ໃນລະຍະຜ່ານມາ, ແຂວງຫລວງພຣະບາງ ຖືເປັນ ແຂວງນຶ່ງ ທີ່ກໍາລັງໄດ້ຮັບ ຜົນສະທ້ອນ ຈາກບັນຫາ ທັມມະຊາດ ທີ່ປ່ຽນແປງ ໄປຫລາຍຢ່າງ, ທັ້ງນີ້ ເປັນຜົນໂດຍກົງ ມາຈາກສະພາບ ພື້ນທີ່ປ່າໄມ້ ຂອງແຂວງດັ່ງກ່າວ ທີ່ຫລຸດລົງ ຢ່າງຕໍ່ເນື່ອງ. ດັ່ງນັ້ນ ທາງການແຂວງ ຈຶ່ງໄດ້ທົບທວນ ບັນຫານີ້ ແລະ ວາງແຜນການ ເອົາຈິງເອົາຈັງ ເພື່ອຊຸກຍູ້ ໃຫ້ພື້ນທີ່ ປ່າໄມ້ ຂຍາຍໂຕ ປົກຄຸມແຂວງນີ້ ໃຫ້ຫລາຍຂຶ້ນ. ທ່ານ ຊ້າງ ຊະນະຜົນ, ຫົວໜ້າ ຂແນງການ ປ່າໄມ້ ແຂວງຫລວງພຣະບາງ, ຊີ້ແຈງ ວ່າ:
“ຖືວ່າ ຫລວງພຣະບາງນີ້ ຄັ້ນຊິເວົ້າ ເຣື້ອງ ການປົກຄຸມ ປ່າທັມມະຊາດນີ້ ມັນຖືວ່າ ຫລຸດລົງ ປະມານ ເຫລືອຢູ່ 24 ສ່ວນຮ້ອຍ, ເຫັນໄດ້ຊັດ ຍ້ອນຖືວ່າ ອຸນນະພູມ ນີ້ແຫລະ ຢາກຮ້ອນຂຶ້ນ ບາງເທື່ອ ຝົນກໍ ຄາດຄະເນໄດ້ ດຽວນີ້ ພວກເຮົາ ກໍໄດ້ ມີແຜນການ ຟື້ນຟູ ເຊັ່ນໂຕຢ່າງ ກໍມີ ການຊຸກຍູ້ ສົ່ງເສີມ ການປູກໄມ້ ນີ້ແຫລະ ໝາຍຄວາມວ່າ ປີ 2010 ໃຫ້ມັນໄດ້ ຢູ່ 30 ສ່ວນຮ້ອຍ.”
ຍ້ອນ ການຕັດໄມ້ ທໍາລາຍປ່າ ຈາກໂຄງການ ພັທນາ ຕ່າງໆ, ຮວມໄປເຖິງ ການຖາງປ່າ ເຮັດໄຮ່ ແບບຊະຊາຍ ຂອງຊາວບ້ານ ເປັນສາເຫດ ສໍາຄັນ ທີ່ເຮັດໃຫ້ພື້ນທີ່ປ່າໄມ້ ຂອງແຂວງຫລວງພຣະບາງ ເຫລືອ ພຽງແຕ່ 24 ສ່ວນຮ້ອຍ ເທົ່ານັ້ນ, ຈາກເດີມ ທີ່ເຄີຍປົກຄຸມ ຢູ່ປະມານ 40 ສ່ວນຮ້ອຍ.
ດັ່ງນັ້ນ, ທາງການແຂວງ ຈຶ່ງໄດ້ຣະດົມ ທຸກພາກສ່ວນ ໃຫ້ຊ່ອຍກັນ ໃນການອະນຸຮັກ ແລະ ຟື້ນຟູ ສະພາບປ່າໄມ້ ໃຫ້ກັບມາດີຂຶ້ນ, ພ້ອມທັງ ພະຍາຍາມ ຍຸຕິ ການຖາງປ່າ ຂອງຊາວບ້ານ, ການຈໍາກັດ ໂຄຕາ ຂຸດຄົ້ນໄມ້ ໃນແຕ່ລະປີ, ການກວດ ການສະກັດກັ້ນ ການຂຸດຄົ້ນໄມ້ເຖື່ອນ, ການມອບດິນ ມອບປ່າ ໃຫ້ປະຊາຊົນ ເປັນຜູ້ຄຸ້ມຄອງ ແລະ ນໍາໃຊ້ ທີ່ສໍາຄັນ ຄື ການສົ່ງເສີມ ການປູກປ່າ ກ້າເບັ້ຍໄມ້ ຂຶ້ນມາທົດແທນ, ໂດຍສະເພາະ, ໂຄງການ ປູກໄມ້ສັກ, ຢາງພາລາ, ໄມ້ເກສນາ ແລະ ໝາກນໍ້າມັນ, ຊຶ່ງຖືວ່າ ເປັນໄມ້ ຢືນຕົ້ນ ທີ່ມີຄຸນຄ້າ ທາງເສຖກິດ.
ຕາມຍຸທສາດ ໃນປີ 2010 ນີ້, ທາງແຂວງ ຈະສູ້ຊົນ ຟື້ນຟູ ພື້ນທີ່ປ່າໄມ້ ໃຫ້ເພີ້ມຂຶ້ນ 30 ສ່ວນຮ້ອຍ ແລະ ປີ 2020 ໃຫ້ໄດ້ 54 ສ່ວນຮ້ອຍ ຂອງເນື້ອທີ່ແຂວງ ທັງໝົດ, ຊຶ່ງເຣື້ອງນີ້ ຖ້າຫາກ ມີການທຸ່ມເທ ເອົາໃຈໃສ່ ຢ່າງແທ້ຈິງ, ກໍຖືເປັນ ແຜນການ ທີ່ດີ ຕໍ່ການປົກປັກ ຮັກສາ ສະພາບແວດລ້ອມ ໃຫ້ຄົງຢູ່ ຢ່າງຢືນຢົງ. ອີກທັ້ງ ຍັງດີ ຕໍ່ການສົ່ງເສີມ ບັນຍາກາດ ການທ່ອງທ່ຽວ ໃຫ້ແກ່ແຂວງ ດັ່ງກ່າວ ນໍາອີກ.