ຣັດຖະບານລາວ ມີແຜນການ ທີ່ຈະນໍາສເນີ ຮ່າງກົດໝາຍ ຊື່ມວນຊົນ ຕໍ່ກອງປະຊຸມສະພາ ທີ່ຈະມາເຖີງນີ້

ທ່ານ ບໍ່ແສງຄໍາ ວົງດາຣາ ຣັດຖະມົນຕຣີຊ່ວຍວ່າການກະຊວງຖະແຫລງຂ່າວ ແລະວັດທະນະທໍາ ໄດ້ກ່າວເຖີງຄວາມຮຽກຮ້ອງຕ້ອງການ ມີກົດໝາຍຊື່ມວນຊົນວ່າ ໃນໄລຍະທີ່ຜ່ານມາ ລາວມີຣະບຽບການແລະຂໍ້ກໍານົດ ຈໍານວນນຶ່ງແລ້ວ ແຕ່ຍັງສ້າງຄວາມຫຍູ້ງຍາກໃນການຄຸ້ມຄອງ ແລະການເຂື່ອນໃຫວຂອງຊື່ມວນຊົນຢູ່ ເນື່ອງຈາກຂໍ້ກໍານົດເລົ່ານັ້ນ ຍັງບໍ່ຮັດກຸມ-ຄົບຖ້ວນ.

ຍ້ອນແນວນັ້ນ ຊື່ມວນຊົນຈຶ່ງບໍ່ສາມາດເສີມຂະຫຍາຍຄຸນປະ ໂຫຍດ ແລະຂອບເຂດການເຂື່ອນໃຫວຂອງຕົນ ໄດ້ຢ່າງຄົບຖ້ວນ-ຖືກຕ້ອງ ແລະວ່າຍ້ອນບໍ່ມີກົດໝາຍນັ້ນ ພັກ-ຣັດ-ບໍ່ມີເຄື່ອງມືຊີ້ນໍາແລະຄຸ້ມຄອງ ຊື່ມວນຊົນ, ປະຊາຊົນບໍ່ມີບ່ອນອີງເພື່ອໄຊ້ປະກອບຄໍາເຫັນ ຕໍານິຕິຊົມສະພາບການຕົວຈີງ ຂອງສັງຄົມລາວ.

ເມື່ອຕົ້ນເດືອນນີ້ ກະຊວງຖະແຫລງຂ່າວ-ວັດທະນະທໍາ ໄດ້ເຊີນຕົວແທນຊື່ມວນຊົນແລະ ເຈົ້າໜ້າທີ່ຈາກຂະແໜງການທີ່ກ່ຽວຂ້ອງ ມາເຂົ້າຮ່ວມປະຊຸມກັນເພື່ອຄົ້ນຄ້ວາ ປະກອບຄໍາເຫັນໃສ່ຮ່າງກົດໝາຍດັ່ງກ່າວ ທີ່ປະກອບດ້ວຍ8ໝວດ 45ມາຕການ ຊຶ່ງເຊື່ອກັນວ່າ ຄົງຈະມີເນື້ອໃນສົມບູນຄົບຖ້ວນ ເພື່ອຈະນໍາສະເນີຕໍ່ກອງປະຊຸມສະພາ ແຫ່ງຊາດຊຸດທີ6 ສະໃໝສາມັນຄັ້ງທີ5 ໃນເດືອນມິຖຸນາ2008ນີ້.

ຮ່າງກົດໝາຍຊື່ມວນຊົນ ໂດ້ຮັບການສ້າງຂຶ້ນໃນປີ 2001ໂດຍຜ່ານການປັບປຸງ ປ່ຽນແປງ ແກ້ໃຂມາແລ້ວຫລາຍຄັ້ງ ແລະສໍາເຣັດໂດຍພື້ນຖານ ໃນປີ2006. ແຕ່ໃນໄລຍະປີ 2007 ຮ່າງກົດໝາຍນີ້ບໍ່ໄດ້ຖືກນໍາເຂົ້າໄປຄົ້ນຄ້ວາ ແລະພິຈາຣະນາໃນກອງປະຊຸມ ສະພາແຫ່ງຊາດສະໃໝສາມັນຄັ້ງທີສາມ ແລະຄັ້ງທີສີ່ເລີຍ ດ້ວຍເຫດຜົນທີ່ບໍ່ຊັດເຈນຈາກອົງການທີ່ກ່ຽວຂ້ອງ.

ຫລາຍຫາງສຽງສັງຄົມ ວິຈານວ່າ ຮ່າງກົດໝາຍຊື່ມວນຊົນສະບັບນີ້ ຍັງແມ່ນການເອົາແນວທາງນະໂຍບາຍ ຂອງພັກໂດຍສະເພາະມະຕິວຽກງານແນວຄິດ ແລະມະຕິກົມການເມືອງ ກ່ຽວກັບການເພີ່ມທະວີການນໍາພາ ຂອງພັກແລະການຄຸ້ມຄອງຂອງຣັດ ຕໍ່ຊື່ມວນຊົນໃນໄລຍະໃໝ່ ໃຫ້ກາຍເປັນອັນລະອຽດ. ສະນັ້ນບົດບາດຂອງຊື່ມວນຊົນ ຕາມເນື້ອໃນຂອງຮ່າງກົດໝາຍດັ່ງກ່າວ ຄົງຈະບໍ່ມີການປ່ຽນແປງ ພໍເທົ່າໃດ.

ມະນີຈັນ ຣາຍງານ