ເສຣີພາບໃນລາວ ຍັງຖືກບັ່ນທອນ

ລາຍງານ ກະຊວງການຕ່າງປະເທດ ສະຫະຣັດ ອະເມຣິກາ ວ່າດ້ວຍການ ປະຕິບັດ ສິດທິມະນຸດ ປະຈໍາປີ 2010 ຄັ້ງທີ 35 ໃນທົ່ວໂລກວ່າ ຍັງມີຫລາຍໆ ປະເທດ ທີ່ສືບຕໍ່ຈໍາກັດ ແລະ ລະເມີດສິດທິ ມະນຸດ. ມາດາມ Hillary Clinton ຣັຖມົນຕຣີຕ່າງປະເທດ ໃຫ້ຂໍ້ສັງເກດ ເນື່ອງໃນໂອກາດ ເປີດເຜີຽລາຍງານ ໃນວັນທີ 8 ເມສາ ນີ້ວ່າ: ...ສຽງ... ຫລາຍໆປະເທດລະເມີດ ສິດທິເສຣີພາບ ພື້ນຖານ ການສະແດງອອກ ການໂຮມຊຸມນຸມ ແລະ ການສະມາຄົມ ໂດຍຈໍາກັດເສຣີພາບ ທາງອິນເທີເນັດ. ຫລາຍກ່ວາ 40 ປະເທດຈໍາກັດ ອິນເທີເນັດ ໂດຍໃຊ້ວິທີ ຕ່າງໆນານາ.

ລາຍງານໄດ້ລະບຸ ວ່າສປປລາວ ຊື່ງປົກຄອງດ້ວຍລະບອບ ຜະເດັດການພັກດຽວ ຂອງພັກປະຊາຊົນ ປະຕິວັດລາວ ຍັງສືບຕໍ່ປະຕິເສດ ສິດທິເສຣີພາບ ຂອງປະຊາຊົນ ໃນການປ່ຽນແປງ ຣັຖບານ. ສະພາບຂອງຄຸກຂັງຄົນ ຍັງໂຫດຫ້ຽມຢູ່ ແລະຫລາຍຄັ້ງນາບຂູ່ ຕໍ່ຊີວິດນັກໂທດ.

ການສໍ້ຣາສບັງຫລວງ ຢູ່ໃນຖັນແຖວ ເຈົ້າໜ້າທີ່ຕໍາຣວດ ແລະ ເຈົ້າໜ້າທີ່ຍຸຕິທັມ ຍັງມີຢູ່ຕໍ່ໄປ. ຣັຖບານລາວ ລະເມີດສິດທິ ບຸກຄົນພົລເມືອງ ແລະ ບໍ່ເຄົາລົບນັບຖື ສິດເສຣີພາບ ໃນການປາກເວົ້າ, ການອອກຂ່າວ, ການໂຮມຊຸມນຸມ, ຫລືການສະມາຄົມ. ເຈົ້າໜ້າທີ່ອໍານາດ ການປົກຄອງທ້ອງຖິ່ນ ຫລາຍຄັ້ງຫລາຍຄາວ ຈໍາກັດສິດເສຣີພາບ ໃນການເຊື່ຶອຖື ແລະເສຣີພາບ ໃນການໄປມາຫາສູ່ກັນ. ການຄ້າມະນຸດ ຍັງເປັນບັນຫາ ທີ່ແກ້ບໍ່ໄດ້.

ລາຍງານກ່ຽວກັບ ການປະຕິບັດ ສິດທິມະນຸດ ໃນສປປລາວ ມີປະມານ 10 ໜ້າເຈັ້ຽ ຊຶ່ງເຮົາຈະໄດ້ນໍາ ລາຍລະອຽດ ມາສະເໜີ ໃນໂອກາດຕໍ່ໄປ.