ໄທຈະຊື້ໄຟຟ້າຈາກ ເຂື່ອນເຊປ່ຽນ

ການໄຟຟ້າ ຝ່າຍຜລິດ ແຫ່ງປະເທດ ໄດ້ຮັບ ອະນຸມັດ ໃຫ້ຊື້ໄຟຟ້າ ຈາກລາວ ປະມານ 390 ເມກາວັດ ເພື່ອແກ້ໄຂ ບັນຫາ ການຂາດແຄນ ໄຟຟ້າ ໃນເຂດພາກ ຕາເວັນອອກ ສ່ຽງເໜືອ ຂອງໄທ.

ທ່ານ ສຸທາ ປັດຕະມາ ສີຣິວັດ ຜູ້ບໍຣິຫານ ການໄຟຟ້າ ຝ່າຍຜລິດ ແຫ່ງປະເທດໄທ ກ່າວວ່າ ສະພາ ນະໂຍບາຍ ພລັງງານ ແຫ່ງຊາດ ໄດ້ອະນຸມັດ ໃຫ້ ການໄຟຟ້າ ຝ່າຍຜລິດ ແຫ່ງປະເທດໄທ ຊື້ກະແສ ໄຟຟ້າ ຈາກລາວ. ກະແສໄຟຟ້າ ຈະໄປຈາກ ໂຄງການ ເຂື່ອນໄຟຟ້າ ເຊປ່ຽນ ເຊນ້ຳນ້ອຍ ທີ່ມີກຳລັງ ຜລິດປະມານ 390 ເມກາວັດ ແລະ ຈະເລີ້ມສົ່ງ ຜ່ານສາຍສົ່ງ ຫາແຂວງ ອຸບົນ ຣາຊທານີ ຂອງໄທ ໃນປີ 2018. ອາຍຸການຊື້ ໄຟຟ້າ ຈາກໂຄງການ ດັ່ງກ່າວ ຂອງໄທ ຈະເປັນເວລາ 27 ປີ ໃນຣາຄາ unit ລະ 2 ບາດ 30 ສະຕາງ.

ໃນຂນະດຽວກັນ ຣັຖບານໄທ ຍັງໄດ້ຕົກລົງ ເຫັນພ້ອມ ຕໍ່ຂໍ້ສເນີ ຂອງ ການໄຟຟ້າ ຝ່າຍຜລິດ ແຫ່ງປະເທດໄທ ທີ່ຢາກສ້າງ ຕັ້ງໂຄງການ ຜລິດໄຟຟ້າ ດ້ວຍຖ່ານຫີນ ໃນໄທ ດ້ວຍຄ່າໃຊ້ຈ່າຍ ຂອງ ໂຕເອງ ແຕ່ສັ່ງໃຫ້ ຫລຸດຜ່ອນ ກຳລັງ ຜລິດລົງ ໃຫ້ມີພຽງແຕ່ 4 ພັນ ເມກາວັດ ເທົ່ານັ້ນ ຮ່ວມທັງໃຫ້ ປະຊາສຳພັນ ຊາວບ້ານ ທ້ອງຖີ່ນ ກ່ຽວກັບ ຄວາມຕ້ອງການ ແລະ ຈຳເປັນ ໃນການໃຊ້ ໄຟຟ້າ ຂອງ ຣັຖບານ ໃນການສ້າງ ຕັ້ງໂຮງງານ ຜລິດໄຟຟ້າ ດ້ວຍຖ່ານຫີນ ໃນອະນາຄົດ. ໂຄງການ ແຫ່ງທຳອິດ ຈະສາມາດ ຈ່າຍກະແສ ໄຟຟ້າ ໄດ້ ໃນປີ 2018.