ຕຳຣວດປະເທດມາເລເຊັຽ ໄດ້ຈັບ ແລະ ຍຶດ ກັນຊາ 468 ກິໂລກຣາມ ແລະ ຢາບ້າ 10 ກິໂລກຣາມ ມູນຄ່າ 1.5 ລ້ານ ຣິງກິດ (Malaysian Ringgit ຫຼື RM ) ສະກຸນເງິນມາເລເຊັຽ ຫຼື ປະມານ 350,000 ໂດລາຣ໌ ແລະ ເຈົ້າໜ້າທີ່ມາເລເຊັຽເຊື່ອວ່າ ຢາເສບຕິດ ດັ່ງກ່າວ ມາຈາກເຂດສາຫຼ່ຽມຄຳ ໃນເຂດແດນຂອງປະເທດລາວ ຫຼັງຈາກທີ່ເຈົ້າໜ້າທີ່ຕຳຣວດ ຈັບໂຕຜູ້ຕ້ອງຫາໄດ້ 2 ຄົນ ຢູ່ ເມືອງ ກົວລາ ລັນເກດ.
ທ່ານ Mydin Pitchay ຜູ້ອຳນວຍການ ຜແນກຕຳຣວດສືບສວນອາຊຍາກຳ ແລະ ຢາເສບຕິດ ຂອງມາເລເຊັຽ ໄດ້ກ່າວວ່າ:
" ຜູ້ ຄ້າ ຢາ ໄດ້ ລັກ ລອບ ຂົນ ຢາ ເສບ ຕິດ ດ້ວຍ ທາງ ຣົ ຖ ເຂົ້າ ມາ ເຂດ ພາກ ເໜືອ ຂອງ ປະ ເທດ ມາ ເລ ເຊັຽ ທີ ມີ ຊາຍ ແດນ ຕິດ ກັບ ພາກ ໃຕ້ ຂອງ ປະ ເທດ ໄທ ຍ ກ່ອນ ທີ່ ຈະ ສົ່ງ ມາ ຂາຍ ໃຫ້ ລູກ ຄ້າ ໃນ ມາ ເລ ເຊັຽ ."
Mydin Pitchay ຍັງກ່າວຕື່ມອີກວ່າ:
" ຜ ແນກຕຳ ຣວດ ສືບ ສວນ ອາ ຊ ຍາ ກັມ ແລະ ຢາ ເສບ ຕິດ ຂອງ ມາ ເລ ເຊັຽ ໄດ້ ຍຶດ ຂອງ ກາງ ໄວ້ ແລະ ຢາ ເສບ ຕິດ ດັ່ງກ່າວ ຖືກ ລັກລອບ ຂົນ ມາ ຈາກ ປະ ເທດ ລາວ ."
ກັນຊາຖືກລັກລອບ ຂົນສົ່ງມາຈາກປະເທດລາວ ກ່ອນທີ່ຈະມາບັນຈຸໃສ່ຫໍ່ ແລະ ເກັບໄວ້ເພື່ອນຳອອກໄປຈຳໜ່າຍ ແຕ່ ຖືກເຈົ້າໜ້າທີ່ຕຳຣວດ ຈັບໄດ້ ຫຼັງຈາກທີ່ ໄດ້ຈັບຜູ້ຕ້ອງຫາໄດ້ 2 ຄົນ ຢູ່ ເມືອງ ກົວລາ ລັນເກດ ແລ້ວນຳໄປສູ່ການຈັບຂອງກາງທີ່ເປັນກັນຊາ ແລະ ຢາບ້າ ຢູ່ໃນເຮືອນຂອງຜູ້ຕ້ອງຫາ ໃນອາທິດນີ້.
Mydin Pitchay ໄດ້ກ່າວວ່າ:
" ເຈົ້າ ໜ້າ ທີ່ ເຊື່ອ ວ່າ ຢາ ເສບ ຕິດ ດັ່ງ ກ່າວ ລັກ ລອບມາ ທາງ ຣົ ຖ ຜ່ານ ຊາຍ ແດນ ປະ ເທດ ໄທ ຍ ."
ຜູ້ຕ້ອຫາທີ່ຊາວມາເລເຊັຽ ທີ່ຖືກຕຳຣວດຈັບໄດ້ ອາຍຸ 31 ປີ ແລະ 47 ປີ ທີ່ເປັນຜູ້ຈຳຂາຍກັນຊາ ແລະ ຢາບ້າ ນັບແຕ່ຕົ້ນເດືອນມີນາ ເປັນຕົ້ນມາ ຊຶ່ງຜູ້ຕ້ອງຫາຄົນນຶ່ງ ເຄີຍຖືກບັນທຶກວ່າພົວພັນອາຊຍາກັມ. ເຖິງຢ່າງໃດກໍຕາມ, ປັດຈຸບັນ ມີການດຳເນີນການ ແລະ ຕັດຊາ ໃນປະເທດລາວ ຕລອດປີ ຍ້ອນວ່າ ມີປູກໂດຍໃຊ້ລະບົບຊົລປະທານ ແລະ ຍ້ອນເຫດນັ້ນ ທາງການມາເລເຊັຽ ຈຶ່ງພົບວ່າ ຈຳນວນຢາເສບຕິດທີ່ເຈົ້າໜ້າທີ່ມາເລເຊັຽຍຶດມາໄດ້ ຖືກລັກລອບຂົນສົ່ງເຂົ້າມາ ທາງພາກເໜືອຂອງມາເລເຊັຽ.
ເຈົ້າໜ້າທີ່ຕຳຣວດ ມາເລເຊັຽກ່າວວ່າ:
" ລາ ຄາ ຢາ ເສບ ຕິດ ຂຶ້ ນ ກັບ ລະ ດັບ ຄຸ ນ ນະ ພາບ ແລະ ເກຼດ ຂອງ ຢາ ແລະ ຢູ່ ປະ ເທດ ມາ ເລ ເຊັຽ ມີ ຜູ້ ຕິດ ຢາ ເສບ ຕິດເກືອບ 1 ລ້ານ ຄົນ ."
ໃນເວລາດຽວກັນ, ສຳນັກຂ່າວ Benar News ກໍລາຍງານວ່າ ຍັງມີການຜລິດຢາເສບຕິດຢູ່ເຂດສາມຫຼ່ຽມຄຳ ເປັນຕົ້ນ ພະມ້າ, ລາວ ແລະ ໄທຍ ໂດຍສະເພາະ ມີການລັກລອບເອົາຢາເສບຕິດມາຈາກ ເຂດຣັຖສານ ຢູ່ປະເທດພະມ້າ ຊຶ່ງເປັນແຫຼ່ງຜລິດຢາບ້າທີ່ໃຫຍ່ ເພື່ອສົ່ງອອກຕລາດໂລກ ກ່ອນທີ່ຈະສົ່ງເຂົ້າໄປປະເທດມາເລເຊັຽ ທາງຣົຖ ແລະ ທາງເຮືອ.
ທ່ານ Mydin Pitchay ກ່າວວ່າ: ຜູ້ລັກລອບຂົນຢາເສບຕິດ ຈະຜ່ານທາງທະເລ ຈາກ ແຂວງສະຕູນ ປະເທດໄທຍ ໄປຫາ ເກາະລັງກາວີ, ຣັຖເກດາ, ແລະ ສົ່ງຕໍ່ໄປ ເກາະ ຣັດປູລໍ ແລະ ເກາະເທລັກຄຳບາ ກ່ອນທີ່ຈະເຂົ້າໄປ ເມືອງ ສັນໄກ ຈາວີ ຫຼື ກົວລາຈູລູ, ທີ່ຂຶ້ນກັບ ຣັຖ ປີນັງ.
ອີງຕາມທາງການຂອງມາເລເຊັຽ, ແຫຼ່ງຂອງຢາເສບຕິດ ທີ່ເຂົ້າມາເລເຊັຽ ດ້ວຍທາງທະເລ ແລະ ອາກາດ ແລະ ອີກດ້ານນຶ່ງ ກໍຄື ມີການຂົນສົ່ງຢາເສບຕິດທາງຣົຖ ໂດຍ ຜ່ານ ແຂວງນະຣາທິວາດຂອງໄທຍ ຜ່ານເມືອງຕາກໃບ ແລະ ສຸໄຫງໂກໂລກ ເຂົ້າໄປເມືອງ ທຳເພັດ ແລະ ຣັນຕູ, ຣັຖປານນັງຂອງມາເລເຊັຽ.
ສະເພາະການຍຶດ ແລະ ຈັບຢາເສບຕິດ ຢູ່ປະເທດລາວ.
ວັນທີ 17 ມີນາ 2022 ນີ້ ເຈົ້າໜ້າທີ່ ປກສ ແຂວງບໍ່ແກ້ວຍຶດຢາບ້າ ໄດ້ 45 ເປົາ ເກືອບ 12 ລ້ານເມັດ.
ໃນວັນທີ 3 ມີນາ 2022 ສານປະຊາຊົນ ນະຄອນຫລວງວຽງຈັນ ໄດ້ຕັດສິນປະຫານຊີວິດ ທ້າວ ສີສຸກ ດາວເຮືອງ ຈຳເລີຍທີ 1 ອາຍຸ 45 ປີ ໃນສະຖານະຄ້າຢາເສບຕິດ, ຟອກເງິນ ແລະ ຄ້າອາວຸດເສິກຣາຍໃຫຍ່ຂອງລາວ.
ທ້າວ ສີສຸກ ດາວເຮືອງ ອາຊີບທຸຣະກິດ ຢູ່ບ້ານຂຸນຕາທົ່ງ ເມືອງສີໂຄດຕະບອງ ນະຄອນຫລວງວຽງຈັນ ຖືກເຈົ້າໜ້າທີ່ ຕຳຣວດຈັບໄດ້ ໃນວັນທີ 1 ເມສາ 2017 ຢູ່ ແຂວງຫລວງພຣະບາງ.
ທ້າວ ສີສຸກ ດາວເຮືອງ ຖືກສານຕັດສິນປະຫານຊີວິດ ແລະ ພ້ອມດຽວກັນນັ້ນ ສານປະຊາຊົນນະຄອນຫລວງວຽງຈັນ ກໍໄດ້ສັ່ງຕັດສິນຈຳຄຸກນັກໂທດ ຜູ້ຮ່ວມຂະບວນການຂອງ ທ້າວ ສີສຸກ ອີກ 4 ຄົນ ປະກອບດ້ວຍ:
- ສັ່ງຕັດສິນຈຳຄຸກ 7 ປີ 3 ເດືອນ ທ້າວ ຜ່ອງສີ ນວນນີວົງ ຈຳເລີຍທີ 2 ອາຍຸ 44 ປີ ໃນສະຖານະມີຢາເສບຕິດໄວ້ຄອບຄອງ, ຟອກເງິນ, ຊື້ຊັບພົລເມືອງຜິດກົດໝາຍ ແລະ ໃຊ້ເອກສານປອມ.
- ສັ່ງຕັດສິນຈຳຄຸກ ຕລອດຊີວິດ ນາງ ອຸໄລວັນ ພາວິວົງກອນ ຈຳເລີຍທີ 3 ອາຍຸ 60 ປີ ໃນຖາສະນະຄ້າຂາຍຢາເສບຕິດ ແລະ ຟອກເງິນ.
- ສັ່ງຕັດສິນຈຳຄຸກ 7 ປີ ທ້າວ ທົງໄຊ ຈຳເລີຍທີ 4 ອາຍຸ 27 ປີ ໃນສະຖານະມີຢາເສບຕິດໄວ້ຄອບຄອງ ແລະ ມີອາວຸດເສິກໄວ້ ໃນຄອບຄອງ ບໍ່ຖືກຕ້ອງຕາມກົດໝາຍ.
- ສັ່ງຕັດສິນຈຳຄຸກ 4 ປີ 11 ເດືອນ 11 ວັນ ທ້າວ ວິປະກອນ ບຸບຜາປະເສີດ ຈຳເລີຍທີ 5 ອາຍຸ 28 ປີ ໃນສະຖານະຂາຍອາວຸດເສິກ ໂດຍບໍ່ໄດ້ຮັບອະນຸຍາດຕາມກົດໝາຍ.
ປັດຈຸບັນ ການຜລິດ ແລະ ການຄ້າຂາຍຢາເສບຕິດ ໄດ້ກາຍເປັນຂບວນການຂ້າມຊາດ ທີ່ຣັຖບານລາວ ຕ້ອງເລັ່ງສະກັດ ແລະ ປາບປາມ ຢ່າງເຂັ້ມງວດ ເພາະວ່າ ບັນຫາຢາເສບຕິດໃນລາວ ຍັງບໍ່ຫຼຸດລົງ ແລະ ມີທ່າອ່ຽງຂຍາຍໂຕຂຶ້ນຢ່າງຕໍ່ເນື່ອງ.
ໃນເດືອນກຸມພາ ທີ່ຜ່ານມາ, ກະຊວງປ້ອງກັນຄວາມສງົບຂອງລາວ ຂຶ້ນບັນຊີລາຍຊື່ ນັກຄ້າຢາເສບຕິດ ຈຳນວນ 2,000 ປາຍຄົນ ທີ່ຈະຕ້ອງເຝົ້າລະວັງ ແລະ ຕິດຕາມໂຕມາດຳເນີນຄະດີ ຊຶ່ງສ່ວນຫຼາຍແລ້ວ ຈະເປັນເຄືອຂ່າຍຂອງຂບວນການຄ້າຢາເສບຕິດຂ້າມຊາດ, ຜູ້ຕ້ອງຫາຄະດີຢາເສບຕິດ ທີ່ເຄີຍຕິດຄຸກມາກ່ອນໜ້ານີ້ ແລະ ກຸ່ມທີ່ມີໝາຍຈັບແລ້ວ ແຕ່ຍັງຫາໂຕບໍ່ພົບ.
ເຈົ້າໜ້າທີ່ ກະຊວງປ້ອງກັນຄວາມສງົບ ທ່ານນຶ່ງ ໄດ້ກ່າວຕໍ່ ເອເຊັຽເສຣີ ວ່າ:
“ຕາມທິດທາງຊີ້ນຳຂອງຫົວໜ້າກົມໃຫຍ່ຕຳຣວດ ຫັ້ນແຫຼະ ຫຼາຍໄດ໋ໆ ເພາະວ່າ ມັນ ເປັນໝາຍເກົ່າໆ ມັນຂຶ້ນຊຸດທີ່ເຊົາກະເປົ້າໝາຍໃໝ່ ຂຶ້ນຕໍ່ມັນກະມີຕລອດແຫຼະ, ເມື່ອເຮົາເກັບຂໍ້ມູນ ແລະ ຂຶ້ນບັນຊີເປົ້າໝາຍ ແລ້ວເນາະ ໄທເຮົາກະໄດ້ຕິດຕາມ ດ້ວຍ ການເຄື່ອນໄຫຍຂອງເຂົາ ຣາຍໃຫຍ່ ຣາຍຍ່ອຍ ຄືກັນໝົດຫັ້ນນ່າ.”
ເຈົ້າໜ້າທີ່ ທ່ານນີ້ ກ່າວຕື່ມວ່າ ຄົນທີ່ຖືກຂຶ້ນລາຍຊື່ ທັງໝົດ ຖ້າເປັນກຸ່ມເຄືອຂ່າຍ ຂອງຂບວນການຄ້າຢາເສບຕິດຂ້າມຊາດ ຈະເປັນເຈົ້າໜ້າທີ່ລະດັບສູນກາງ ເປັນຜູ້ຕິດຕາມ ແລະ ເຝົ້າລະວັງ ທຸກການເຄື່ອນໄຫວ, ແຕ່ກໍຕ້ອງມີຫຼັກການຫຼາຍຢ່າງ ໃນການເຂົ້າໄປກວດຄົ້ນ ຫຼື ຈັບໂຕ ມາສືບສວນ-ສອບສວນ. ສ່ວນກຸ່ມ ຄ້າຂາຍຢາເສບຕິດລາຍຍ່ອຍ ກໍຈະໃຫ້ເຈົ້າໜ້າທີ່ ລະດັບເມືອງ ແລະ ແຂວງ ເປັນຜູ້ຕິດຕາມ ແລະ ດຳເນີນຄະດີ.
ຈຳນວນນັກຄ້າຢາເສບຕິດ ມີ 2,000 ປາຍຄົນ ສ່ວນຫຼາຍເປັນຄົນລາວ ໃນປະເທດ ແລະ ມີຄົນວຽດນາມ, ຄົນຈີນ ແລະ ຄົນໄທຍ ອີກຈຳນວນນຶ່ງ ຊຶ່ງກະຊວງປ້ອງກັນຄວາມສງົບ ບໍໍ່ເປີດເຜີຍລາຍຊື່ ເພາະກັງວົນວ່າ ຈະກະທົບຕໍ່ການຕິດຕາມ ມາສືບສວນ-ສອບສວນ. ນອກຈາກນີ້ ທາງການລາວ ແລະ ໄທຍ ກໍຍັງໄດ້ມີການຮ່ວມມືກັນຕ້ານ ແລະ ສະກັດກັ້ນການຄ້າຂາຍ ຢາເສບຕິດຂ້າມຊາດ.
ເຈົ້າໜ້າທີ່ປ້ອງກັນ ແລະ ປາບປາມຢາເສບຕິດ ປະເທດໄທຍ ທ່ານນຶ່ງ ໄດ້ກ່າວຕໍ່ ເອເຊັຽເສຣີ ວ່າ:
"ໃນ ໂຕສາມຫຼ່ຽມຄຳ ແລ້ວ ພື້ນທີ່ໂຄງສ໌ໂຣມັນສ໌ ເນື່ອງຈາກວ່າ ມັນບໍ່ແມ່ນພື້ນທີ່ຂອງເຮົາ ຊິໃຫ້ເຮົາໄປຄວບຄຸມພື້ນທີ່ ຄົງເປັນໄປບໍ່ໄດ້ ແຕ່ເຮົາຄວບຄຸມສຖານະການ ໂດຍທີ່ວ່າ ຄວບຄຸມຄົນໄທຍ ແລະ ການເຂົ້າ-ອອກ ການກວດສອບປວັດ ການຕິດຕັ້ງອຸປກອນພິເສດຕ່າງໆ ເພື່ອເຝົ້າລະວັງ ແລະ ຕິດຕາມ ຄົນທີ່ຂ້າມໄປ ຂ້າມມາ ອັນນີ້ ຄື ໃນສິ່ງທີ່ທາງການໄທຍເຮົາໃຫ້ຄວາມສຳຄັນ."
ຣັຖບານລາວ ໄດ້ນຳເອົາບັນຫາຢາເສບຕິດ ຂຶ້ນມາເປັນວາລະແຫ່ງຊາດ ທີ່ຈະຕ້ອງດຳເນີນການສະກັດກັ້ນ, ປ້ອງກັນ ແລະ ປາບປາມຢາເສບຕິດ ໃຫ້ຫຼຸດໜ້ອຍຖອຍລົງ ແລະ ເນັ້ນຢ້ຳໃຫ້ ທຸກພາກສ່ວນໃນສັງຄົມ ເອົາໃຈໃສ່ ຄອຍເປັນຫູເປັນຕາ.
ທ່ານ ພັນຄຳ ວິພາວັນ ນາຍົກຣັັຖມົນຕຣີ ກ່າວໃນກອງປະຊຸມສມັມສາມັນ ເທື່ອທີ 2 ຂອງສະພາແຫ່ງຊາດຊຸດທີ 9 ໃນທ້າຍປີ 2021 ຕອນນີ້ວ່າ:
“ສຸມໃສ່ແກ້ໄຂ ບັນຫາຢາເສບຕິດຂອງປະເທດເຮົາ ໃຫ້ຜ່ອນຄາຍລົງ ຢ່າງຈະແຈ້ງ ຈຳເປັນ ແລະ ຮີບດ່ວນຂອງຊາດ ທີ່ສະສົມມາຫຼາຍປີ ໃຫ້ຜ່ອນຄາຍລົງໃນກຳນົດເວລາທີ່ແນ່ນອນ ໂດຍຖືເອົາ ການແກ້ໄຂບັນຫາດັ່ງກ່າວ ນັ້ນ ເປັນໜ້າທີ່ພັນທະ ແລະ ຄວາມຮັບຜິດຊອບ ຂອງທຸກພາກສ່ວນໃນສັງຄົມ.”
ໃນປີ 2020-2021 ທີ່ຜ່ານມາ ປະເທດລາວ ມີຄະຢາເສບຕິດເສບຕິດທັງໝົດເກືອບ 3,000 ເຣື່ອງຈັບກຸມຜູ້ຕ້ອງຫາ ໄດ້ເກືອບ 4,000 ຄົນ ຍຶດຂອງກາງຢາບ້າໄດ້ 125 ລ້ານເມັດ, ຢາໄສ 2,500 ກິໂລກຣາມ ແລະ ສານເສບຕິດອີກຫຼາຍຢ່າງ. ອີງຕາມຂໍ້ມູນຈາກເຈົ້າໜ້າທີ່ ກະຊວງປ້ອງກັນຄວາມສງົບ.
ສຳລັບເປົ້າໝາຍເຂດລໍ່ແຫຼມ ນຳເຂົ້າ-ອອກ ຢາເສບຕິດ ມີ 9 ຈຸດ ແລະ ເຂດລໍ່ແຫຼມ ນຳເຂົ້າ-ອອກ ສານຕັ້ງຕົ້ນ ທີ່ໃຊ້ໃນການການຜລິດຢາເສບຕິດມີ 4 ຈຸດ ແຕ່ຈຸດສຳຄັນ ທີ່ສຸດຄື ພື້ນທີ່ສາມຫຼ່ຽມຄຳ ແຂວງ ບໍ່ແກ້ວ.
ໃນປີ 2020 ທີ່ຜ່ານມາ ອົງການ UNODC ໄດ້ຣາຍງານວ່າ ປະເທດໄທຍ ແລະ ລາວມີການຜລິດຢາເສບຕິດ ແລະ ຄ້າມະນຸດ ຂຍາຍໂຕຢ່າງຕໍ່ເນື່ອງ ມີການຍຶດສານເສບຕິດ ປະເພດ Methamphetamine ສະເພາະ ໃນເຂດເອເຊັຽຕາເວັນອອກ ແລະ ເອເຊັຽຕາເວັນອອກສ່ຽງໃຕ້ ໄດ້ຫຼາຍເຖິງ 140 ຕັນ ໂດຍ ສ່ວນໃຫຍ່ຜລິດໃນຣັຖສານ ຂອງພະມ້າ ຕຣົງກັນຂ້າມ ຊາຍແດນໄທຍ ແລະ ລາວ ແລະ ດ້ວຍການຜລິດເພີ່ມຂຶ້ນ ຈຶ່ງເຮັດໃຫ້ໄທຍ ແລະ ລາວ ກາຍເປັນຈຸດຄ້າຂາຍ ຢາເສບຕິດທີ່ສຳຄັນແຫ່ງນຶ່ງຂອງໂລກ.