ຖ້າຫາກວ່າ ເຈົ້າໜ້າທີ່ ກວດພົບ ຄົນງານ ຕ່າງດ້າວ ຄົນໃດ ທີ່ເຂົ້າມາ ເຮັດວຽກ ແບບບໍ່ຖືກຕ້ອງ ຕາມກົດໝາຍ ຄົນນັ້ນ ຈະຖືກປັບໃໝ ຜູ້ລະ 250 ໂດລາ ສະຫະຣັຖ. ແຕ່ເຈົ້າໜ້າທີ່ ບໍ່ໄດ້ອະທິບາຍ ຢ່າງລະອຽດ ວ່າ ມີການລົງໂທດ ຫລື ສົ່ງກັບຄືນ ປະເທດ ຫລືບໍ່. ສາເຫດ ທີ່ແຂວງຈໍາປາສັກ ມີນະໂຍບາຍ ເຂັ້ມງວດ ເພື່ອກວດຂັນ ຄົນງານ ຕ່າງດ້າວ ກໍເພາະວ່າ ໃນປັດຈຸບັນນີ້ ມີນັກລົງທືນ ຕ່າງປະເທດ, ໂດຍສະເພາະ ວຽດນາມ ໄດ້ມາ ລົງທືນ ປູກຕົ້ນຢາງພາຣາ ປູກຕົ້ນກາເຟ ອັນເຮັດໃຫ້ ຄົນງານ ຈາກວຽດນາມ ຈໍານວນນື່ງ ເຂົ້າມາເຮັດວຽກ ໃນແຂວງຫລາຍຂື້ນ.
ແຫ່ລງຂ່າວນີ້ ອະທິບາຍວ່າ ສໍາລັບ ນັກທຸຣະກິດ ທີ່ຕ້ອງການ ນໍາເອົາ ຄົນງານ ຕ່າງດ້າວ ເຂົ້າມາເຮັດວຽກ ໃນແຂວງ ຢ່າງຖືກຕ້ອງ ຕາມກົດໝາຍ ຈະຕ້ອງເຮັດໜັງສື ຂໍອະນຸຍາດ ຈາກຜະແນກ ແຮງງານແຂວງເສັຽກ່ອນ ເພື່ອວ່າ ທາງແຂວງ ຈະໄດ້ສະເໜີ ໄປຍັງ ທາງກະຊວງ ເພື່ອພິຈາຣະນາ.
ສ່ວນ ຄົນຕ່າງປະເທດ ທີ່ລັກລອບເຂົ້າມາ ປະກອບ ອາຊີບ ຄ້າຂາຍຍ່ອຍ ນັ້ນ ຖ້າວ່າ ເຈົ້າໜ້າທີ່ ກວດເຫັນ ກໍຈະຖືກຈັບ ໃນທັນທີ. ແຕ່ເຖິງຢ່າງໃດ ກໍດີ, ທ່ານວ່າ ໃນເບື້ອງຕົ້ນ ນັ້ນ ທາງແຂວງ ຈະຕ້ອງ ໄດ້ເຊີນ ເຈົ້າໜ້າທີ່ ກົງສູນ ຂອງແຕ່ລະປະເທດ ເພື່ອຟັງ ຄໍາຊີ້ແຈງ ກ່ອນທາງແຂວງ ຈະດໍາເນີນມາຕະການ ດັ່ງກ່າວນີ້.
ປັດຈຸບັນນີ້ ມີຊາວວຽດນາມ ຊາວຈີນ ເຂົ້າໄປ ເຮັດວຽກຢູ່ໃນ ແຂວງຈໍາປາສັກ ເປັນຈໍານວນ ມາກມາຍ ມີທັງເຮັດວຽກ ຢູ່ໃນສວນຢາງພາຣາ ສວນກາເຟ, ນອກນັ້ນ ກໍທໍາ ການຄ້າຂາຍຍ່ອຍ.