ມີປະຊາຊົນເກືອບ 10,000 ຄົນ ຢູ່ພາກກາງເຂດບາໂຄ (Bago) ໄດ້ພາກັນໜີອອກຈາກບ້ານ ຂອງຕົນ ໃນຂະນະທີ່ ທະຫານພະມ້າ ຍັງເປີດການໂຈມຕີ ທາງທະຫານ ໃນຄວາມພະຍາຍາມ ທີ່ຈະກວາດລ້າງກຸ່ມກອງກຳລັງ ປົກປ້ອງປະຊາຊົນ ແລະ ນັກຣົບກະຫຣ່ຽງ ທີ່ຕໍ່ຕ້ານທະຫານພະມ້າ. ຊາວບ້ານກ່າວວ່າ ມີ 12 ບ້ານ ຢູ່ເມືອງ ສະເວຈິນ ຢູ່ພາກຕາເວັນອອກເຂດບາໂຄ ໄດ້ພາກັນໜີຈາກບ້ານ. ມີກຳລັງທະຫານ ປະຈຳການຢູ່ 80 ບ້ານ ໄດ້ເຣີ່ມບຸກທະລາຍໝູ່ບ້ານ ໃນວັນທີ 9 ມີນາ ອີງຕາມຂໍ້ມູນຈາກແມ່ຍິງຄົນນຶ່ງ ທີ່ຖືກບັງຄັບໃຫ້ໜີຈາກບ້ານ.
ແມ່ຍິງຄົນນັ້ນ ໄດ້ກ່າວວ່າ:
“ທະຫານພະມ້າ ໄດ້ເຂົ້າມາບຸກທະລາຍ ບ້ານ ຕຸງລວງ, ບ້ານເວງ, ບ້ານ ບໍ ກາ ຕາ, ປາ ເດ ກໍ, ນາຍອງ ປິນ ຈີ ແລະ ບ້ານອື່ນໆ ແລະ ໄດ້ຍິງປືນໃຫຍ່ໃສ່ຊາວບ້ານ ແລະ ເຮັດໃຫ້ມີຜູ້ເຄາະຮ້າຍ.”
ລາວ ກ່າວວ່າ ໃນຂະນະທີ່ກຳລັງລົມກັນຢູ່ ມີປະຊາຊົນທີ່ໜີຈາກບ້ານ ແລະ ພວກທະຫານລຽງໜ້າກັນເຂົ້າມາໝູ່ບ້ານ ແລະ ຍິງປືນໃຫຍ່ໃສ່ໝູ່ບ້ານ.
ແມ່ຍິງຄົນນີ້ ກ່າວວ່າ:
“ບໍ່ຮູ້ວ່າ ມີປະຊາຊົນຫຼາຍປານໃດ ຖືກສັງຫານ ຫຼື ບາດເຈັບ ຈາກປືນໃຫຍ່ຂອງພະມ້າ ຍ້ອນວ່າ ປະຊາຊົນ ບໍ່ກ້າກັບບ້ານ.”
ປະຊາຊົນພາກັນໄປຢູ່ ຄ້າຍອົບພະຍົບຢູ່ ບໍຣິເວນວັດ ຢູ່ເມືອງ ສະເວຈິນ. ມີການຍິງປະທະກັນ ລະຫວ່າງ ທະຫານພະມ້າ ແລະ ທະຫານກອງກຳລັງແຫ່ງຊາຕກະຫຣ່ຽງ ຢູ່ເມືອງ ສະເວຈິນ ແຕ່ວ່າ ບໍ່ມີຝ່າຍໃດອອກະຖແລງການ ໃນການປະທະກັນ. ເຖິງຢ່າງໃດກໍຕາມ, ທ່ານ ຕີນ ອູ ໂຄສົກ ເຂດບາໂຄ ໄດ້ປະຕິເສດ ກໍຣະນີທີ່ຊາວບ້ານ ຖືກບັງຄັບໜີອອກຈາກບ້ານ. ອີງຕາມຂໍ້ມູນຈາກ ສະຫະປະຊາຊາຕ ໃນວັນທີ 27 ກຸມພາ, ມີປະຊາຊົນ 1.6 ລ້ານຄົນ ໄດ້ກາຍເປັນຄົນອົບພະຍົບ ໃນພະມ້າ ໃນນັ້ນ 1.3 ລ້ານຄົນ ຖືກບັງຄັບ ໃຫ້ໜີຈາກບ້ານ ຍ້ອນຄວາມຂັດແຍ່ງ ແລະ ຄວາມບໍ່ແນ່ນອນ ຫຼັງຈາກທີ່ທະຫານພະມ້າ ເຂົ້າມາຢຶດອຳນາດ ໃນວັນທີ 1 ກຸມພາ 2021. ທະຫານພະມ້າ ໄດ້ສັງຫານປະຊາຊົນ 21 ຄົນ ລວມມີພຣະສົງ 3 ອົງ ໃນການເຂົ້າມາບຸກທະລາຍວັດ ຢູ່ ຣັຖສານ ອີງຕາມຂໍ້ມູ ຈາກກຸ່ມກອງກຳລັງປົກປ້ອງ ປະຊາຊົນຢູ່ຣັຖກະຫຣ່ຽງ ແລະ ປາໂອ. ຢູ່ໃນຖແລງການອອກມາ ໃນວັນທິດ ໄດ້ລະບຸວ່າ ທະຫານພະມ້າ ໄດ້ກວາດລ້າງ ບ້ານນ້ຳເນນ ທີ່ຕັ້ງຢູ່ຫ່າງຈາກ ນະຄອນຫລວງ ເນປິດໍ ໄປທາງພາກຕາເວັນອອກ 50 ກິໂລແມັດ.
ເຈົ້າໜ້າທີ່ຖແລງຂ່າວ ຈາກກຸ່ມກອງກຳລັງ ປົກປ້ອງປະຊາຊົນ ຣັຖກະຫຣ່ຽງ ທີ່ເຂົ້າມາຮອດເຂດດັ່ງກ່າວ ຫຼັງຈາກ ທີ່ຊາວບ້ານຖືກສັງຫານແລ້ວ, ໄດ້ກ່າວວ່າ:
“ຜູ້ເຄາະຮ້າຍ ສ່ວນຫຼາຍ ຖືກຍິງໃສ່ຫົວ”.
ເຈົ້າໜ້າທີ່ທ່ານນີ້ ກ່າວວ່າ:
“ພວກເຮົາສາມາດຢືນຢັນວ່າ ທະຫານພະມ້າ ເຂົ້າໄປໃນໝູ່ບ້ານ ພວກເຮົາຢືນຢັນວ່າ ປະຊາຊົນຖືກສັງຫານ ທັງໝົດຖືກຍິງເສັຽຊີວິດ. ຂ້ອຍຄິດວ່າ ທະຫານພະມ້າທັງໝົດ ມາຈາກກອງທັບພາກ 66.”
ທ່ານກ່າວວ່າ ກຸ່ມກອງກຳລັງປົກປ້ອງ ປະຊາຊົນ ໄດ້ເອົາສົບຜູ້ເສັຽຊີວິດ ໄປສັນນະສູດອັດຕະລັກ.
ທ່ານ ລິນ ລິນ ເຈົ້າໜ້າທີ່ຖແລງຂ່າວ ປະຈຳສະຫະພັນ ກູ້ຊາຕກະຫຣ່ຽງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ ທະຫານພະມ້າ ໄດ້ມາປະຈຳຢູ່ບ້ານ ພາ ຢາ ຕາ ອາງ ໄດ້ເຂົ້າໄປໝູ່ບ້ານ ນ້ຳເວນ ຈາກພາກຕາເວັນອອກ ແລະ ເຣີ່ມຍິງປືນໃສ່ໝູ່ບ້ານ ເວລາ 5 ໂມງເຊົ້າ ໃນວັນທີ 11 ມີນາ ແລະ ສົບຜູ້ເສັຽຊີວິດຖືກພົບເຫັນ ໃນຕອນສວາຍຕໍ່ຂອງມື້ຕໍ່ມາ. ທ່ານ ກ່າວວ່າ ພວກເຮົາໄດ້ຍິນສຽງ ປະຊາຊົນຮ້ອງໄຫ້ ຂໍຊີວິດ ໃນຕອນ 7 ໂມງແລງ ແລະ ໃນວັນທີ 11 ຕໍ່ມາ ພວກເຮົາໄດ້ຍິນສຽງປືນ. ພວກເຮົາບໍ່ຄິດວ່າ ທະຫານພະມ້າ ຈະຂ້າປະຊາຊົນຫຼາຍປານນີ້. ພວກເຮົາເຫັນສົບຜູ້ເສັຽຊີວິດ ທີ່ພວກທະຫານພະມ້າ ໄດ້ເອົາມາກອງໄວ້ ເຊິ່ງສົບເຂົາເຈົ້າເຕັມໄປດ້ວຍເລືອດ ເຂົາເຈົ້າຖືກຍິງໃສ່ຫົວ.
ມີປະຊາຊົນປະມານ 1,400 ຄົນ ຢູ່ບ້ານນ້ຳເນນ ແລະ ພື້ນທີ່ໃກ້ຄຽງ ໄດ້ພາກັນໜີອອກຈາກບ້ານເຮືອນຂອງຕົນເອງ ແລະ ໄດ້ໄປພັກຢູ່ນຳຍາດພີ່ນ້ອງ ຢູ່ບ້ານອື່ນ ຫຼື ຢູ່ວັດ. ເຈົ້າໜ້າທີ່ບັນເທົາທຸກ ທ່ານນຶ່ງ ໄດ້ກ່າວຕໍ່ວິທຍຸ ເອເຊັຽເສຣີ ວ່າ:
“ປະຊາຊົນ ໝົດບ້ານ ຕ້ອງພາກັນໜີໄປ ຢູ່ບ່ອນປອດໄພ.”
ປະຊາຊົນກ່າວວ່າ ທະຫານພະມ້າ ໂຈມຕີທາງອາກາດ 5 ຄັ້ງ ໃນເຂດດັ່ງກ່າວ ໃນວັນທີ 11 ມີນາ ແລະ ໄດ້ເຜົາບ້ານເຮືອນຂອງ ປະຊາຊົນ ປະມານ 60 ຫຼັງ ໃນຕອນເຊົ້າມື້ຕໍ່ມາ. ທ່ານ ຂຸນ ເບັນຈາມິນ ໂຄສົກກອງກຳລັງ ປົກປ້ອງປະຊາຊົນ ຣັຖ ປາ ອູ ໄດ້ກ່າວວ່າ ໃນຈຳນວນຜູ້ທີ່ຖືກສັງຫານ ຈາກທະຫານພະມ້າ ເປັນພຣະສົງ ລວມທັງ ເຈົາອາທິການວັດ ລວມທັງມີແມ່ຍິງ ອາຍຸປະມານ 20 ປີ ແລະ ຜູ້ຊາຍອີກ 17 ຄົນ.
ໂຄສົກກອງກຳລັງ ປົກປ້ອງປະຊາຊົນ ຣັຖປາອູ ກ່າວຕື່ມວ່າ ພວກເຮົາໄດ້ພົບລູກປືນ ຂນາດ 5.56 ມມ ແລະ ກະສອບລູກປືນ ທີ່ຖືກໃຊ້ໃນການສັງຫານໝູ່ ເຊິ່ງມີເຄື່ອງໝາຍວ່າ Ka Pa Sa ເຊິ່ງເປັນສັນຍາລັກ ຂອງອາວຸດຂອງທະຫານພະມ້າ ທີ່ຜລິດໂດຍໂດຍໂຮງງານ ຜລິດອາວຸດ ຂອງກະຊວງປ້ອງກັນປະເທດພະມ້າ, ຢູ່ບໍລິເວນວັດ ພວກເຮົາໄດ້ພົບລູກປືນຄົກ ທີ່ພວກທະຫານພະມ້າ ໄດ້ນຳໃຊ້ ເພື່ອເພື່ອເບີກທາງ ໃຫ້ມີການບຸກໂຈມຕີ ທາງພາກພື້ນດິນ. ທ່ານ ເບນ ຈາ ມິນ ໄດ້ກ່າວວ່າ ໄດ້ພົບສົບຜູ້ເສັຽຊີວິດເພີ່ມເຕີມ ຢູ່ທາງພາກຕາເວັນຕົກ ຂອງໝູ່ບ້ານ ແລະ ພວກເຮົາພະຍາຍາມ ຈະສັນນະສູດສົບເຂົາເຈົ້າ, ຜູ້ຖືກເຄາະຮ້າຍທັງໝົດ ພາກັນໄປລີ້ຢູ່ຫ້ອງໃຕ້ດິນ ພາຍໃນວັດ ແລະ ພວກທະຫານພະມ້າພົບພວກເຂົາ ແລ້ວນຳເຂົາເຈົ້າ ມາຢູ່ຕໍ່ໜ້າວັດ ກ່ອນທີ່ຈະກະທຳການສັງຫານ ອີງຕາມຂໍ້ມູນ ຈາກທ່ານເບນຈາມິນ.
ທະຫານພະມ້າ ໄດ້ບຸກທະລາຍ ສະມາຊິກສັນນິບາດ ແຫ່ງຊາຕ ເພື່ອປະຊາທິປະໄຕ ແລະ ໄດ້ໃຫ້ສານຕັດສິນ ຈຳຄຸກຕລອດຊີວິດ ສະມາຊິກພັກຫຼາຍຄົນ ຢູ່ ເຂດພາກໃຕ້ຂອງຣັຖສານ. ສານພະມ້າ ໄດ້ຕັດສິນປະຫານຊີວິດ ທ່ານ ເພກອນ ແລະ ທ່ານ ເມືອງເຢັນ ແລະ ທ່ານ ໂຈເຊບ ໃນຫຼາຍເດືອນທີ່ຜ່ານມາ.
ທ່ານ Phil Robertson ຮອງຜູ້ອໍານວຍການ ອົງການສິ້ງຊອມ ດ້ານສິດທິມະນຸສຫຼື Human Rights Watch ປະຈໍາອາເຊັຽ ຕາເວັນອອກ ສຽງໃຕ້ ກ່າວຕໍ່ ສຳນັກຂ່າວຕ່າງປະເທດວ່າ:
“ພວກເຮົາຈະເຫັນວ່າ ບໍ່ມີການເຄົາຣົບສິດທິມະນຸສ ໃນພະມ້າ ນັບແຕ່ມີການ ຣັຖປະຫານ. ດ້ວຍຄວາມສັດຈິງ ທ່ານ ຈະຄິດພາບເຫັນເລີຍວ່າ ມັນເປັນສະຖານະ ການທີ່ບໍ່ດີ ທີ່ທະຫານກໍ່ອາຊຍາກັມ ຕໍ່ປະຊາຊົນໂຕເອງ.”
ນອກຈາກນີ້, ສານທະຫານພະມ້າ ຢູ່ພາກເໜືອເຂດຣັຖສະກາງ ໄດ້ສັ່ງຕັດສິນຈຳຄຸກ ຜູ້ຍິງຊາວພະມ້າ 9 ຄົນ ເປັນເວລາ 12 ປີ ຍ້ອນພວກເຂົາຖືກກ່າວຫາວ່າ ເປັນກຸ່ມກອງກຳລັງ ປົກປ້ອງປະຊາຊົນ ຫຼື PDF.
ກຸ່ມກອງກຳລັງ ປົກປ້ອງປະຊາຊົນ ຖືກຈັດຕັ້ງຂຶ້ນ ໂດຍປະຊາຊົນພະມ້າ ເພື່ອຕໍ່ຕ້ານກຸ່ມທະຫານ ພະມ້າທີ່ຣັຖປະຫານຍຶດອຳນາດ ຈາກຣັຖບານພະມ້າທີ່ມາຈາກ ການເລືອກຕັ້ງໃນເດືອນກຸມພາ 2021 ທີ່ຜ່ານມາ. ບັນດາຜູ້ຍິງທັງ 9 ຄົນຖືກດຳເນີນຄະດີ ພາຍໃຕ້ກົດໄອຍະການເສິກ ຂອງທະຫານພະມ້າ ໂດຍສານທະຫານພະມ້າ ແລະ ເຂົາເຈົ້າຖືກຕັດສິນຈຳຄຸກ ໃນເດືອນຕຸລາ 2022 ທີ່ຜ່ານມາ ອີງຕາມແຫຼ່ງຂ່າວ ທີ່ໃກ້ຊິດຄ້າຍຄຸມຂັງ ແລະ ເຈົ້າໜ້າທີ່ກຸ່ມກອງກຳລັງ ປົກປ້ອງປະຊາຊົນ. ຂໍ້ມູນດັ່ງກ່າວ ຕ້ອງໃຊ້ເວລາ 1 ເດືອນ ກ່ອນທີ່ຈະມີການເຜີຍແຜ່ ຍ້ອນວ່າ ເຈົ້າໜ້າທີ່ທະຫານພະມ້າ ບໍ່ໄດ້ແຈ້ງໃຫ້ຄອບຄົວ ຜູ້ທີ່ຖືກສັ່ງຈຳຄຸກຮັບຮູ້. ຜູ້ຍິງທີ່ຖືກສານຕັດສິນທັງໝົດ ມີອາຍຸປະມານ 20 ປີ ເຂົາເຈົ້າໄດ້ຖືກຈັບໂຕ ໃນເວລາທີ່ທະຫານພະມ້າ ໄດ້ບຸກລະທາຍຄ້າຍ ຂອງກຸ່ມກອງກຳລັງ ປົກປ້ອງປະຊາຊົນ ຢູ່ເມືອງກາເລ ໃນວັນທີ 16 ພຶສຈິກາ 2021 ທີ່ຜ່ານມາ ເຊິ່ງເຂົ້າເຈົ້າຖືກຄຸມ ຂັງຢູ່ໃນຄຸກເມືອງກາເລ. ພວກເຂົາແຕ່ລະຄົນ ໄດ້ຮັບໂທດຈຳຄຸກ 2 ປີ ພາຍໃຕ້ມາຕຣາ 505 ແລະ ອີກ 10 ປີ ພາຍໃຕ້ມາຕຣາ 50 ຂອງກົດໝາຍຕ້ານ ການກໍ່ການຮ້າຍ ຂອງທະຫານພະມ້າ. ເຈົ້າໜ້າທີ່ກຸ່ມກອງກຳລັງ ປົກປ້ອງປະຊາຊົນ ຜູ້ທີ່ບໍ່ປະສົງອອກຊື່ ໄດ້ກ່າວວ່າ:
“ແມ່ຍິງເຫຼົ່ານັ້ນ ບໍ່ໄດ້ໂທດໜັກ ແຕ່ ເຂົາເຈົ້າກໍຖືກບັງຄັບ ໃຫ້ເຮັດວຽກຢູ່ໃນຄຸກ.”
ທ່ານ ກ່າວຕື່ມອີກວ່າ:
“ແມ່ຍິ່ງເຫຼົ່ານັ້ນ ທີ່ຢູ່ໃນຄຸກ ຍັງມີສຸຂພາບທີ່ດີ ເຂົາເຈົ້າເຮັດວຽກຕາມທີ່ເຈົ້າໜ້າທີ່ສັ່ງ ໂດຍເຂົາເຈົ້າເຮັດວຽກຕັດຫຍິບ.”
ແມ່ຍິງທີ່ຖືກຈັບນັ້ນ ຊື່ວ່າ ລາ ຕັນ ຫວີ, ມາ ສອນ ດວງ, ຄາ ລອນ ສານ, ລາ ມອມ ຄາມ, ວັນ ລາ ລອນ, ມາ ລາ ປຽນ ເປວ, ຊາມ ຊູ ຊາ ອຳ, ແມນ ລຳ ດິມ, ນິ ອອງ ດອນ ກິອຽນ.
ນາງ ລາ ຕັນ ຫວີ ໄດ້ບອກຄອບຄົວຂອງລາວ ວ່າ ຜູ້ຍິງທັງໝົດ ຖືກທະຫານພະມ້າຈັບໂຕໄປ ເປັນເວລາ ເກືອບ 5 ເດືອນ. ໃນເວລານັ້ນ, ເຂົາເຈົ້າບໍ່ສາມາດຕິດຕໍ່ຫາໃຜໄດ້ ຢູ່ນອກຄຸກ. ຕໍ່ມາເຂົາເຈົ້າຈຶ່ງໄດ້ຮັບອະນຸຍາດໃຫ້ຕິດຕໍ່ຫາຄອບຄົວ ແຕ່ວ່າ ບໍ່ອະນຸຍາດໃຫ້ບອກຄອບຄົວວ່າ ເຂົາເຈົ້າຖືກສານຕັດສິນຕອນໃດ ເຊິ່ງຂໍ້ມູນດັ່ງກ່າວ ຫາກໍ່ຖືກຮັບຮູ້ໃນເດືອນພຶສຈິກາ ທີ່ຜ່ານມາ ໂດຍ ຜ່ານທະນາຍຄວາມ ແລະ ເຈົ້າໜ້າທີ່ຄຸກ. ຜູ້ເປັນພໍ່ຂອງນາງ ລາ ຕັນ ຫວີ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າວ່າ:
“ໄດ້ຮັບການຕິດຕໍ່ມາ ຫຼື ຈາກທີ່ລູກສາວ ຂອງຕົນທີ່ຖືກຈັບໄດ້ເປັນເວລາ 5 ເດືອນປາຍ. ລູກສາວຂອງຕົນ ຖືກທະຫານພະມ້າສອບສວນ ແລະ ບໍ່ຮູ້ວ່າລາວດຳລົງຊີວິດແນວໃດ. ປັດຈຸບັນ ໄດ້ສົ່ງເຄື່ອງຂອງທີ່ລາວຕ້ອງການທຸກໆ 2 ເດືອນ. ກຳລັງລໍຖ້າການກັບມາ ຂອງລູກສາວ.”
ພໍ່ຂອງລາວ ໄດ້ກ່າວຕື່ມອີກວ່າ ບໍ່ໄດ້ຮັບອະນຸຍາດໃຫ້ ຈ້າງທະນາຍຄວາມ, ບໍ່ມີສິດທີ່ຈະເຂົ້າຮັບຟັງການຕັດສິນຂອງສານ ແລະ ເຈົ້າໜ້າທີ່ບໍ່ໄດ້ແຈ້ງໃຫ້ຮູ້ ເຖິງການຕັດສິນ ຈະໄດ້ຮັບຜູ້ກໍພຽງແຕ່ ໄດ້ຮັບຂໍ້ມູນຈາກເຟສບຸກເທົ່ານັ້ນ.
ມີຜູ້ຍິງຢູ່ພະມ້າ ຖືກສັງຫານທັງໝົດ 370 ຄົນ, 3,000 ປາຍຄົນ ຖືກຈັບ, ແລະ 127 ຄົນ ຖືກທະຫານພະມ້າຂົ່ມຂືນ ນັບຕັ້ງທະຫານພະມ້າເຂົ້າມາຍຶດອຳນາດ ໃນເດືອນກຸມພາ 2021 ທີ່ຜ່ານມາ ອີງຕາມຖແລງການ ຂອງຣັຖບານແຫ່ງຊາຕ ຂອງພະມ້າ ທີ່ຢູ່ຝ່າຍກົງກັນຂ້າມ ກັບຝ່າຍທະຫານພະມ້າ ທີ່ຍຶດອຳນາດ.