ກຸ່ມຄາໂຕລິກຢູ່ລາວ ຕ້ອນຮັບຄຸນພໍ່ຄົນໃຫມ່

ຄຸນພໍ່ Pierre Bountha Silaphet ບວດເປັນຄຸນພໍ່ ສາສນາ ຄຣິສຕຽນ ນິກາຍຄາໂຕລິກ ໃນເຂດ ສັງຄະມົນທົນ ຫລວງພຣະບາງ ໃນວັນທີ 29 ເດືອນມົກກະຣາ ປີນີ້ ດ້ວຍສັງຄະນາຍົກ Louise Marie MangkhaneKhoun ຈາກສັງຄະມົນທົນ ປາກເຊ ເປັນຜູ້ບວດໃຫ້. ພິທີດັ່ງກ່າວ ມີຊາວຄາໂຕລິກ ເຂົ້າຮ່ວມກວ່ານຶ່ງ ພັນຄົນ. ອິງຕາມລາຍງານ. ແຫລ່ງຂ່າວຈາກ ອົງການສາສນາ ຄຣິສຕຽນ ລາຍງານວ່າ ສັງຄະມົນທົນ ຫລວງພຣະບາງ ບໍ່ມີການ ບວດຄຸນພໍ່ ມາເປັນເວລາກວ່າ 30 ປີແລ້ວ.

ຄຸນພໍ່ ບຸນທາ ອາຍຸ 34 ປີ ເປັນຄົນແຂວງ ໄຊຍະບຸຣີ ເປັນຄຸນພໍ່ ຊາວເຜົ່າຂະມຸ ແລະ ກໍ່ເປັນລູກຄົນ ສຸດທ້າຍ ໃນຈຳນວນອ້າຍນ້ອງ 7 ຄົນ ໃນຄອບຄົວ ຊາວນາ. ຫລັງຈາກຈົບ ການສຶກສາດ້ານ ສາສນາຄຣິສຕຽນ ທີ່ໂບດ ST.PAUL VIANNEY ທີ່ເມືອງທ່າແຂກ ແຂວງຄຳມ່ວນ ຮ່ວມດ້ວຍ ການໄປຮຽນພາສາ ອັງກິດ ທີ່ປະເທດ ຟີລີປີນ 1 ປີ ທ່ານກໍ່ກັບມາ ບ້ານເກີດເມືອງນອນ ທີ່ສັງຄະມົນທົນ ຫລວງພຣະບາງ.