ນາຍົກລາວເປັນຫ່ວງ ເຫດການໃນໄທ

ທ່ານ ບົວສອນ ບຸບຜາວັນ ນາຍົກຣັຖມົນຕຣີ ສປປລາວ ຊຶ່ງຢູ່ໃນລະຫວ່າງ ການເດີນທາງ ຢ້ຽມຢາມ ປະເທດຍີ່ປຸ່ນ ໄດ້ກ່າວໃນກອງ ປະຊຸມ ທຸຣະກິດ ໃນນະຄອນ ຫລວງໂຕກຽວ ປະເທດຍີ່ປຸ່ນ ໃນມື້ວັນ ພຣະຫັດທີ 20 ພຶສພາ 2010 ສະແດງເຖິງຄວາມ ກັງວົນ ຕໍ່ກໍຣະນີ ຄວາມວຸ້ນວາຍ ທາງການເມືອງໃນໄທ ຍ້ອນເຫັນວ່າ ໄທ ເປັນປະຕູສຳລັບ ການຄ້າຂາຍ ແລະການເດີນທາງ ທີ່ສຳຄັນຂອງລາວ.

ນາຍົກຣັຖມົນຕຣີ ສປປລາວ ກ່າວວ່າບັນຫາ ການບໍ່ມີ ສະເຖັຍຣະພາບ ທາງການເມືອງໃນໄທ ສ້າງຄວາມ ວິຕົກກັງວົນ ຢ່າງຫລວງຫລາຍ ໃຫ້ ລາວ ຍ້ອນວ່າທັງສອງ ປະເທດ ມີເຂດຊາຍແດນ ຕິດຕໍ່ກັນ ແລະ ສປປລາວ ກໍໃຊ້ທ່າເຮືອ ຂອງໄທໃນການ ຂົນສົ່ງສິນຄ້າ ເຂົ້າແລະອອກ ດັ່ງນັ້ນລາວຈຶ່ງ ໄດ້ຮັບຜົນກະທົບ ໂດຍກົງ.

ນາຍົກຣັຖມົນຕຣີ ສປປລາວ ໄດ້ຮຽກຮ້ອງໃຫ້ ທຸກຝ່າຍທີ່ກ່ຽວຂ້ອງ ໃນການສ້າງບັນຫາ ຄວາມວຸ້ນວາຍ ຫາຊ່ອງທາງຕົກລົງກັນ ໃຫ້ໄດ້ໂດຍໄວ ເພາະບັນຫາຄວາມ ວຸ້ນວາຍທາງການ ເມືອງໃນໄທ ນອກຈາກ ຈະກະທົບກະເທືອນ ຕໍ່ສະພາບຄວາມ ສງົບຂອງໄທແລ້ວ ຍັງຈະກະທົບ ຕໍ່ຄວາມມີ ສະເຖັຍຣະພາບ ໃນກຸ່ມອາຊຽນອີກ.

ບໍຣິສັດນຳເຂົ້າ ແລະ ສົ່ງອອກຂອງລາວ ສ່ວນໃຫຍ່ຈະໃຊ້ ທ່າເຮືອແຫລມສະບັງ ຂອງໄທເປັນທາງ ຜ່ານຂອງສິນຄ້າ. ຫາກບັນຫາຄວາມ ບໍ່ສງົບໃນໄທ ຍືດເຍື້ອອອກ ໄປກໍຈະສ້າງຄວາມ ເສັຍຫາຍໃຫ້ ບໍຣິສັດນຳເຂົ້າ ແລະ ສົ່ງອອກຂອງລາວ ໃນອະນາຄົດ ຢ່າງແນ່ນອນ.