ນັກສິດມະນຸສລາວ ຖືກຄຸກຄາມເຖິງຊີວິດ, ນັກຂ່າວ ຖືກຂັງຄຸກ

ເຫດການຍິງ ທ້າວ ອານຸຊາ ຫຼວງສຸພົມ ຫຼື ແຈັກ ເຈົ້າຂອງເຟສບຸກ ທີ່ “ຂັບເຄື່ອນດ້ວຍຄີບອດ” ໃນວັນທີ 29 ເມສາ ທີ່ຜ່ານມາ ຍັງສ້າງຄວາມຄາໃຈ ແລະ ສົ່ງໄສ ແກ່ສັງຄົມ. ໃນເບື້ອງຕົ້ນ ຄົນກໍເຂົ້າໃຈວ່າ ທ້າວ ແຈັກເສັຽຊີວິດ ແຕ່ ຕໍ່ມາກໍມີການແຈ້ງຄວາມ ຄືບໜ້າວ່າ ລາວຍັງມີຊີວິດຢູ່. ມີຄົນວິຈານກັນວ່າ ຜູ້ທີ່ຍິງ ທ້າວ ແຈັກນັ້ນ ເປັນເຈົ້າໜ້າທີ່ຕໍຣວດນອກເຄື່ອງແບບ ແຕ່ວ່່າ ເຈົ້າໜ້າທີ່ຕໍາຣວດ ກໍຖແລງຂ່າວວ່າ ເຫດຈູງໃຈ ໃນການຍິງ ອາດຈະມາຈາກຂໍ້ຂັດແຍ່ງ ທາງດ້ານທຸຣະກິຈ ແລະ ບັນຫາຊູ້ສາວ.

ພັກເອກ ອຸບົນ ຈຸນລະມະນີ, ຮອງຫົວໜ້າກອງບັນຊາການ ປກສ ນະຄອນຫລວງວຽງຈັນ ໄດ້ຖແລງຕອນນຶ່ງ ວ່າ:

“ຕໍ່ກັບເຫດການດັ່ງກ່າວ ເຈົ້າໜ້າທີ່ສັນນິຖານເບື້ອງຕົ້ນ ອາດເປັນຂໍ້ຂັດແຍ້ງດ້ານທຸຣະກິຈ ຫຼື ຂໍ້ຂັດແຍ້ງບັນຫາຊູ້ສາວ. ມາຮອດປັດຈຸບັນທາງເຈົ້າໜ້າທີ່ ໄດ້ສືບຕໍ່ດຳເນີນສືບສວນ-ສອບສວນ ແລະ ເກັບກຳຂໍ້ມູນຫຼັກຖານຕາມຂັ້ນຕອນຂອງກົດໝາຍ.”

ເຈົ້າໜ້າທີ່ ທາງການລາວ ທ່ານນຶ່ງ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ວິທຍຸ ເອເຊັຽ ເສຣີ ວ່າ:

“ກະຊວງປ້ອງກັນຄວາມສງົບ ໄດ້ຕິດຕັ້ງກ້ອງວົງຈອນປິດ ຢູ່ນະຄອນຫລວງວຽງຈັນ ທັງໝົດປະມານ 5,000 ຈຸດ ເຊິ່ງບໍ່ລວມທັງກອງວົງຈອນປິດ ທີ່ຢູ່ເຮືອນຂອງປະຊາຊົນ ແລະ ບໍຣິສັດຫ້າງຮ້າງຕ່າງໆ. ຖ້າວ່າ ເຈົ້າໜ້າທີ່ຈະຕິດຕາມມືປືນ ທີ່ຍິງ ທ້າວ ແຈັກ ນັ້ນ ກໍຄົງຈະເຮັດໄດ້ ຍ້ອນວ່າ ກ້ອງວົງຈອນປິດຢູ່ນະຄອນຫລວງວຽງຈັນ ມີຫຼາຍຈຸດ.”

ນອກຈາກນີ້,​ ທີ່ຜ່ານມາ ວິທຍຸ ເອເຊັຽເສຣີ ກໍໄດ້ຕິດຕໍ່ຫາ ພັກເອກ ອຸບົນ ຈຸນລະມະນີ, ຮອງຫົວໜ້າກອງບັນຊາການ ປກສ ນະຄອນຫລວງວຽງຈັນ ແຕ່ ທ່ານ ກໍບອກວ່າ ເຈົ້າໜ້າທີ່ກໍາລັງສືບສວນ ສອບສວນ ຢູ່, ແຕ່ ເມື່ອຖາມວ່າ ຜູ້ທີ່ຍິງ ທ້າວ ແຈັກ ເປັນຕໍາຣວດນອກເຄື່ອງແບບ ຫຼື ບໍ່ ພັນເອກ ອຸບົນ ກໍປິດສາຍໂທລະສັບ (ວາງໂທຣະສັບ).

ສຽງນັກຂ່າວໂທສໍາພາດ:

ນັກຂ່າວ: ຮາໂລ ທ່ານ.

ພັນເອກະ ອຸບົນ: ເອີ! ຂ້ອຍຄາປະຊຸມຢູ່ເດີ.

ນັກຂ່າວ: ເອີ!​ ໜ້ອຍນຶ່ງ ທ່ານ ການສືບສວນ ສອບສວນ ເປັນຈັ່ງໃດທ່ານ?

ພັນເອກ ອຸບົນ: ຄັນວ່າ ອັນນັ້ນ ເຂົ້າມາຫ້ອງການ ລົມໂທລະສັບ ມັນບໍ່ອັນນັ້ນ.

ນັກຂ່າວ: ອັນນີ້ ຢູ່ອາເມຣິກາ ພີ່ນ່າ ທ່ານ ຕົກລົງວ່າ ເປັນຈັ່ງໃດ?

ພັນເອກ ອຸບົນ: ບໍ່ຮູ້ຈັກຊິລົມແຫຼະເດີ.

ນັກຂ່າວ: ຄໍາຖາມດຽວ ທ່ານ ເປັນຈັ່ງໃດ ທ່ານ ອັນໄດ້ຍິນວ່າ ຕໍາຣວດ ນອກເຄື່ອງແບບຍິງຫັ້ນນ່າ ທ່ານ.

ພັນເອກ ອຸບົນ: ປິດສາຍ ທັນທີ.

ທ້າວ ອານຸຊາ ຫຼວງສຸພົມ ຫລື “ແຈັກ” ທີ່ຖືກຍິງເມື່ອວັນເສົາ ວັນທີ່ 29 ເມສາ 2023 ທີ່ນະຄອນຫຼວງວຽງຈັນນັ້ນ ປັດຈຸບັນ ຮູ້ສຶກໂຕແລ້ວ ແລະ ສາມາດສື່ສານ ດ້ວຍການພິມ ຂໍ້ຄວາມໃນໂທຣະສັບມືຖື ໄດ້ແລ້ວ ແຕ່ບໍ່ສາມາດເວົ້າໄດ້ເທື່ອ ເພາະລິ້ນຂາດແລະ ເສັ້ນປະສາດທາງໃນເສັຍຫາຍ ອີງຕາມ ການບອກເລົ່າ ຂອງຄົນ ທີ່ໃກ້ຊິດຄອບຄົວ ຂອງລາວ.

ວິທຍຸ ເອເຊັຽ ເສຣີ ໄດ້ໂທໄປຫາໂຮງໝໍ ມິດຕະພາບ 150 ຕຽງ ເພື່ອສອບຖາມ ກ່ຽວກັບອາການຂອງ ທ້າວ ແຈັກ ແຕ່ເຈົ້າໜ້າທີ່ ທີ່ກ່ຽວຂ້ອງບໍ່ສະດວກ ໃຫ້ຂໍ້ມູນ.

ອີງຕາມການຖແລງການ ຂອງ ອົງການສິ້ງຊອມ ດ້ານສິດທິມະນຸສ (Human Rights Watch) ໃນວັນທີ 04 ພຶສພາ ທີ່ຜ່ານມາ, ຄອບຄົວຂອງ ທ້າວ ແຈັກ ແລະ ແຫຼ່ງຂ່າວອື່ນໆ ໄດ້ຢັ້ງຢືນດ້ວຍຄຳເວົ້າ ແລະ ຫຼັກຖານ ຈາກຮູບຖ່າຍວ່າ ທ້າວ ແຈັກ ຍັງມີຊີວິດຢູ່, ລອດຈາກການຖືກລອບຍິງ ແລະ ຢູ່ລະຫວ່າງການປິ່ນປົວ ຢູ່ໂຮງໝໍ.

ອົງການສິ້ງຊອມ ດ້ານສິດທິມະນຸສ ໄດ້ຮຽກຮ້ອງໃຫ້ທາງການລາວ ຄຸ້ມຄອງ ທ້າວແຈັກ ໃຫ້ມີຄວາມປອດໄພ ແລະ ເລັ່ງດຳເນີນການ ສືບສວນ-ສອບສວນ ຢ່າງລະອຽດ.

ທ່ານ ຟີລ ໂຣເບີດຊັນ (Phil Robertson) ຮອງຜູ້ອຳນວຍການ ອົງການສິ້ງຊອມ ດ້ານສິດທິມະນຸສ ປະຈຳພາກພື້ນ ເອເຊັຽ-ແປຊີຟິກ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 04 ພຶສພາ 2023 ນີ້ວ່າ: “ຕໍາຣວດລາວ ກໍເລີຍເຂົ້າໄປຫາເຂົາທີ່ໂຮງໝໍ ຄອບຄົວກໍເຂົ້າໃຈວ່າ ຕ້ອງເວົ້າຄວາມຈິງ ແລ້ວ ເພາະວ່າຕຳຣວດຮູ້ແລ້ວ ເວົ້າໃຫ້ຈະແຈ້ງວ່າ ເຂົາຍັງມີຊີວິດຢູ່ ເພື່ອນ ແລະ ຄອບຄົວກໍເປັນຫ່ວງວ່າ ມືປືນຈະກັບມາ. ສະຖານທູດຕ່າງໆ ກໍກຳລັງຕິດຕາມ ຣັຖບານ ສປປ ລາວ ກໍຍັງຕ້ອງມີຄວາມຮັບຜິດຊອບ ທີ່ຈະຕ້ອງປົກປ້ອງ ສອບສວນເອົາຄວາມຈິງ ເປີດເຜີຍຂໍ້ມູນ ຕາມຫາຄົນທີ່ຍີງເຂົາແລ້ວກໍຈັບເຂົາ ແລ້ວກໍດຳເນີນຄະດີ.”

ສ່ວນທາງດ້ານອົງການ ນິຣະໂທດສະກັມ ສາກົລ (Amnesty International) ຍັງບໍ່ສາມາດກວດສອບໄດ້ ຢ່າງອິດສະຣະ ກ່ຽວກັບກໍຣະນີ ຂອງ ທ້າວ ແຈັກ ດັ່ງໂຄສົກ ຂອງອົງການນິຣະໂທດ ສະກັມ ສາກົລປະຈຳພາກພື້ນ ເອເຊັຍ-ແປຊີຟິກ ໄດ້ກ່າວຕໍ່ວິທຍຸ ເອເຊັຽ ເສຣີ ໃນມື້ດຽວກັນວ່າ:

“ຕ້ອງຍອມຮັບວ່າ ຕອນນີ້ພວກເຮົາຍັງບໍ່ສາມາດ ກວດສອບ ດ້ວຍໂຕເອງໄດ້ ໃນຖານະອົງກອນ. Amnesty ສະນັ້ນຂໍ້ມູນທີ່ໄດ້ຮັບມາ ມັນກໍອາດເປັນ Second-hand information ຫຼືວ່າ ຂໍ້ມູນມືສອງຈະເຫັນວ່າ ແທ້ຈິງຕອນນີ້ ມີການເຜີຍແຜ່ນ ຮູບພາບ ຂອງທ້າວ ແຈັກ ທີ່ຢູ່ໃນໂຮງໝໍແລ້ວ ກໍເປັນພາບທີ່ສະແດງໃຫ້ເຫັນ ໃນລັກສະນະວ່າ ທ້າວ ແຈັກ ຍັງມີຊິວິດ ຢູ່ກໍຄືລອດຊີວິດ ຈາກເຫດການຍິງ ມີຂໍ້ຄວາມຈາກຫຼາຍຄົນ ຫຼືືວ່າ ຈາກຫຼາຍອົງກອນ ທີ່ອອກມາຢັ້ງຢືນວ່າ ຍັງມີຊິວິດ.”

ເຖິງວ່າວີດີໂອ ບຸກຍິງ ທ້າວ ແຈັກ ຢູ່ບາຣ໌ ບ້ານດົງໝ້ຽງ ເມືອງຈັນທະບູຣີ ນະຄອນຫຼວງວຽງຈັນ ຈະຖືກເຜີຍແຜ່ ໂດຍໜັງສືພິມ ລາວພັທນາ ຊຶ່ງເປັນສື່ຂອງຣັຖບານລາວ ແຕ່ທາງການລາວ ກໍຍັງບໍ່ສາມາດຈັບ ຜູ້ກຳທຳຜິດໄດ້ເທື່ອ.

ກ່ອນໜ້ານີ້ ໃນປີ 2000 ທາງການລາວ ໄດ້ລົງນາມ ໃນອະນຸສົນທິສັນຍາ ລະຫວ່າງປະເທດ ວ່າດ້ວຍສິດທິພົລເມືອງ ແລະສິດທິທາງການເມືຶອງ ICCPR ຊຶ່ງຮັບປະກັນສິດໃນການມີຊີວິດ ພາຍໃຕ້ ມາຕຣາ 6 ແລະ ສິດທິເສຣີພາບ ໃນການສະແດງອອກ ພາຍໃຕ້ມາຕຣາ 19.

ຍານາງ ຄໍຣີເຍາະ ມານຸແຊ ນັກກົດໝາຍ ດ້ານສິດທິມະນຸສ ໃນໄທຍກ່າວວ່າ:

“ຮັບຮອງອະນຸສັນຍາ ICCPR ແລ້ວກໍເປັນໜ້າທີ່ ຂອງຣັຖບານທີ່ຈະຕ້ອງແກ້ໄຂ ກົດໝາຍພາຍໃນໃຫ້ມັນສອດຄ່ອງກັບ ICCPR ການທີ່ກົດໝາຍ ພາຍໃນຂັດແຍ່ງ ກັບກົດໝາຍລະຫວ່າງປະເທດ ຊຶ່ງປະເທດນັ້ນໄດ້ຮັບຮອງ ມັນກໍເປັນກົດໝາຍທີ່ບໍ່ຊອບທັມ ແຕ່ຢ່າງໃດກໍຕາມ ອະນຸສັນຍາ ລະຫວ່າງປະເທດ ມັນບໍ່ມີບົດລົງໂທດ ແຕ່ວ່າມັນກໍຈະມີຜົລ ໃນເຣື່ອງຂອງການທີ່ນາໆປະເທດ ອາດ Sanction ຄວ້ຳບາດ ບໍ່ ອາດຖືກປະນາມ ໃນເວທີໂລກບໍ່.”

ຣັຖທັມມະນູນ ແຫ່ງ ສປປ ລາວ ຮັບປະກັນສິດເສຣີພາບ ຂອງພົລເມືອງລາວ ແຕ່ປະມວນກົດໝາຍອາຍາ ມາຕຣາ 117 ພັດລົງໂທດ ບຸກຄົນທີ່ໂຄສະນາ ຕ້ານຣັຖບານລາວ.

ທ້າວ ອານຸຊາ ຫຼວງສຸພົມ ຫຼື ແຈັກ ນັກເຄື່ອນໄຫວ ເພື່ອປະຊາທິປະໄຕ ໃນລາວ ໄວ 25 ປີ ເປັນບຸກຄົນ ທີ່ມີຄວາມສົນໃຈ ກ່ຽວກັບການເມືອງ ປຽບທຽບ ແລະເປັນນຶ່ງໃນທີມງານ ຜູ້ດູແລ ກຸ່ມເຟສບຸກແບບປິດ ທີ່ໃຊ້ຊື່ວ່າ “ລາວດຣາມ່າ” ມີສະມາຊິກປະມານ 7,000 ຄົນ ທີ່ໄດ້ສ້າງຕັ້ງຂຶ້ນ ໃນເດືອນເມສາ 2020 ເພື່ອໃຊ້ເປັນພື້ນທີ່ ສຳລັບການເວົ້າຈາລົມກັນກ່ຽວກັບ ບັນຫາປະຊາທິປະໄຕ ແລະສິດທິມະນຸດໃນລາວ ຜ່ານ # ຖ້າການເມືອງລາວດີ.

ຈາກນັ້ນໃນເດືອນມີນາ 2022 ທ້າວແຈັກ ແລະ ໝູ່ເພື່ອນໄດ້ຮ່ວມກັນສ້າງຕັ້ງ ເພຈເຟສບຸກ ແບບສາທາຣະນະ ຊື່ວ່າ “ຂັບເຄື່ອນດ້ວຍຄີບອດ” ພ້ອມກັບເພຈອື່ນໆ ຢ່າງໜ້ອຍ 3 ເພຈ ເພື່ອບອກເລົ່າເຣື່ອງຕ່າງໆ ທີ່ເກີດຂຶ້ນພາຍໃນປະເທດລາວ ຜ່ານ # ສຽງຂອງພວກເຮົາ ແລະ # What’s Happening in Laos ຄວບຄູ່ໄປກັບ ຄວາມພະຍາຍາມ ໃນການກຳຈັດ ອິດທິພົນຈີນ ໃນລາວ ພາຍໃຕ້ຄຳຂັວນທີ່ວ່າ “ເພື່ອໃຫ້ລາວຢູ່ລອດ ບໍ່ແມ່ນຂ້າທາດຈີນ.”

ນອກຈາກນີ້, ບັນດານັກຂ່າວ ຢູ່ປະເທດເພື່ອນບ້ານ ທີ່ມີການຣາຍງານຄວາມຈິງ ແລະ ກວດສອບຣັຖບານ ກໍຖືກຈັບໄປຫຼາຍຄົນ.

ເພື່ອ​ລຳ​ລຶກ ໂອ​ກາດ​ຄົບ​ຮອບ 30 ປີ ຂອງວັນ​ສາ​ກົລ​ວ່າ​ດ້ວຍ​ເສ​ຣີ​ພາບ ​​ສື່ມວ​ນຊົນ ວັນ​ທີ 3 ພຶສ​ພາ ໂດຍ​ແມ່ນ​ອົງ​ການ​ ຂ້າ​ຫລວງ​ໃຫຍ່​ ແຫ່ງ​ສະ​ຫະ​ປະ​ຊາ​ຊາຕ ເປັນ​ຜູ້​ປະ​ກາດຮັບ​ຮອງ ວັນ​ດັ່ງ​ກ່າວ, ວິທຍຸ ເອ​ເຊັຽ​ເສ​ຣີ ​ໄດ້​ເນັ້ນ​ຢ້ຳ ​ເຖິງ​ຜົ​ລ​ງານ ​ຂອງ​ນັກ​ຂ່າວ ແລະ ບ​ລອກ​ເກີ ຜູ້​ທີ່​ຖືກ​ຄຸມຂັງ ຢູ່​ໃນ​ຫຼາຍ​ປະ​ເທດ ເຂດ​ອາ​ເຊັຽ​ແປ​ຊິ​ຟິກ. ຫົວ​ຂໍ້​ຂອງ​ ວັນ​ສາ​ກົລ​ວ່າ​ດ້ວຍ ເສ​ຣີ​ພາບ​ສື່ມວນ​ຊົນ ປີນີ້ແມ່ນ: ເສ​ຣີ​ພາບ​ການ​ປາກ​ເວົ້າ ເປັນສິ່ງ​​​ຂັບ​ເຄື່ອນສິດ​ທິ​ມະນຸສ, ໄດ້ເນັ້ນ​ຢ້ຳ​ເຖິງ​ຄວາມ​ສຳ​ພັນ ​ລະ​ຫວ່າງ ສິ່ງ​ນາບ​ຂູ່​ຕໍ່​ເສ​ຣີ​ພາບ​ ສື່ມວນ​ຊົນ, ຄວາມ​ປອດ​ໄພ​ຂອງ​ນັກ​ຂ່າວ, ແລະ ການຄຸກ​ຄາມ​ສິດ​ທິ​ ຂອງ​ຄົນ​ຫຼາຍ​ຂຶ້ນ.

ຄວາມ​ກັງ​ວົນ​ຍັງ​ບໍ່​ໝົດ​ໄປ, ຍັງ​ມີ​ການຈັບ​ນັກ​ຂ່າວວິທຍຸ ​ເອ​ເຊັຽ ເສ​ຣີ ແລະ ບ​ລອກ​ເກີ ຂັງ​ຄຸກ, ເພື່ອນ​ຮ່ວມ​ງານ ທີ່​ເປັນ​​ສຳ​ນັກ​ຂ່າວ ສຽງ​ອາ​ເມ​ຣິ​ກາ ແລະ BBC ເກີດ​ຂຶ້ນ ​ຢູ່​ປະ​ເທດ​ ແລະ ເຂດ​ແຄວ້ນ ທີ່​ໄດ້​ມີ​ການ​ຈຳ​ກັດ​ ສິດ​ເສ​ຣີ​ພາບ ​ຂອງ​ສື່ມວນ​ຊົນ.

ລາຍ​ຊື່​ນັກ​ຂ່າວ ວິທຍຸ ​ເອ​ເຊັຽ​ເສ​ຣີ ທີ່​ຖືກ​ຈັບ ລວມ​ມີ:

1. ທ່ານ ເອດມັນດ໌ ຫວັນ ຢູ-ຊິງ (Edmund Wan Yiu-sing) ເປັນທີີ່ຮູ້ຈັກກັນດີ ໃນນາມ ດີເຈ ຈິ ຖືກ​ສານ​ຮົງ​ກົງ ຕັດສິນ​ໃນ​ເດືອນຕຸ​ລາ 2022 ໃຫ້​ຈຳ​ຄຸກ 2 ປີ ກັບ 8 ເດືອນ ໃນ​ຂໍ້​ຫາປຸກ​ລະ​ດົມ​ປະ​ຊາ​ຊົນ ແລະ ຟອກ​ເງິນ ເຊິ່ງ​ທ່ານກໍ​ປະ​ຕິ​ເສດ​ຂໍ້ກ່າວຫາ​ດັ່ງ​ກ່າວ. ກ່ອນ​ທີ່ ທ່ານ​ຈະ​ຖືກ​ຈັບໃນ​ເດືອນ​ກຸມ​ພາ 2021, ທ່ານ ​ເຄີຍ ຈັດ​ລາຍ​ການ ແລະ ລາຍ​ງານ​ຂ່າວ ແລະ ວິ​ພາກວິ​ຈານ​ຮົງ​ກົງ, ທ່ານ ເຄີຍ ເຮັດ​ສະ​ຖານີ ​ວິ​ທ​ຍຸ​ ທາງ​ອອນ​ລາຍນ໌ ແບບ​ອິດ​ສະ​ຫຼະ. ທ່ານ ເຄີຍ​ຈັດ​ລາຍ​ການ ​ວິ​ທ​ຍຸ​ ເອ​ເຊັຽ​ ເສ​ຣີ ຜ​ແນກ​ພາ​ສາ​ຈີນ ນັບ​ແຕ່​ປີ 2017-2020.
2. ຍາ​ນາງ ເທດ​ເທດ​ຂີນ (Htet Htet Khine), ອະດີດ​ຜູ້​ປະ​ກາດ​ຂ່າວ ໂທ​ລະ​ທັດ​ BBC ຖືກ​ຕັດ​ສິນ​ຈຳ​ຄຸກ ເປັນ​ເວ​ລາ 3 ປີ ໃນ​ຂໍ້​ຫາ​ປຸກ​ລະ​ດົມ ແລະ ການ​ຕັ້​ງ​ສະ​ມາ​ຄົມ​ ທີ່​ຜິດ​ກົດ​ໝາຍ. ນາງ ເທດ​ເທດ ຂີນ ຖືກ​ຈັບ ຫຼັງ​ຈາກ​ທະ​ຫານ​ພະ​ມ້າ ​ເຂົ້າ​ມາ​ຍຶດ​ອຳ​ນາດ ​ໄດ້ 6 ເດືອນ.
3. ທ່ານ ຫງຽນ ເຕືອງ ທຸຍ (Nguyen Tuong Thuy) ເປັນບລອກເກີ ໃຫ້ແກ່ວິທຍຸ ເອເຊັຽ ເສຣີ ກ່ຽວກັບເຣື່ອງປະຊາທິປະໄຕ ແລະ ສິດທິມະນຸສ, ແລະ ບັນຫາສັງຄົມ ຖືກສານຕັດສິນຈໍາຄຸກ 11 ປີ ໃນຂໍ້ຫາ ໂຄສະນາຊວນເຊື່ອ ຕໍ່ຕ້ານຣັຖ.
4. ທ່ານ ຫງຽນ ລານ ຖັງ (Nguyen Lan Thang), ເປັນ​ຜູ້​ປະ​ກອບ​ສ່ວນ ​ຂ່າວ​ການ​ເມືອງ ແລະ ສັງ​ຄົມ ໃຫ້​ແກ່​ວິທຍຸ ເອ​ເຊັຽ​ເສ​ຣີ ຜ​ແນກ​ພາ​ສາ​ວຽດ​ນາມ ຖືກ​ຕັດ​ສິນ​ຈຳ​ຄຸກ ເປັນ​ເວ​ລາ 6 ປີ. ທ່ານ​ຖືກ​ຈັບ​ໃນ​ເດືອນ ກໍ​ຣະ​ກະ​ດາ 2022 ໃນ​ຂໍ້​ຫາ​ເຜີຍ​ແຜ່ນ​ວີ​ດີ​ໂອ ລົງ​ທາງເຟ​ສ​ບຸກ ແລະ ຢູ​ທູບ ທີ່​ມີ​ຂໍ້​ຄວາມ​ວ່າ ຕ້ານ​ຣັ​ຖ​ບານ​ຄອມ​ມູ​ນິສຕ໌ ວຽດ​ນາມ, ແລະ ໃນ​ເດືອນ​ເມ​ສາ 2023 ທີ່​ຜ່ານ​ມາ ທ່ານ ຖືກ​ສານ​ຕັດ​ສິນ.
5. ທ່ານ ຫງຽນ ວັນ ໂຮ (Nguyen Van Hoa), ຜູ້ທີ່ເປັນບລອກເກີ ແລະ ຜລິດວີດີໂອ ໃຫ້ແກ່ວິທຍຸ ເອເຊັຽເສຣີ ຜແນກພາສາ ວຽດນາມ ໄດ້ຖືກຈັບໃນເດືອນມົກກະຣາ ປີ 2017 ໃນຂໍ້ຫາລະເມີດ ເສຣີ ປະຊາທິປະໄຕ ເອົາຜົລປໂຍດຂອງຣັຖ ໃຊ້ໂດຣນບິນຖ່າຍວີດີໂອ ການປະທ້ວງຢູ່ນອກໂຮງງານ ເຫຼັກກ້າ ຂອງຊາວໄຕ້ຫວັນ ຢູ່ວຽດນາມ. ໂຮງງານເຫຼັກກ້າດັ່ງກ່າວ ໄດ້ປ່ອຍນໍ້າເສັຽລົງໃສ່ທະເລ ຢູ່ວຽດນາມ ເຮັດ​ໃຫ້​ປາ​ຕາຍ​ເປັນ​ຈຳ​ນວນ​ຫຼາຍ.
6. ທ່ານ ສີ​ທູ ອອງ ມິນ (Sithu Aung Myint) ເປັນນັກ​ຂ່າວ​ຂອງ​ພະ​ມ້າ ຖືກ​ສານ​ພິ​ເສດ ​ຂອງ​ພະ​ມ້າ ຕັດ​ສິນ​ຕິດ​ຄຸກເປັນ​ເວ​ລາ 12 ປີ ໃນ​ຂໍ້​ຫາ ບຸກ​ລະ​ດົມ​ ໃຫ້​ຕ້ານ​ກັບ​ກອງ​ທັບ​ພະ​ມ້າ. ໄດ້​ມີ​ການ​ຕັດ​ຕັ້ງ​ສານ​ພິ​ເສດ​ ຂອງ​ພະ​ມ້າ ຂຶ້ນ​ມາ ຫຼັງ​ຈາກ​ທະ​ຫານ​ພະ​ມ້າ ​ເຂົ້າ​ມາ​ຍຶດ​ອຳ​ນາດ ວັນ​ທີ 1 ກຸມ​ພາ 2021.
7. ທ່ານ ເຕຣືອງ ດຸຍ ​ນາດ (Truong Duy Nhat) ​ເປັນ​ຜູ້​ປະ​ກອບ​ສ່ວນ​ ຂ່າວ​ປະ​ຈຳ​ສັບ​ປະ​ດາ ໃຫ້​ແກ່ວິທຍຸ ​ເອ​ເຊັຽ​ ເສ​ຣີ ຜ​ແນກ​ພາ​ສາ​ວຽດ​ນາມ ກ່ອນ​ທີ່ ເຈົ້າ​ໜ້າ​ທີ່​ຕຳ​ຣວດ​ ໃນປະ​ເທດ​ໄທ​ຍ ຈະຈັບ​​ໂຕ​ທ່ານ​ໄປ ໃນ​ເດືອນມົກກະ​ຣາ 2019 ແລະ ຖືກ​ສານ​ວຽດ​ນາມ​ຕັດ​ສິນ ໃນ​ເດືອນ ມີ​ນາ 2020 ໃຫ້​ຈຳ​ຄຸກ​ເປັນ​ເວ​ລາ 10 ປີ ໃນ​ຂໍ້​ຫາ ສວຍ​ໃຊ້​ຕຳ​ແໜ່ງ ແລະ ໜ້າ​ທີ່ໃນ​ການລັກ​ໂລບ ເອົາ​ທີ່​ດິນ. ໃນ​ປີ 2013-2015, ທ່ານ ໄດ້​ຖືກຈັບ​ຂັງ​ຄຸກ ຍ້ອນ​ວ່າ ຂຽນ​ວິ​ພາກວິ​ຈານ ​ຣັ​ຖ​ບານ​ພັກ​ດຽວ ​ຂອງວຽດ​ນາມ.
8. ທ່ານ ອັນ ຈະຮິນ (Uon Chhin) ນັກ​ຖ່າຍ​ຮູບ ​ແລະ ວີ​ດີ​ໂອ ຂອງວິທຍຸ ​ເອ​ເຊັຽ ​ເສ​ຣີ ພ້ອມດ້ວຍ ຜູ້ປະກາດຂ່າວ ຖືກຈັບເຂົ້າຄຸກໃນເດືອນພືສຈິກາ 2017 ໂດຍ ເຈົ້າໜ້າທີ່ ທາງການກັມພູຊາ.​ ເຂົາ​ເຈົ້າ​ທັງ​ສອງ​ຖືກ​ຈັບ​ ໃນ​ຂໍ້​ຫາ ເອົາ​ຂໍ້​ມູນ​ໃຫ້​ນັກ​ຂ່າວ​ ຕ່າງ​ປະ​ເທດ ທີ່ບໍ່​ຖືກ​ຕ້ອງ ​ຕາມ​ກົດ​ໝາຍ.
9. ທ່ານ ແຢງ ໂສ​ເທັຽ​ຣິນ (Yeang Sothearin), ອະ​ດີດ​ຜູ້​ປະ​ກາດ​ຂ່າວ ວິທຍຸ ​ເອ​ເຊັຽ​ ເສ​ຣີ ຜ​ແນກ​ພາ​ສາ ​ກັມພູ​ຊາ ຖື​ກ​ຈັບ​ຂັງ​ຄຸກ ​ໃນ​ເດືອນ​ພຶ​ສ​ຈິ​ກາ 2017, ພ້ອມ​ກັບ ທ່ານ ອັນ ຈະຮິນ ນັກ​ຖ່າຍ​ຮູບ​ ແລະ ວີ​ດີ​ໂອ ຂອງວິທຍຸ ​ເອ​ເຊັຽ ​ເສ​ຣີ. ເຂົາ​ເຈົ້າ​ທັງ​ສອງ ​ຖືກ​ຈັບ​ໃນ​ຂໍ້​ຫາ ເອົາ​ຂໍ້​ມູນ​ໃຫ້​ນັກ​ຂ່າວ​ຕ່າງ​ປະ​ເທດ ທີ່ບໍ່​ຖືກ​ຕ້ອງ​ຕາມ​ກົດ​ໝາຍ ຫຼັງ​ຈາກ ທີ່​ຫ້ອງ​ການ​ວິ​ທະ​ຍຸ​ ເອ​ເຊັຽ ​ເສ​ຣີ ຢູ່​ນະ​ຄອນ​ຫລວງ ​ພະ​ນົມ​ເປນ ຖືກ​ຣັ​ຖ​ບານ ກັມພູ​ຊາ ສັ່ງ​ປິດ.