ໂຮງໝໍແຫ່ງໃໝ່ ໃນແຂວງຊຽງຂວາງ

ເມື່ອວັນທີ່ 25 ພຶສພາ ຜ່ານມາ ໄດ້ມີພິທີ ວາງສີລາເຣິກ ສ້າງໂຮງໝໍ ຢູ່ເມືອງຜາໄຊ ແລະ ເມືອງພູກູດ ແຂວງຊຽງຂວາງ ທັງສອງແຫ່ງ ເປັນໂຄງການ ຊ່ວຍເຫລືອ ເພື່ອມະນຸສທັມ ໃນລາວ ຂອງ ຣັຖບານ ສະຫະຣັຖ ອະເມຣິກາ ແລະ ກອງບັນຊາການ ທະຫານ ສະຫະຣັຖ ປະຈໍາພາກພື້ນ ປາຊີຝິກ. ເຂົ້າຮ່ວມໃນ ພິທີ່ດັ່ງກ່າວ ມີຜູ້ຕາງໜ້າ ຂອງລາວ ທັງຝ່າຍທະຫານ ແລະ ພົລເຣືອນ ຈາກ ສູນກາງ ແລະທ້ອງຖິ່ນ. ເຈົ້າໜ້າທີ່ ຝ່າຍສະຫະຣັຖ ກໍມີທ່ານ ພັນຕຣີ James McAden ນັກການທູດ ທະຫານ ປະຈໍາລາວ ແລະ ເຈົ້າໜ້າທີ່ ຈາກ ສະຖານທູດ ສະຫະຣັດ ອະເມຣິກາ ປະຈໍາລາວ ທີ່ເປັນແຫຼ່ງຂ່າວ ແລະ ໄດ້ແຈ້ງໃຫ້ຊາບວ່າ ອາຄານ ໂຮງໝໍ 2 ແຫ່ງນີ້ ເປັນການຊ່ວຍເຫລືອ ໃນນາມຂອງ ປະຊາຊົນ ອະເມຣິກັນ ເພື່ອສະແດງ ຄວາມຮູ້ບຸນຄຸນ ຕໍ່ຣັຖບານ ແລະ ປະຊາຊົນ ແຂວງ ຊຽງຂວາງ ທີ່ຊ່ວຍເຫລືອ ໃຫ້ຄວາມຮ່ວມມື ໃນການ ຊອກຄົ້ນຫາ ຊາກກະດູກ ຂອງທະຫານ ອະເມຣິກັນ ທີ່ຫາຍສາບສູນ ໃນປາງສົງຄາມ ອິນໂດຈີນ.

ສະຖານທູດ ສະຫະຣັຖ ແລະ ກອງບັນຊາການ ທະຫານ ສະຫະຣັຖ ປະຈໍາພາກພື້ນ ປາຊີຝິກ ໄດ້ໃຫ້ການ ຊ່ວຍເຫລືອ ເພື່ອມະນຸສທັມ ຫລາຍໂຄງການ ຢູ່ໃນເຂດ ຊົນນະບົດ ຂອງລາວ ໃນລະຍະ ກວ່າ 15  ປີ ທີ່ຜ່ານມາ ຣ່ວມທັງ ການສ້າງອາຄານ ໂຮງຮຽນ ຊັ້ນປະຖົມ ຫ້ອງກວດ ແລະ ປິ່ນປົວຄົນເຈັບ ຣະບົບ ຊົລປະທານ ຣະບົບ ນໍ້າສະອາດ. ໂຄງການກໍ່ສ້າງ ທີ່ກ່າວມານີ້ ເປັນສ່ວນນື່ງ ຂອງໂຄງການ ຊ່ວຍເຫລືອ ເພື່ອ ມະນຸສທັມ ທັງໝົດ 8 ໂຄງການ ທີ່ຈະຊ່ວຍເຫລືອ ສປປລາວ ໃນປີນີ້ ຄິດເປັນ ມູນຄ່າລວມ $3.5 ລ້ານ.