາງຣົຖໄຟ ເຂົ້າມາລາວ ປະມານ 4,000 ຄົນ. ເຈົ້າໜ້າທີ່ລາວ ຜູ້ນຶ່ງເວົ້າວ່າ:

"ຢູ່ໃນການ ສ້າງທາງນີ້ ອັນນີ້ເຮົາກໍ ຂັ້ນການກໍ່ສ້າງ ຊິ່ແມ່ນ ຈະມີແຮງງານ ຈີນເຂົ້າມາຫລາຍ ຫັ້ນໜ໋າ ຕາມຄາດຄະເນ ປະມານ 4,000 ຄົນ ຕາມຂ່າວ ຂອງຣັຖບານລາວ ອອກມາ ແຮງງານລາວ ຊິ່ບໍ່ມີ ວິຊາການດ້ານ ກໍ່ສ້າງທາງຣົຖໄຟ ນີ້ເນ໋າະ".

ນາງເວົ້າຕໍ່ໄປວ່າ ໃນຕອນທໍາອິດ ຂອງການກໍ່ສ້າງ ທາງຣົຖໄຟ ອາດຈະມີຄົນງານ ຈີນຫລາຍ ແຕ່ເມືອກໍ່ສ້າງ ສໍາເຣັດແລ້ວ ຈໍານວນ ນັກວິຊາການ ຈີນ ອາດຈະຫລຸດລົງ ຍ້ອນວ່າ ຣັຖບານລາວ ກໍາລັງສົ່ງເສີມ ສົ່ງແຮງງານລາວ ໄປຮຽນກ່ຽວກັບ ເຣື່ອງນີ້ ໃນຕ່າງປະເທດ ເພື່ອໃຫ້ ຄົນງານລາວ ມີຄວາມຮູ້ ວິຊາການ ກ່ຽວກັບ ການກໍ່ສ້າງ ທາງຣົຖໄຟ ນີ້ໄດ້ ເພື່ອໄວ້ຮອງຮັບ ບໍຣິຫານ ສ້ອມແປງ ທາງຣົຖໄຟ ໃນອະນາຄົດ.

ປັຈຈຸບັນ ທາງການລາວ ຍັງບໍ່ຮູ້ຣາຍ ຣະອຽດວ່າ ໃນຊ່ວງເວລາ ການກໍ່ສ້າງເບື້ອງຕົ້ນ ຄົນງານລາວ ຈະໄດ້ຮັບບັນຈຸ ເຂົ້າເຮັດວຽກ ໃນໂຄງການ ກໍ່ສ້າງນີ້ຫລືບໍ່? ຍ້ອນວ່າ ບໍຣິສັດຈີນ ເປັນຜູ້ຮັບ ຜິດຊອບ ທັງໝົດ. ທາງການລາວ ຍັງບໍ່ໄດ້ອອກ ຖແລງການວ່າ ໂຄງການກໍ່ສ້າງ ທາງຣົຖໄຟ ຄວາມໄວສູງ ລາວ-ຈີນ ຈະເລີ້ມມື້ໃດ ຍ້ອນວ່າຍັງຢູ່ ໃນຂັ້ນຕອນ ການກູ້ຢືມເງິນຈາກ ຈີນ ເພື່ອມາເປັນທຶນ ກໍ່ສ້າງ ໃນສ່ວນທີ່ ສປປລາວ ຮັບຜິດຊອບ ນັ້ນຢູ່.