ການເປັນຢູ່ໃນລາວຂື້ນກັບ ນັກລົງທຶນຕ່າງຊາດ

ຊີວິດການເປັນຢູ່ ຂອງ ປະຊາຊົນ ລາວ ໃນ ຊົນນະບົດ ຈະໄດ້ຮັບ ການພັທນາ ໃຫ້ດີຂຶ້ນໄດ້ ໜ້ອຍຫລາຍຊໍ່າໃດ ແມ່ນຂຶ້ນຢູ່ກັບ ທຸຣະກິຈ ການລົງທຶນ ຂອງຕ່າງຊາດ ແລະຖ້າວ່າ ປະຊາຊົນ ໄດ້ເຂົ້າ ປະກອບສ່ວນ ກໍຈະເປັນປໂຍດຫຼາຍ ແຕ່ຖ້າຫາກ ປາສຈາກ ປະຊາຊົນທ້ອງຖິ່ນ ເຂົ້າຮ່ວມ ໃນໂຄງການ ກໍຈະເຮັດໃຫ້ ການພັທນານັ້ໆ ບໍ່ໄປບໍ່ມາ ຍ້ອນວ່າ  ສັນຍານ ທາງທຸຣະກິຈ ແລະ ການພັທນາ ຊົນນະບົດ ກໍອີງຕາມ ສະພາບ ຂອງເສຖກິຈນໍາ. ເຈົ້າໜ້າທີ່ ຂແນງການ ສັມປະທານ ບໍ່ແຮ່ ນະຄອນຫລວງ ວຽງຈັນ ເວົ້າວ່າ:

"ເບິ່ງໃຫ້ມັນ ສົມເຫດສົມຜົນ ສົມມຸດວ່າຊ່ວງນີ້ ຣາຄາຕົກບໍ່? ລາຍຮັບມັນບໍ່ໄດ້ ຄັນເຮົາຊິເອົາ ຕົງນີ້ຫລາຍ ຜູ້ລົງທຶນ ກໍແບກພາລະ ໜັກໂພດ ຖ້າຢ່ອນຍານ ທາງນີ້ຫລາຍ ທາງຄວາມຕ້ອງການ ພັທນາ ສະນັ້ນຕ້ອງເຮັດໃຫ້ ທັງສອງດ້ານນີ້ ໄປນໍາກັນໄດ້".

ເຈົ້າໜ້າທີ່ ເວົ້າອີກວ່າ ການລົງທຶນໃນລາວ ໂດຍສະເພາະ ໂຄງການໃຫຍ່ໆ ເຊັ່ນເຂື່ອນໄຟຟ້າ ຫລືບໍ່ແຮ່ ຈະເຮັດໃຫ້ມີ ການພັທນາໃນເຂດ ສອກຫລີກ ທີ່ທາງການ ບໍ່ສາມາດ ເຮັດເອງໄດ້ ຊຶ່ງໂຄງການໃຫຍ່ໆ ຈະເຮັດໃຫ້ຊີວິດ ການເປັນຢູ່ ຂອງພວກຊາວບ້ານ ດີຂຶ້ນ ຍ້ອນມີການປັບປຸງ ຣະບົບ ສາທາຣະນຸປະໂພຄຕ່າງໆ ເຊັ່ນລະບົບ ໄຟຟ້າ ນໍ້າປະປາ ສຸຂສາລາ ໂຮງຮຽນ ແລະອື່ນໆ ພ້ອມທັງເຮັດໃຫ້ ຊຸມຊົນ ໃນບໍຣິເວນ ອ້ອມແອ້ມ ມີວຽກເຮັດງານທໍາ ຫລາຍຂຶ້ນ.

ເຖິງຢ່າງໃດ ກໍຕາມ ການລົງທຶນ ທີ່ຄວບຄູ່ໄປກັບ ການພັທນາ ຊົນນະບົດ ຂຶ້ນກັບ ສະພາບເສຖກິດ ຊຶ່ງທາງການ ບໍ່ສາມາດ ກໍານົດໄດ້. ເຈົ້າໜ້າທີ່ກົມບໍ່ແຮ່ ເວົ້າວ່າ:

"ກໍບໍລິສັດ ນັ້ນແຫລ໋ະລົງທຶນ ເອງເນ໋າະ ການພັທນາທີ່ ທາງບໍລິສັດ ມີຄວາມສາມາດ ພັທນາ ຢ່າງໃດກໍໄດ້ ແຄ່ນັ້ນແຫລ໋ະ ຂຶ້ນຢູ່ກັບ ບໍລິສັດ ບໍລິສັດມີທຶນ ຫລາຍຫລືບໍ່".

ລາວຕ້ອງໄດ້ອາສັຍ ການລົງທຶນ ຂອງຕ່າງຊາດ ເພື່ອການພັທນາ ຊົນນະບົດ ຫລາຍ ຍ້ອນວ່າຣັຖບານ ຍັງຂາດງົບປະມານ ເພື່ອການພັທນາ ຈຶ່ງໄດ້ພຍາຍາມ ສົ່ງເສີມ ການລົງທຶນ ຈາກຕ່າງປະເທດ ຢູ່ເລື້ອຍມາ.