ລາວຍັງຕ້ອງນໍາເຂົ້າ ສິນຄ້າເກືອບທຸກປະເພດ

ສປປລາວ ຍັງຕ້ອງໄດ້ ອາໄສສິນຄ້າ ປະເພດຕ່າງໆ ຈາກ ຕ່າງປະເທດ ຍ້ອນວ່າ ບໍ່ສາມາດ ຜລິດສິນຄ້າ ໄດ້ເອງ ເຖິງແມ່ນວ່າ ສະພາບເສຖກິດ ຈະຂຍາຍໂຕ ແລະສາມາດ ຜລິດສິນຄ້າ ບາງຢ່າງ ໄດ້ເອງແດ່ແລ້ວ ກໍຕາມ. ດັ່ງເຈົ້າໜ້າທີ່ ຈາກຜແນກ ນໍາເຂົ້າ ແລະ ສົ່ງອອກ ນະຄອນຫລວງ ວຽງຈັນ ເວົ້າກ່ຽວກັບ ເຣື່ອງນີ້ວ່າ:

"ເນື່ອງຈາກ ພວກເຮົາ ຜລິດກັນບາງອັນ ຫລາຍອັນ ນັ້ນແຫລ໋ະ ບໍ່ສາມາດ ທີ່ຈະຜລິດໄດ້ ບໍ່ສາມາດ ທີ່ຈະກຸ້ມ ຕົນເອງໄດ້ ມີຄວາມຈໍາເປັນ ຕ້ອງນໍາເຂົ້າ ບໍ່ມີຜົນຕໍ່ ອັດຕຣາເງິນເຟີ້ ຍັງຮັກສາ ສະຖານະພາບ ຄືເກົ່າ".

ທ່ານເວົ້າ ຕໍ່ໄປວ່າ ສ່ວນໃຫຍ່ ສິນຄ້າ ທີ່ນໍາເຂົ້າ ຈະເປັນສິນຄ້າ ທີ່ເອົາໄປໃຊ້ ເພື່ອການພັທນາ ເຊັ່ນເພື່ອການ ກໍ່ສ້າງເຂື່ອນ ຫລືໂຄງການ ໃຫຍ່ໆຕ່າງໆ ນອກຈາກນີ້ ຍັງມີສິນຄ້າ ແປຮູບ ອຸດສາຫະກັມ ແປຮູບ ໂດຍສະເພາະ ອຸດສາຫະກັມ ຜລິດນໍ້າມັນ ພືດ ນໍ້າຕານ ແລະ ເຄື່ອງໃຊ້ ປະເພດ ເຄື່ອງມື ເຄື່ອງໃຊ້ ພາຍໃນເຮືອນ. ເນື່ອງຈາກວ່າ ລາວ ມີພົລເມືອງ ໜ້ອຍ ຈຶ່ງບໍ່ຄຸ້ມຄ່າ ໃນການລົງທຶນ ແລະ ການຈັດຕັ້ງ ໂຮງງານ ຜລິດສິນຄ້າ ຈໍາເປັນ ເຫລົ່ານີ້.

ເຖິງຢ່າງໃດ ກໍຕາມ ທາງການລາວ ໝັ້ນໃຈວ່າ ອັດຕຣາເງິນເຟີ້ ໃນລາວ ຈະບໍ່ເພີ້ມ ສູງຂຶ້ນ ເນື່ອງຈາກວ່າ ອັດຕຣາ ເງິນເຟີ້ ເພີ້ມຂຶ້ນຈາກ 6.67 ສ່ວນຮ້ອຍ ເປັນ 6.69 ສ່ວນຮ້ອຍ ເທົ່ານັ້ນ ເມື່ອທຽບໃສ່ ປີກາຍນີ້ ແຕ່ເຊື່ອວ່າ ຈະບໍ່ຮອດ 10 ສ່ວນຮ້ອຍ ຍ້ອນວ່າ ຄ່າເງິນກີບລາວ ຍັງແຂງ ແລະ ເສຖກິດ ປີ 2011 ກໍໄດ້ຂຍາຍໂຕ 8.1 ສ່ວນຮ້ອຍ ສູງກວ່າ ຄວາມຄາດໝາຍ ຊຶ່ງໄດ້ຈາກການ ຂາຍພລັງງານ ໄຟຟ້າ ແລະ ອຸດສະຫະກັມ ບໍ່ແຮ່ ທີ່ຜລິດໄດ້ ພາຍໃນປະເທດ.