ສປປລາວ ໄດ້ອານຸມັດການລົງທຶນ ຈາກຕ່າງປະເທດ ຈຳນວນ 191 ໂຄງການ ມີມູນຄ່າ ລວມທັງໝົດ 1,130 ລ້ານ ດອນລ້າ ສະຫະຣັຖ

ໃນ ປີ 2007 ຜ່ານມາ ສປປ ລາວໄດ້ອານຸມັດ ການລົງທຶນ ຈາກຕ່າງປະເທດ ຈຳນວນ 191 ໂຄງການ ມີມູນຄ່າລວມທັງໝົດ 1,130 ລ້ານ usd,

ຕາມສະຖິຕິຂອງກະຊວງວາງແຜນ ແລະການລົງທຶນຂອງລາວ. ໃນມູນຄ່າການລົງທຶນ ທັງໝົດນັ້ນ, 971 ລ້ານ ກັບ 410,000 usd ຫລືວ່າ 85.4%, ແມ່ນການລົງທຶນ ຈາກທຸຣະກີດ ຂອງຕ່າງປະເທດ, ສ່ວນເຫລືອ 166 ລ້ານ ໂດລາສະຫະຣັຖ ແມ່ນການລົງທຶນ ຈາກພາກສ່ວນເອກະຊົນ ໃນລາວເອງ.

ພາກສ່ວນພະລັງງານ ແລະບໍ່ແຮ່ທາດ ເປັນພາກສ່ວນທີ່ດຶງດູດເອົາ ການລົງທຶນ ຈາກຕ່າງປະເທດ ຫລາຍກ່ວາພາກສ່ວນອື່ນໆ ຄືມີມູນຄ່າເຖິງ 360 ລ້ານ ໂດລາສະຫະຣັຖ ສະເພາະແຕ່ 4 ໂຄງການເທົ່ານັ້ນ. ການລົງທຶນໃນ ພາກສ່ວນກະສິກັມ ມີເຖິງ 183 ລ້ານ ໂດລາສະຫະຣັຖ, ແລະພາກສ່ວນ ບໍຣິການມີມູນຄ່າ 181 ລ້ານ ໂດລາສະຫະຣັຖ. ນອກນັ້ນ ທາງການລາວ ຍັງໄດ້ລົງນາມສັນຍາ ເອກະສານຄວາມເຂົ້າໃຈກັນ ກັບປະເທດຈີນ ປະເທດໄທ ແລະປະເທດວຽດນາມ ເພື່ອສ້າງເຂື່ອນ ຜລິດກະແສໄຟຟ້າ ທີ່ມີມູນຄ່າເຖິງຫລາຍ ຕື້ໂດລາສະຫະຣັຖ.

ສົມເນ ຣາຍງານ