ອາເຊັມ ບໍ່ເປັນບ່ອນ ທີ່ມີການຕັດສິນບັນຫາ ຢ່າງເປັນ ທາງການໃດໆ ເພາະ ອາເຊັມ ເປັນເວທີ ເຈຣະຈາ ເພື່ອສ້າງຕັ້ງ ຂໍ້ຕົກລົງສັນຍາ ຕ່າງໆ ເພື່ອເສີມຂຍາຍ ການພົວພັນ ຣະຫວ່າງ 2 ຝ່າຍໃນບັນດາ ປະເທດຢູໂຣບ ແລະ ປະເທດເອເຊັຽ. ຕາມຄໍາເວົ້າ ຂອງທ່ານ ເຮີເມິນ ວັນ ຣອມປຸຍ ປະທານ ສະພາຢູໂຣບ.
ທ່ານເຮີເມິນ ກ່າວຕອບຄໍາຖາມ ໃນກອງປະຊຸມ ຖແລງຂ່າວ ຜົນຂອງກອງປະຊຸມ ສຸດຍອດ ຂອງບັນດາ ຜູ້ນໍາ ເອເຊັຽ-ຢູໂຣບ ຫລື ອາເຊັມ ຄັ້ງທີ 9 ເມື່ອຕອນແລງ ວັນທີ 6 ພຶສຈິກາ 2012 ນີ້ວ່າ:
"ພວກທ່ານໄດ້ ເຈຣະຈາ ຫາຣື ກັບນາຍົກ ຣັຖມົນຕຣີລາວ ກັບບັນດາ ຣັຖມົນຕຣີ ໃນຄະນະ ຣັຖບານລາວ ແລະກໍໄດ້ຢືນຢັນ ຕື່ມອີກເຖິງ ພັນທະ ຂອງພວກທ່ານ ໃນການ ໃຫ້ການຊ່ວຍເຫລືອ ທາງການ ເພື່ອການພັທນາ ຫລື ໂອດີຊີ ແກ່ລາວ ແລະ ກໍໄດ້ປະກາດວ່າ ແຕ່ປີ 2014 ຫາ 2020 ຊຶ່ງເປັນຣະຍະ ງົບປະມານ 7 ປີ ຂອງພວກທ່ານ ນັ້ນ ການຊ່ວຍເຫລືອ ໂອດີຊີ ແກ່ສປປລາວ ຈະເພີ່ມຂຶ້ນ".
ນີ້ເປັນການ ປະກອບສ່ວນ ທີ່ສໍາຄັນ ໃນການພັທນາ ຂອງລາວ ເພື່ອໃຫ້ລາວ ບັນລຸເປົ້າໝາຍ ສະຫັດສວັດ ສະຫະປະຊາຊາດ ເພື່ອການພັທນາ ໄດ້:
"ທ່ານກ່າວຕໍ່ໄປ ເຖິງເຣື່ອງການຄ້າ ແລະ ການລົງທຶນ ວ່າ ຢູໂຣບ ເປັນຄູ່ຮ່ວມ ທີ່ສໍາຄັນຂອງລາວ ແລະຢູໂຣບ ກໍຕ້ອງການເດີນຕາມ ເສັ້ນທາງນີ້ຕໍ່ໄປ ໂດຍສະເພາະ ເຣື່ອງການຊ່ວຍເຫລືອ ທາງການ ເພື່ອການພັທນາ ໂອດີເອ ຊຶ່ງພວກທ່ານ ຈະເພີ່ມທະວີ ການຊ່ວຍເຫລືອນັ້ນ ໃນຊ່ວງປີ ງົບປະມານ ທີ່ຈະມາເຖິງນີ້.
ຜູ້ຮ່ວມ ຖແລງຂ່າວ ສລຸບຜົນ ຂອງກອງປະຊຸມ ສຸດຍອດ ອາເຊັມ ຄັ້ງທີ 9 ທີ່ນະຄອນຫລວງ ວຽງຈັນ ເມື່ອຕອນແລງ ວັນທີ 6 ພຶສຈິການີ້ ກໍມີ ທ່ານ ທອງສິງ ທັມມະວົງ ນາຍົກ ຣັຖມົນຕຣີລາວ ທ່ານ ເຮີເມັນ ວັນ ຣອມປຸຍ ປະທານ ສະພາຢູໂຣບ ແລະທ່ານ ໂຈເຊ ມານຸແອັນ ບາໂຣໂຊ ປະທານ ຄະນະກັມມາທິການ ຢູໂຣບ.