ດ່ານເຂົ້າເມືອງຂອງໄທເຄັ່ງຄັດ

ສື່ມວນຊົນ ໄທ ຣາຍງານ ວ່າ ເຈົ້າຫນ້າທີ່ ກວດຄົນ ເຂົ້າເມືອງ ຂອງໄທ ຈະ ກວດສອບ ເດັກນ້ອຍ ລາວ ທີ່ ຈະເດີນທາງ ເຂົ້າໄປ ໄທ ທີ່ ບໍ່ມີ ຜູ້ ຕິດຕາມ ຢູ່ຕາມ ດ່ານຕ່າງໆ ໂດຍ ສະເພາະ ທີ່ ດ່ານ ໜອງຄາຍ ວຽງຈັນ ເພື່ອ ປ້ອງກັນ ການ ຄ້າມະນຸດ ແລະ ຄ້າ ແຮງງານ ໃນ ໄທ.

ເຈົ້າຫນ້າທີ່ ໄທ ເວົ້າວ່າ ການ ກະທຳ ດັ່ງກ່າວ ກໍ ເພື່ອ ປ້ອງກັນ ເດັກນ້ອຍ ລາວ ຈາກ ການຖືກ ຍົວະ ໄປຂາຍ ບໍຣີການ ທາງ ເພດ ໃນໄທ ແຕ່ ເຈົ້າຫນ້າທີ່ ລາວ ຍັງບໍ່ໄດ້ ຮັບ ແຈ້ງການ ຈາກ ຝ່າຍໄທ ກ່ຽວກັບ ເຣື້ອງນີ້ ເທື່ອ.

ຫນັງສືພີມ ຜູ້ຈັດການ ອອນລາຍ ຂອງໄທ ຣາຍງານ ໃນ ວັນສຸກ ຜ່ານມາ ທີ່ ອ້າງຕາມ ຄຳເວົ້າ ຂອງ ເຈົ້າຫນ້າທີ່ ໄທ ວ່າ ການ ກວດກາ ດັ່ງກ່າວ ສາມາດ ປ້ອງກັນ ເດັກນ້ອຍ ຍິງລາວ ກວ່າ 1 ຮ້ອຍຄົນ ຈາກການ ຕົກເປັນ ເຫຍື່ອ ຂອງກຸ່ມ ຄ້າມະນຸດ.

ການ ກວດກາ ສ່ວນໃຫຍ່ ຈະເນັ້ນໃສ່ ເດັກນ້ອຍ ແມ່ຍິງ ທີ່ ມີ ອາຍຸ ຕ່ຳກວ່າ 18 ປີ ຊື່ງ ກຸ່ມ ດັ່ງກ່າວ ຈະເປັນ ເປົ້າໝາຍ ຂອງ ຂະບວນການ ຄ້າມະນຸດ ໃນໄທ. ອີງຕາມ ການ ຣາຍງານ ເດັກນ້ອຍ ລາວ ອາຍຸ ຕ່ຳກວ່າ 18 ປີ ທີ່ບໍ່ມີ ຜູ້ ປົກຄອງ ຕິດຕາມ ມານຳ ກ່ອນ ຈະເຂົ້າ ໄປໄທ ຕ້ອງ ມີການ ສືບສວນ ເປັນ ກໍຣະນີ ພິເສດ.

ໃນການ ສອບສວນ ເຈົ້າຫນ້າທີ່ ຈະ ຕັກເຕືອນ ເຖິງ ອັນຕລາຍ ຈາກ ການຕົກ ເປັນເຫຍື່ອ ຂອງ ຂະບວນການ ຄ້າມະນຸດ ໃນໄທ ເພື່ອ ໃຫ້ ຂະເຈົ້າ ຮູ້ສຶກ ຕື່ນຕົວ ໃນ ເຫດການ ທີ່ ອາດ ຈະເກີດ ຂຶ້ນກັບ ເຂົາເຈົ້າ ໄດ້ ໃນ ປະເທດ ໄທ.