ຖແລງການຮ່ວມ ລາວ-ສະຫະຣັຖ

ໃນຖແລງການ ນັ້ນກ່າວວ່າ ຣັຖມົນຕຣີ ການຕ່າງ ປະເທດ Hillary Clinton ຂອງ ສະຫະຣັຖ ແລະ ຮອງນາຍົກ ຣັຖມົນຕຣີ /ຣັຖມົນຕຣີ ການຕ່າງ ປະເທດ ດຣ. ທອງລຸນ ສີສຸລິດ ສປປລາວ ໄດ້ຫາລືກັນ ກ່ຽວການ ຮ່ວມມື ສອງຝ່າຍ. ຣັຖມົນຕຣີ ທັງສອງທ່ານ ໄດ້ເວົ້າເຖິງການ ຈະໄດ້ເຂົ້າເປັນ ສະມາຊິກ ອົງການ ການຄ້າໂລກ ຂອງລາວ ແລະ ການ ຮ່ວມມືກັນ ຊື່ງກຳລັງ ດຳເນີນຢູ່ ກ່ຽວກັບການ ແກ້ໄຂບັນຫາ ທ້າທາຍ ທີ່ເກີດຈາກ ຣະເບີດ ທີ່ຍັງບໍ່ແຕກ ນອກຈາກນັ້ນ ຣັຖມົນຕຣີ ທັງສອງທ່ານ ກໍຕົກລົງ ຈະໃຫ້ຄວາມ ສະດວກ ສະບາຍ ແກ່ການຊອກ ຄົ້ນຫາ ຊາກສົບ ຂອງ ທະຫານ ອະເມຣິກັນ ທີ່ ຫາຍສາບສູນ ໄປໃນສມັຍ ສົງຄາມ ອິນໂດຈີນ ຈະເຂົ້າເປັນ ຄູ່ຮ່ວມ ໃນໂຄງການ ລິເລີ້ມ ໃນເຂດລຸ່ມ ແມ່ນ້ຳຂອງ ການປົກປັກ ຮັກສາ ສິ່ງແວດລ້ອມ ແລະ ການສົ່ງເສີມ ບົດບາດ ສັງຄົມ ພົລເມືອງລາວ.

ຣັຖມົນຕຣີ ການຕ່າງ ປະເທດ ສະຫະຣັຖ ສະແດງຄວາມ ຍິນດີ ທີ່ຣັຖບານລາວ ໄດ້ຮັບເອົາ ຄອບຄົວ ຂອງ ຊາວເຜົ່າມົ້ງ ທີ່ກັບມາຈາກ ໄທເມື່ອ ປີ 2009. ເຊັ່ນດຽວກັນ ເຈົ້າໜ້າທີ່ ລາວ ກໍສະແດງ ຄວາມຮູ້ບຸນຄຸນ ທີ່ສະຫະຣັຖ ໄດ້ໃຫ້ ການຊ່ວຍເຫລືອ ທາງດ້ານ ມະນຸສທັມ ແກ່ຊາວເຜົ່າມົ້ງ ເຫລົ່ານັ້ນ.

ອີກຕອນນຶ່ງ ຣັຖມົນຕຣີ ການຕ່າງ ປະເທດ ສະຫະຣັຖ ໄດ້ສັລເສີນລາວ ທີ່ພຍາຍາມ ຈະປະຕິບັດ ໃຫ້ໄດ້ຕາມ ເປົ້າໝາຍ ການພັທນາ ສະຫະສວັດ ຂອງ ສະຫະປະຊາຊາດ ແລະ ທີ່ຈະຫລຸດພົ້ນ ຈາກຖານະ ການເປັນ ປະເທດດ້ອຍ ພັທນາ ທີ່ສຸດໃນປີ 2020. ສ່ວນຮອງ ນາຍົກ ຣັຖມົນຕຣີ/ຣັຖມົນຕຣີ ການຕ່າງ ປະເທດ ດຣ. ທອງລຸນ ສີສຸລິດ ກ່າວວ່າ ສະຫະຣັຖ ມີບົດສຳຄັນ ໃນການສ້າງ ສັນຕິພາບ ຄວາມໝັ້ນຄົງ ແລະ ຄວາມຈະເຣີນ ຮັ່ງມີ ໃນຂົງເຂດ.

ຣັຖມົນຕຣີ ທັງສອງ ດີໃຈ ທີ່ຄວາມສຳພັນ ຣະຫວ່າງ ສອງປະເທດ ກຳລັງມີ ແນວໂນ້ມ ຈະດຳເນີນໄປ ໃນທາງບວກ ແລະ ມີລັກສນະ ເສີມສ້າງ ແລະຈະສືບຕໍ່ ຫາລືກັນ ເປັນ ປະຈຳ ກ່ຽວກັບ ບັນຫາຫລາຍໆ ຢ່າງເພື່ອປັບປຸງ ໃຫ້ຄວາມສຳພັນ ເຂັ້ມແຂງ ຂື້ນເລື້ອຍໆ.

ນອກຈາກຫາລື ກັບເຈົ້າໜ້າທີ່ ລາວແລ້ວ ຣັຖມົນຕຣີ ການຕ່າງ ປະເທດ ສະຫະຣັຖ ຍັງໄດ້ໄປ ຢ້ຽມຢາມ ຫໍພະແກ້ວ ທີ່ສະແດງ ໃຫ້ເຫັນວ່າ ສະຫະຣັຖ ເຄົາຣົບ ນັບຖື ແລະ ໃຫ້ການຊ່ວຍເຫຼືອ ລາວ ເພື່ອຮັກສາ ວັທນະທັມ ທີ່ຮຸ່ງເຮືອງ ແລະ ປະຫວັດສາດ ຂອງລາວ.

ຈາກນັ້ນ ມາດາມ Clinton ຍັງໄດ້ໄປ ຢ້ຽມຢາມ ອົງການ ທີ່ບໍ່ຂື້ນກັບ ຣັຖບານ ທີ່ຊ່ວຍຮັກສາ ປິ່ນປົວ ຜູ້ທີ່ໄດ້ຮັບ ເຄາະຮ້າຍ ຈາກຣະເບີດ ທີ່ຍັງບໍ່ແຕກ.