ຄ່າເງິນກີບສູງ ພາສີເພີ້ມ ບໍຣິສັດຕັດຫຍິບ ຮ້ອງທຸກ

ນັກທຸຣະກິດ ອຸດສາຫະກັມ ຕັດຫຍິບ ຂອງລາວ ຮຽກຮ້ອງໃຫ້ ຣັຖບານຫລຸດຄ່າ ເງິນກີບລົງເປັນ 9,000 ກີບຕໍ່ 1ໂດລາ ສະຫະຣັຖ ຈາກ 8,469 ກີບ ໂດຍໃຫ້ເຫດຜົນ ວ່າ ບໍຣິສັດ ຫລາຍແຫ່ງຈະຕ້ອງ ຖືກບັງຄັບໃຫ້ ປິດກິຈການ ເພາະ ບໍ່ສາມາດ ແບກຫາບຕົ້ນທຶນ ໃນການຜລິດ ທີ່ເພີ້ມຂື້ນ ຍ້ອນການແຂງຄ່າ ຂອງເງິນກີບ. ທ່ານ ອ່ອນສີ ບຸດສີວົງສັກ ປະທານ ສະມາຄົມ ອຸດສາຫະກັມ ຕັດຫຍິບລາວ ເວົ້າວ່າ:

ຍ້ອນປັດໃຈ ດັ່ງກ່າວ ພາຍໃນປີ 2009 ຜ່ານມາໂຮງງານ ຕັດຫຍິບ 7 ແຫ່ງໄດ້ປິດ ກິຈການລົງ ແລະ ຍັງເຫລືອພຽງແຕ່ 50 ແຫ່ງ ທີ່ຍັງດຳເນີນ ກິຈການຢູ່. ນອກຈາກນີ້ ໂຮງງານ ຂນາດນ້ອຍ 13 ແຫ່ງ ທີ່ຜລິດໃຫ້ ໂຮງງານສົ່ງອອກ ກໍໄດ້ປິດລົງ. ໃນເວລາດຽວກັນ ກໍມີຫລາຍ ໂຮງງານ ທີ່ປ່ຽນໃຫ້ ຊາວຕ່າງດ້າວ ເຊົ່າກິຈການ ແລະ ອີກຈຳນວນນຶ່ງ ທີ່ກຳລັງສ່ຽງຕໍ່ ການລົ້ມລະລາຍ.

ບໍ່ພຽງແຕ່ໄດ້ ຮຽກຮ້ອງໃຫ້ ຣັຖບານ ຫລຸດຄ່າ ເງິນກີບລົງທໍ່ນັ້ນ ແຕ່ຍັງຮຽກຮ້ອງ ໃຫ້ຣັຖບານ ຍົກເວັ້ນ ການເກັບອາກອນ ມູນຄ່າເພີ້ມ 10 ສ່ວນຮ້ອຍອີກ. ໃນຂະນະດຽວກັນ ທ່ານ ພູເພັດ ຄຳພູນວົງ ຜູ້ຈັດການ ທະນາຄານ ແຫ່ງຊາດລາວ ກໍໄດ້ອອກມາ ປະຕິເສດ ຕໍ່ຄຳຮຽກຮ້ອງ ໂດຍອ້າງວ່າຍ້ອນ ນະໂຍບາຍ ຂອງຣັຖບານ ທີ່ຮັກສາຄ່າ ຂອງເງິນກີບ ໃຫ້ມີອັດຕຣາ ປ່ຽນແປງເຄື່ອນໄຫວ ບໍ່ເກີນ 2 ສ່ວນຮ້ອຍ ເພື່ອບໍ່ໃຫ້ ກະທົບກະເທືອນ ຕໍ່ການນຳເຂົ້າ ສິນຄ້າ ຈາກຕ່າງປະເທດ.

ນອກຈາກຈະ ບໍ່ຍອມຫລຸດຄ່າ ຂອງເງິນກີບແລ້ວ ທາງຣັຖບານ ໄດ້ປະກາດ ຈະໃຫ້ການ ຊ່ອຍເຫລືອ ແກ້ໄຂບັນຫາ ຕ່າງໆຂອງ ໂຮງງານຕັດຫຍິບ ຈົນຮອດທ້າຍປີ 2010 ເພື່ອບໍ່ໃຫ້ມີ ການປິດໂຮງງານ ທີ່ຈະກໍ່ໃຫ້ເກີດ ຄົນຫວ່າງງານ ເພີ້ມຂື້ນອີກ. ທາງຝ່າຍ ອຸດສາຫະກັມ ຕັດຫຍິບລາວ ຍັງບໍ່ແນ່ໃຈວ່າ ທາງພາກຣັຖ ຈະຊ່ອຍເຫລືອ ແນວໃດ ເພາະຍັງບໍ່ທັນ ມີມາຕການ ແລະ ວິທີການທີ່ ແຈ່ມແຈ້ງເທື່ອ ດັ່ງນັ້ນ ຊະຕາກັມຂອງ ອຸດສາຫະກັມ ຕັດຫຍິບລາວ ຈະເປັນແນວໃດ ກໍບໍ່ມີໃຜ ຈະຕອບໄດ້ເທື່ອ.