ນັກລົງທຶນຍັງສໍາຣວດ ແຮ່ທາຕໃນລາວ

ສປປລາວ ຍັງເປີດໃຫ້ ນັກລົງທືນ ທັງພາຍໃນ ແລະ ຕ່າງປະເທດ ສາມາດ ສຳຣວດແຮ່ທາດ ໃນລາວ ໃນຊ່ວງທີ່ມີ ການຢຸດ ໃຫ້ສັມປະທານ ເພື່ອບໍ່ເປັນການ ເສັຽເວລາ ໃນການລໍຖ້າ ການໃຫ້ ອະນຸຍາດ ອີກໃຫມ່ ໃນອະນາຄົດ ເພາະການສຳຣວດ ຈະໃຊ້ເວລາ ດົນນານ. ດັ່ງເຈົ້າຫນ້າທີ່ ບໍ່ແຮ່ ທີ່ແຂວງ ໄຊຍະບູຣີ ທ່ານນື່ງເວົ້າວ່າ:

"ມີກໍມີບໍຣິສັດ ມັນສເນີມາ ເນາະ ຢາກເຊັກເບີ່ງວ່າ ຈຸດດັ່ງກ່າວນັ້ນ ມີຄົນສັມປະທາ ຫລືບໍ? ຢູ່ຊ່ວງປາກລາຍ ເມືອງຊຽງ ເນາະ ເພາະວ່າມັນເປັນ ເນື້ອທີ່ກວ້າງຢູ່ ບໍ່ຖືກ ບໍຣິສັດໃດ ຈັບຈ່ອງມາກ່ອນ ມີແຕ່ເຮົາແລ່ນ ເກັບກຳຂໍ້ມູນ ໃນຊ່ວງ ການກວດກາ ຂອງຣັຖບານ ສອງປີເນາະ".

ເຈົ້າຫນ້າທີ່ ທ່ານນັ້ນ ກ່າວຕໍ່ໄປວ່າ ໃນຊ່ວງທີ່ມີ ການຢຸດການອອກ ໃບອະນຸຍາດ ໃຫ້ສັມປະທານ ນັ້ນ ກໍບໍ່ໄດ້ ຫມາຍຄວາມວ່າ ການຊອກຄົ້ນ ຫລືສຳຣວດບໍ່ແຮ່ ໃນລາວ ຈະຢຸດ ສງັກ ບໍຣິສັດຕ່າງໆ ສາມາດດຳເນີນ ການສຳຣວດ ໄດ້ຢູ່ ແຕ່ການຈະໃຫ້ ອະນຸຍາດ ຫລືບໍນັ້ນ ເປັນເລື້ອງ ຂອງຣັຖບານ ນັກລົງທືນ ຕ້ອງເປັນຄົນສ່ຽງເອງ. ສຳລັບຄ່າໃຊ້ຈ່າຍ ໃນການສຳຣວດນັ້ນ ເປັນຂອງ ນັກລົງທືນ ແຕ່ຖ້າບໍ່ຖືກ ອະນຸມັດ ທາງການລາວ ບໍ່ມີສ່ວນ ຮັບຜິດຊອບ ກ່ຽວກັບເລື້ອງນີ້. ເຈົ້າຫນ້າທີ່ ບໍ່ແຮ່ ທີ່ ນະຄອນຫລວງ ວຽງຈັນ ເວົ້າວ່າ:

"ບໍ່ມີເລີຍ ມີແຕ່ນັກລົງທືນ ຈ່າຍໄປ ສົມມຸດວ່າຈະໄປ ຊອກຄົ້ນສຳຣວດ ຖ້າວ່າບ່ອນ ບໍ່ມີແຮ່ ມັນຖືກເປັນໂຕເມືອງ ຫລືເຂດທີ່ສງວນ ຖືວ່າການລົງທືນ ນັ້ນ ເປັນໄປບໍ່ໄດ້ ກໍຖືວ່າ ຕົກໄປ ຣັຖບານ ຈະບໍ່ຈ່າຍຊົດເຊີຍ".

ເຈົ້າຫນ້າທີ່ລາວ ທ່ານດຽວກັນນີ້ ກ່າວຕໍ່ໄປວ່າ ການໃຫ້ ສັມປະທານ ຂຸດຄົ້ນແຮ່ທາດ ໃນລາວ ນັກລົງທືນ ຕ້ອງເປັນຄົນສ່ຽງ ເອົາເອງ ໃນການລົງທືນ ຖ້າມີແຮ່ ກໍດີໄປ ແຕ່ຖ້າບໍ່ມີ ກໍເສັຽລ້າໆ ຫລາຍບໍຣິສັດ ກໍໂຊກດີ ແລະ ອີກຫລາຍ ບໍຣິສັດ ກໍລົ້ມລະລາຍ ຍ້ອນການ ສຳຣວດ ແລະ ວີຈັຍ ບໍ່ມີຂໍ້ມູນ ພຽງພໍ. ຣັຖບານລາວ ກໍໄດ້ຮັບ ສ່ວນແບ່ງ ຈາກພາສີ ກຳໄຣ ແລະ ຄ່າສັມປະທານ ຖ້າມີການ ຂຸດຄົ້ນ.