ກະຊວງການຕ່າງປະເທດຂອງຈີນ ໄດ້ປກາດ ໃນວັນຈັນທີ່ຜ່ານມາວ່າ ຣັຖມົນຕຣີຕ່າງປະເທດອິນໂດເນເຊັຽ, ໄທຍ, ຟິລິປິນສ໌ ແລະ ພະມ້າ ມາປະຊຸມ ຢູ່ປະເທດຈີນ ແຕ່ວັນທີ 31 ມີນາ ຫາ ວັນທີ 3 ເມສາ ອີງຕາມການເຊີນຂອງ ທ່ານ ຫວັງ ອີ ຣັຖມົນຕຣີຕ່າງປະເທດຈີນ.
ມີຣັຖມົນຕຣີປະເທດອາຊ້ຽນຈຳນວນນຶ່ງ ຈະຕິດຕາມຜູ້ນຳຂອງໂຕເອງ ມາຮ່ວມປະຊຸມລະຫວ່າງ ຜູ້ນຳອາຊຽນ ແລະ ປະທານາທິບໍດີ ສະຫະຣັຖ ທ່ານ ໂຈ ບາຍເດັນ ທີ່ມີກຳນົດຈັດຂຶ້ນແຕ່ວັນທີ 28-29 ມີນາ, ແຕ່ ກອງປະຊຸມດັ່ງກ່າວ ໄດ້ຖືກເລື່ອນອອກໄປ ຍ້ອນວ່າ ມີບັນຫາ ເວລາບໍ່ຕຣົງກັນ.
ເຈົ້າໜ້າທີ່ອາວຸໂສ ຂອງຄະນະຣັຖບານຂອງ ປະທານາທິບໍດີ ໂຈ ບາຍເດັນ ໃນວັນທີຈັນທີ່ຜ່ານມາ ກໍໄດ້ສະແດງຄວາມຜິດຫວັງທີ່ບໍ່ສາມາດ ຕົກລົງເວລາເຣື່ອງການປະຊຸມກັນໄດ້ ແຕ່ ກໍມີການຢືນຢັນວ່າ ຈະກຳນົດຫາວັນເວລາຈັດກອງປະຊຸມຄືນໃໝ່. ເຈົ້າໜ້າທີ່ຜູ້ທີ່ບໍ່ປະສົງອອກຊື່ ໄດ້ກ່າວວ່າ ພວກເຮົາເຊື່ອ ຈະມີການກຳນົດເວລາຄືນ ແລະ ພວກເຮົາຈະພະຍາຍາມເຮັດໃຫ້ໄດ້. ພວກເຮົາເຮັດວຽກຢ່າງໃກ້ຊິດກັບ ບັນດາປະເທດອາຊຽນ ເພື່ອພະຍາຍາມກຳນົດເວລາ ທີ່ເໝາະສົມໃຫ້ມີການປະຊຸມໃຫ້ໄດ້.
ໃນວັນອັງຄານ ທີ່ຜ່ານມາ ທ່ານ ໂຈ ບາຍເດັນ ປະທານາທິບໍດີ ສະຫະຣັຖ ກໍໄດ້ ປະຊຸມກັບ ທ່ານ ລີ່ ຊຽນ ລູງ ນາຍົກຣັຖມົນຕຣີ ສິງກະໂປ ຢູ່ ທຳນຽບຂາວ ປະເທດສະຫະຣັຖອາເມຣິກາ. ທ່ານ ລີ່ ຊຽນ ລູງ ໄດ້ຮຽກຮ້ອງໃຫ້ມີການຮັດແໜ້ນສາຍສຳພັນ ອາຊຽນ-ສະຫະຣັຖ ໃຫ້ໃກ້ຊິດກວ່າເກົ່າ ແລະ ທ່ານ ຍັງ ສະແດງຄວາມຮູ້ບຸນຄຸນ ສຳລັບພັນທະຍາສັນຍາ ຂອງສະຫະຣັຖ ທີ່ມີຕໍ່ຂົງເຂດເອເຊັຽ-ປາຊິຟິກ.
ທ່ານ ລີ່ຊຽນລູງ ຍັງກ່າວວ່າ:
" ມັນເປັນການຊ່ວຍໃຫ້ ຣັຖຫະຣັຖອາເມຣິກາ ມາຢູ່ໃນເຂດເອເຊັຽປາຊິຟິກ ແລະ ເພື່ອທະວີສາຍສຳພັນ ກັບເພື່ອນມິດຫຼາຍປະເທດ ແລະ ເສີມຂຍາຍຜົລປໂຍດ ທາງຍຸທສາດ ໃນຂົງເຂດນີ້ ."
ທ່ານ ລີ່ ຊຽນ ລູງ ນາຍົກຮັຖມົນຕຣີ ສິງກາໂປ ໄດ້ກ່າວຕອນນຶ່ງວ່າ:
" ສົງຄາມໃນ ຢູເຄຼນ ມີຄວາມກ່ຽວພັນກັນກັບ ຂົງເຂດເອເຊັຽ - ປາຊິຟິກ ມີຄວາມເປັນໄປໄດ້ທີ່ຈະເກີດຂໍ້ຂັດແຍ່ງກັນ ໃນຂົງເຂດນີ້ ຊຶ່ງຍາກທີ່ຄວບຄຸມໄດ້ ແລະ ຈະນຳໄປສົ່ງຂໍ້ຂັດແຍ່ງກັນ . ປະເທດທີ່ມີສ່ວນກ່ຽວຂ້ອງ ໃນຂົງເຂດນີ້ ຈຳເປັນຕ້ອງ ສຸມທຸກຄວາມພະຍາຍາມ ໃນການແກ້ໄຂຂໍ້ຂັດແຍ່ງດ້ວຍສັນຕິວິທີ ."
ການກຳນົດວັນເວລາ ຈັດກອງປະຊຸມອາຊຽນ-ສະຫະຣັຖ ຄືນໃໝ່ ເກີດຂຶ້ນຖ່າມກາງ ສົ່ງຄາມລະຫວ່າງ ຣັຖເຊັຽ ກັບ ຢູເຄຼນ.
ປະທານາທິບໍດີ ໂຈ ບາຍເດັນ ໄດ້ກ່າວວ່າ ສົງຄາມໃນຢູເຄຼນ ຈະບໍ່ສາມາດແຍກອອກຈາກ ການດຳເນີນຍຸທສາດອິນໂດ-ປາຊິຟິກ ຂອງສະຫະຣັຖອາເມຣິກາ. ທ່ານ ຍັງກ່າວຢ້ຳວ່າ ຂົງເຂດອິນໂດ-ປາຊິຟິກ ຕ້ອງ “ເສຣີ ແລະ ເປີດກວ້າງ.”
ໃນສ່ວນຂອງຣັຖບານຈີນ ຍັງຄົງສະແດງບົດບາດ ເພື່ອໃຫ້ມີການຮ່ວມມື ກັບບັນດາປະເທດອາຊຽນ.
ໂຄສົກກະຊວງການຕ່າງປະເທດຂອງຈີນ ທ່ານ ຫວັງ ເຫວີນປິນ (Wang Wenbin) ໄດ້ກ່າວຕໍ່ນັກຂ່າວ ໃນວັນຈັນ ວ່າ ມີຣັຖມົນຕຣີ ຈາກ 4 ປະເທດອາຊຽນ ມາປະຊຸມຢູ່ ປະເທດຈີນ ເຊິ່ງມັນມີຄວາມສຳຄັນ ສຳລັບປະເທດອາຊຽນ ແລະ ຈີນ ແລະ ຄູ່ຮ່ວມງານ ສຳລັບການຮ່ວມມື ໂຄງການນຶ່ງແຖບ ນຶ່ງເສັ້ນທາງ ຫຼື One Belt One Road.
ການກຳນົດເວລາຈັດກອງປະຊຸມ ສຸດຍອດອາຊຽນ-ສະຫະຮັຖ ປະສົບບັນຫາ ຍ້ອນວ່າ ປະເທດທີ່ອຳນວຍຄວາມສດວກ ຄື ອິນໂດເນເຊັຽ ແລະ ປະເທດອາຊຽນ ຕົກລົງເຣື່ອງກຳນົດວັນເວລາໃນການປະຊຸມບໍ່ໄດ້.
ນາຍົກຮັຖມົນຕຣີ ຮຸນເຊນ ຂອງກັມພູຊາ ໃນຖານະປະທານໝູນວຽນອາຊຽນ ໄດ້ອະທິບາຍ ໃນວັນທີ 17 ມີນາ ວ່າ ໃນບັນດາ 10 ປະເທດອາຊຽນ ມີ 4 ປະເທດ ບໍ່ສາມາດເຂົ້າຮ່ວມກອງປະຊຸມກັບສະຫະຣັຖ ໃນວັນທີ 28-29 ມີນາ ໄດ້ ໃນຂະນະທີ່ປະເທດອື່ນໆ ກໍສເນີໃຫ້ມີການປະຊຸມ ໃນວັນທີ 26-27 ມີນາ.
ຜູ້ສັງເກດການ ໄດ້ຕັ້ງຂໍ້ສັງເກດວ່າ ການປະຊຸມຜູ້ນຳອາຊຽນ ຈະຖືກກົດດັນໃຫ້ເນັ້ນ ແລະ ເວົ້າຖືກບັນຫາສົງຄາມລະຫວ່າງ ຣັສເຊັຽ ແລະ ຢູເຄຼນ ທີ່ກຳລັງດຳເນີນໄປຢູ່.
ສະເພາະເຫດການ ຄວາມຄືບໜ້າໃນວັນທີ 1 ເມສາ ທີ່ຜ່ານມາ ກ່ຽວກັບສົງຄາມ ລະຫວ່າງ ຣັສເຊັຽ ແລະ ຢູເຄຼນ ກໍຄື ຣັສເຊັຽ ໄດ້ເນັ້ນປະຕິບັດການໂຈມຕີ ເຂດ ດອນບັສ (Donbas) ພາກຕາເວັນອອກຂອງຢູເຄຼນ ຫຼາຍຂຶ້ນ ຫຼັງຈາກ ທະຫານຢູເຄຼນ ໄດ້ຢຶດຄືນຫຼາຍເມືອງ ທີ່ຢູ່ ອ້ອມຮອບ ນະຄອນຫລວງ ຄຽບ (Kyiv) ຂອງ ຢູເຄຼນ ແລະ ໄດ້ຜັກດັນທະຫານຣັດເຊັຽອອກໄປ.
ສຳນັກຂ່າວ CNN ໄດ້ຣາຍງານ ໂດຍ ອ້າງຄໍເວົ້າຂອງ ທ່ານ ໂຈ ບາຍເດັນ ປະທານາທິບໍດີ ສະຫະຣັຖອາເມຣິກາ ໃນວັນພະຫັດ ທີ່ຜ່ານມາ ທີ່ເວົ້າໃຫ້ ຜູ້ນຳຣັສເຊັຽ ທ່ານ ວາລາເດເມັຽ ປູຕີນ ວ່າ:
" ຈົນ ມາ ເຖິງ ປັດ ຈຸ ບັນ ຍັງ ບໍ່ ມີ ຫຼັກ ຖານ ທີ່ ຊັດ ເຈນ ວ່າ ທ່ານ ວາ ລາ ເດ ເມັຽ ປູ ຕີນ ຈະ ຖອນ ທະ ຫານ ອອກ ຈາກ ນະ ຄອນ ຄຽບ ( Kyiv ) . ແຕ່ ຍັງ ມີ ຫຼັກ ຖານ ວ່າ ຜູ້ ນຳ ຣັ ດ ເຊັຽ ໄດ້ ສັ່ງ ໃຫ້ ມີ ການ ເພີ່ມ ກຳ ລັງ ທະ ຫານ ຢູ່ ໃນ ເຂດ ດອນບັສ ( Donbas ) ."
ໃນວັນພະຫັດ ທີ 31 ມີນາ ທ່ານ ວູລູດີເມັຽ ເຊເລັນສກີ້ ປະທານາທິບໍດີ ຢູເຄຼນ ກໍໄດ້ເຕືອນປະຊາຊົນຂອງຕົນ ເຖິງເວລາທີ່ຍາກລຳບາກຍັງຈະສືບຕໍ່ໄປອີກ ໂດຍສະເພາະ ຢູ່ໃນເຂດ ພາກຕາເວັນອອກ ຄື ດອນບັສ (Donbas) ແລະ ມາຣິອຸໂປລ໌ (Mariupol) ຕລອດເສັ້ນທາງ ໄປເມືອງ ຄາຣ໌ຄິບ (Kharkiv) ທະຫານຣັດເຊັຽ ກໍຍັງເພີ່ມລະດົມການໂຈມຕີ ຢ່າງຮຸນແຮງ. ທະຫານຢູ່ເຄຼນ ກໍຈະປົກປ້ອງຕົນເອງ.
ທ່ານ ເຊເລັນສກີ້ ກ່າວຕື່ມອີກວ່າ: ສຖານະການ ຢູ່ເສັ້ນທາງພາກໃຕ້ ແລະ ໃນເຂດ Donbas ຍັງຄົງມີຄວາມຫຍຸ້ງຍາກຫຼາຍ.
ທ່ານ Jens Stoltenberg ເລຂາທິການ ນາໂຕ ໄດ້ກ່າວວ່າ ເຂດ Donbas ຈະມີຄວາມໜັກໜ່ວງ. ຣັສເຊັຽ ໄດ້ມີການຈັດກອງທັບຄືນ, ຈັດຫາອາວຸດມາອີກ ແລະ ເພີ່ມທະວີການໂຈມຕີ ເຂດ Donbas.
ທະຫານຣັດເຊັຽ ໄດ້ມີການໂຈມຕີຫຼາຍເສັ້ນທາງ ໃນຂະນະທີ່ພົລເຮືອນ ຈຳນວນຫຼາຍ ຍັງຕິດຄ້າງຢູ່ໃນເຂດທີ່ມີການສູ້ຣົບກັນ ແລະ ການອົພຍົບກໍມີຄວາມຫຍຸ້ງຍາກ ຍ້ອນວ່າຝ່າຍຣັສເຊັຽ ມີການໂຈມເສັ້ນທາງອົພຍົມ ເຖິງວ່າ ທີ່ຜ່ານມາ ທັງສອງຝ່າຍມີການເຈຣະຈາກັນ ແລະ ຕົກລົງໃຫ້ເປີດເສັ້ນທາງໃຫ້ແກ່ຜູ້ອົພຍົບ ກໍຕາມ.
ຄະນະກັມການກາແດງສາກົລ ຢູ່ເມືອງ Mariupol ໄດ້ກ່າວວ່າ ເຈົ້າໜ້າທີ່ກາແດງ ບໍ່ສາມາດເຂົ້າໄປເຖິງພື້ນທີ່ ທີ່ຖືກຢຶດຄອງໄດ້ ເພື່ອວ່າ ເຂົາເຈົ້າຈະໃຫ້ຄວາມຊ່ວຍເຫຼືອພົລເຮືອນ.
ຄະນະກັມການກາແດງສາກົລ ໄດ້ອອກຖແລງການ ວ່າ ເຈົ້າໜ້າທີ່ກາ 9 ທ່ານ ທີ່ຢູ່ໃນຣົຖ 3 ຄັນ ຕ້ອງໄດ້ເດີນທາງກັບ ຍ້ອນວ່າ ສະພາບການມີຄວາມຫຍຸ້ງຍາກ ແລະ ເປັນໄປບໍ່ໄດ້ທີ່ຈະເຂົ້າເຖິງເມືອງ Mariupol ໃນຂະນະທີ່ ເຈົ້າໜ້າທີ່ກາແດງ ກຳລັງວາງແຜນເດີນທາງໄປໃນພື້ນທີ່ອີກຄັ້ງ ໃນວັນເສົານີ້.
ຖແລງການ ໄດ້ກ່າວວ່າ ການດຳເນີນການໃຫ້ປະສົບຜົລສຳເຣັດ ມັນມີຄວາມຈຳເປັນຢ່າງຍິ່ງ ທີ່ທຸກຝ່າຍ ຕ້ອງເຄົາຣົບຂໍ້ຕົກລົງ ແລະ ເງື່ອນໄຂທີ່ຈຳເປັນ ແລະ ຮັບປະກັນຄວາມປອດໄພ.
ຄະນະກັມການກາແດງສາກົລ ກ່າວວ່າ ເຈົ້າໜ້າທີ່ກາແດງດໍາເນີນການດ້ວຍຄວາມເປັນກາງ ເພື່ອໃຫ້ຂະບວນຣົຖອອກຈາກເມືອງ Mariupol ໄປຫາ ອີກເມືອງນຶ່ງຂອງ Ukraine.
ຄະນະກັມການກາແດງສາກົລ ຍັງກ່າວວ່າ: ພວກເຮົາມາເຮັດວຽກເພື່ອມະນຸສທັມ ຕາມແຜນການອົພຍົບຄົນ ໃຫ້ການປົກປ້ອງຂບວນຣົຖ ຜູ້ອົພຍົບ, ແລະ ເຕືອນທຸກຝ່າຍໃຫ້ຮູ້ເຖິງພົລເຮືອນ, ການດໍາເນີນງານເພື່ອມະນຸສທັມ.
ມີຣາຍງານວ່າ ມີປະຊາຊົນ 2,000 ຄົນ ທີ່ຍັງຕົກຄ້າງຢູ່ໃນເຂດທີ່ມີການຢຶດຄອງ ຢູ່ເມືອງ Mariupol ກຳຢູ່ຖືກອົພຍົບໄປເມືອງ Zaporizhia. ອົງການການແດງສາກົລ ຍັງພະຍາຍາມ ທີ່ຈະເຂົ້າໄປເຖິງໂຕເມືອງ ແຕ່ ກໍບໍ່ສາມາດເຮັດໄດ້, ແຕ່ ກໍຈະພະຍາຍາມອີກຄັ້ງໃນວັນເສົາ.
ເຈົ້າໜ້າທີ່ ໄດ້ກ່າວວ່າ ມີປະຊາຊົນຫຼາຍກວ່າ 1 ແສນ ຄົນ ທີ່ຍັງຕິດຄ້າງ ຢູ່ໃນເມືອງ Mariupol. ນອກຈາກນີ້ ຜູ້ນຳທາງທະຫານ Donetsk ທີ່ເປັນຝ່າຍຂອງ ຢູເຄຼນ ໄດ້ກ່າວ ໃນວັນສຸກທີ່ຜ່ານມາວ່າ ທະຫານຣັສເຊັຽ ບໍ່ອະນຸຍາດ ໃຫ້ການຊ່ອຍເຫຼືອດ້ານມະນຸສທັມ ເຂົ້າເຖິງເມືອງ Mariupol ໂດຍສະເພາະ ເຂດທີ່ມີການປິດລ້ອມ. ທ່ານ Kyrylenko ຜູ້ນຳທາງທະຫານ Donetsk ໄດ້ກ່າວຖແລງທາງໂທລະທັດວ່າ ເມືອງດັ່ງກ່າວ ຍັງຄົງຖືກປິດລ້ອມ ແລະ ທະຫານຣັສເຊັຽ ບໍ່ປະຕິບັດຕາມສັນຍາ ແລະ ບໍ່ອະນຸຍາດໃຫ້ມີການສົ່ງເຄື່ອງຊ່ອຍເຫຼືອ.