ທ່ານ Benedict Bingham ຜູ້ຕາງໜ້າ ກອງເງິນທຶນສາກົນ ຫລື IMF ຢູ່ນະຄອນຫລວງ ວຽງຈັນ ຣາຍງານ ເມື່ອບໍ່ດົນ ຜ່ານມາວ່າ ເສຖກິດ ຂອງໂລກ ທີ່ກຳລັງຕົກຕ່ຳ ຢູ່ໃນປັດຈຸບັນ ໄດ້ສົ່ງຜົນກະທົບ ຕໍ່ການສົ່ງເງິນ ຂອງຊາວລາວ ທີ່ອາໃສ ຢູ່ຕ່າງປະເທດ ໄປໃຫ້ພໍ່ແມ່ພີ່ນ້ອງ ຢູ່ລາວ ຢ່າງແຮງ.
ຊາວອົບພະຍົບລາວ ທີ່ອາໃສ ຢູ່ໃນປະເທດ ທີ່ຈະເຣີນ ກໍສົ່ງເງິນ ໄປໃຫ້ພໍ່ແມ່ພີ່ນ້ອງ ຢູ່ລາວ ໜ້ອຍລົງ ແລະ ຄົນງານລາວ ທີ່ເຮັດວຽກ ຢູ່ໄທ ແລະ ປະເທດອື່ນໆ ກໍສົ່ງເງິນກັບບ້ານ ຫລຸດໜ້ອຍ ຖອຍລົງ ເຊັ່ນກັນ.
ທ່ານ Bingham ກ່າວອີກວ່າ ເງິນທີ່ ຊາວລາວຕ່າງປະເທດ ສົ່ງໄປລາວນີ້ ເປັນຈຳນວນເງິນ ທີ່ມະຫາສານ ແລະ ກໍເປັນຣາຍໄດ້ ແຫລ່ງທີ່ສຳຄັນ ຂອງປະຊາຊົນລາວ. ພໍ່ແມ່ພີ່ນ້ອງ ຜູ້ຢູ່ລາວ ຫລາຍໆຄົນ ອາໃສ ເງິນຊ່ວຍເຫລືອ ຈາກພີ່ນ້ອງ ຢູ່ຕ່າງປະເທດ ເພື່ອລົງທຶນ ເຮັດທຸຣະກິດ ການຄ້າ ແລະ ເພື່ອປຸກສ້າງເຮືອນ ບ່ອນຢູ່ອາໃສ.
ເຈົ້າໜ້າທີ່ ກອງເງິນທຶນສາກົນ ທ່ານນີ້ ບໍ່ໄດ້ແຈ້ງ ຣາຍລະອຽດ ວ່າ ເງິນທີ່ຊາວລາວ ຕ່າງປະເທດ ສົ່ງໄປໃຫ້ພໍ່ແມ່ພີ່ນ້ອງ ຢູ່ລາວນັ້ນ ມີຈຳນວນເທົ່າໃດແທ້ ໃນແຕ່ລະປີ ເວົ້າພຽງ ແຕ່ວ່າ ເປັນຈຳນວນເງິນ ອັນຫລວງຫລາຍ.
ນອກຈາກ ຈະສົ່ງເງິນ ໄປໃຫ້ພີ່ນ້ອງ ຢູ່ລາວແລ້ວ ຊາວລາວ ຢູ່ຕ່າງປະເທດ ຍັງໄປຢ້ຽມຢາມ ພີ່ນ້ອງແລະ ບ້ານເກີດເມືອງນອນ ເລື້ອຍໆ; ແຕ່ເນື່ອງຈາກ ເສຖກິດ ກຳລັງຕົກຕ່ຳ ເປັນຕົ້ນ ຊາວລາວ ທີ່ອາໃສຢູ່ສະຫະຣັຖ ອາດຈະສົ່ງເງິນ ແລະ ໄປຢ້ຽມຢາມລາວ ໜ້ອຍລົງ. ທາງການລາວເອງ ກໍຍອມຮັບວ່າ ການທ່ອງທ່ຽວ ແລະ ຣາຍໄດ້ ຈາກການທ່ອງທ່ຽວ ໄດ້ຫລຸດໜ້ອຍຖອຍລົງ ຢ່າງຜິດສັງເກດ ໃນຣະຍະຫ້າຫົກເດືອນ ທີ່ຜ່ານມາ. ເມື່ອປີກາຍ ສປປລາວ ມີຣາຍໄດ້ ຈາກການທ່ອງທ່ຽວ ເຖິງ 120 ລ້ານດອນລ່າສະຫະຣັຖ.