ຫລາຍບໍຣິສັດລົງທຶນ ຫລີກລ້ຽງ ການສໍາຣວດ ສະພາບແວດລ້ອມ
2010.03.05
ນັກທຸຣະກິດ ທັງພາຍໃນ ແລະ ຕ່າງປະເທດ ຈຳນວນນຶ່ງ ທີ່ເຂົ້າມາລົງທຶນ
ຢູ່ປະເທດລາວ ພະຍາຍາມ ຫລີກລ້ຽງ ທີ່ຈະເຮັດບົດວິພາກ ທາງດ້ານສິ່ງແວດລ້ອມ
ຊຶ່ງເປັນຂໍ້ກຳນົດ ຂອງຣັຖບານ ໂດຍອາໃສ ຊ່ອງທາງ ຈ້າງບໍຣິສັດ ທີ່ປຶກສາດ້ານສິ່ງແວດລ້ອມ
ໃຫ້ອອກໃບຮັບຮອງໃຫ້ ໂດຍທີ່ບໍ່ມີການສຳຫລວດກວດກາ ສະພາບພື້ນທີ່ ຕົວຈິງ ດັ່ງຕົວແທນບໍຣິສັດ
ທີ່ປຶກສາ ດ້ານສິ່ງແວດລ້ອມ ແຫ່ງນຶ່ງ ຢູ່ລາວ ເວົ້າວ່າ:
”ບາງນາຍທຶນມານີ້ ບາງເທື່ອບໍ່ຢາກເຮັດຮອດ EIA ມາຫາຂ້າພະເຈົ້າເອງນີ້ວ່າ ເອີຂ້ອຍສິຈ່າຍໃຫ້ເຈົ້ານຳ ຕັ້ງແຕ່ໄດ້ໃບຮັບຮອງເພີ່ນນີ້ນ່ະ ຂ້ອຍບໍ່ເອົາດອກຄຸນນະພາບອີ່ຫຍັງຕ່າງໆແຕ່ຫາກເຮົາເຮັດບໍ່ໄດ້.”
ທ່ານວ່າ ຣັຖບານ ໄດ້ກຳນົດ ໃຫ້ບໍຣິສັດ ທີ່ເຂົ້າມາລົງທຶນ ໃນໂຄງການຕ່າງໆ ທີ່ຈະໃຊ້ຊັພຍາກອນ ທຳມະຊາດ ໃນທົ່ວປະເທດລາວ ຕ້ອງມີການສຳຫລວດ ແລະ ເຮັດບົດວິພາກ ດ້ານສິ່ງແວດລ້ອມ ເບິ່ງກ່ອນວ່າ ມີຜົນກະທົບ ຫລືບໍ່ ກ່ອນຈະມີການອະນຸມັດໃຫ້ ໂຄງການນັ້ນໆ.
ແຕ່ກໍມີບາງບໍຣິສັດ ທີ່ຄິດເຫັນ ແຕ່ຜົນປະໂຫຍດ ຂອງຕົນ ໄດ້ອາໃສຊ່ອງທາງ ທີ່ບໍ່ຖືກຕ້ອງ ເພື່ອເຮັດໃຫ້ໂຄງການ ຂອງຕົນ ໄດ້ຮັບການປະຕິບັດ. ດັ່ງນັ້ນ ຈຶ່ງມີຄວາມຈຳເປັນ ທີ່ຈະຕ້ອງກວດກາກັນ ຄັກແນ່. ກ່ຽວກັບເລື່ອງນີ້ ຕົວແທນບໍຣິສັດ ທ່ານດຽວກັນນີ້ ເວົ້າວ່າ:
”ແຕ່ພວກນາຍທຶນ ຫລືວ່າຜູ້ລົງທຶນຫັ້ນ ເຂົາປະຕິບັດຕາມສັນຍາຫລືບໍ່ ລາງເທື່ອມັນກະເຮັດແນວໃດ ມັນຢາກຈ່າຍໜ້ອຍ ມັນກໍບໍ່ປະຕິບັດຕາມນັ້ນ ຖ້າຫາກວ່າເຮົາບໍ່ຕິດຕາມກວດກາ ຄົນລາວເຮົາ ກະບາງເທື່ອກໍໃຈສະບາຍ ເຂົາບໍ່ເຮັດແລ້ວກໍແລ້ວ ເຮົາເວົ້າກັນແລ້ວ.”
ທ່ານວ່າ ການຕິດຕາມກວດກາ ໂຄງການພັທນາ ຢູ່ລາວ ມີຄວາມສຳຄັນຫລາຍ ເພາະວ່າ ເຖິງວ່າ ມັນຈະມີຜົນດີ ຕໍ່ການພັທນາເສຖກິດ ແຕ່ຫາກມີຜົນຮ້າຍ ຕໍ່ສິ່ງແວດລ້ອມ ກໍຈະກາຍເປັນໄພຂົ່ມຂູ່ ຕໍ່ສະພາບແວດລ້ອມ ໃນອະນາຄົດ.