ເສຣີພາບ ຂອງຊາວ ຄຣິສຕຽນລາວ ຍັງຖືກຄຸກຄາມ
2022.06.02
ຊາວຄຣິສຕຽນລາວ ເຈົ້າຂອງເຮືອນທີ່ຖືກຈູດ ແລະ ເຈົ້າຂອງດິນນາ ທີ່ຖືກຍຶດ ຢູ່ບ້ານດົງສວັນ ເມືອງພະລານໄຊ ແຂວງສວັນນະເຂດ.
ນັກຂ່າວ ພົລເມືອງ
ກະຊວງການຕ່າງປະເທດ ສະຫະຣັຖອາເມຣິກາ ໄດ້ອອກບົດຣາຍງານປະຈຳປີ 2021 ກ່ຽວກັບເສຣີພາບການນັບຖືສາສນາໃນໂລກ ເຊິ່ງໃນນັ້ນປະເທດລາວ ກໍເປັນປະເທດນຶ່ງ ທີ່ຈຳກັດສິທໃນການນັບຖືສາສນາ ໂດຍ ສະເພາະຊາວຄຣິສຕຽນ. ບົດຣາຍານດັ່ງກ່າວ ໄດ້ລົງເຜີຍແຜ່ຢ່າງເປັນທາງການ ໃນວັນທີ 2 ມິຖຸນາ.
ກະຊວງການຕ່າງປະເທດ ສະຫະຣັຖອາເມຣິກາ ໄດ້ຍົກໃຫ້ເຫັນເຖິງກໍຣະນີ ອາຈານສີທົນ ທິບພະວົງ ຄູສອນສາສນາ ຢູ່ບ້ານກະລຶມວັງແຂ້ ເມືອງຊົນນະບູລີ ແຂວງສວັນນະເຂດ ຖືກສານຕັດສິນ ຕິດຄຸກເປັນເວລາ 1 ປີ ແລະ ປັບໃໝຫຼາຍລ້ານກີບ ໃນຂໍ້ຫາແບ່ງແຍກຄວາມສາມັກຄີ ແລະ ສ້າງຄວາມວຸ້ນວາຍ ໂດຍ ແມ່ນ ສານແຂວງສວັນນະເຂດ ເປັນຜູ້ຕັດສິນໃນ ໃນວັນທີ 6 ເມສາ 2021 ໂດຍ ຕັ້ງຂໍ້ຫາວ່າ ການຊຸມນຸມເຮັດກິຈກັມທາງສາສນາ ທີ່ຜິດຕໍ່ດຳລັດ 315 ເຊິ່ງເປັນດຳລັດຄຸ້ມຄອງ ເຣື່ອງສາສນາ.
ຫຼັງຈາກທີ່ໄດ້ຮັບການປ່ອຍໂຕແລ້ວ, ອາຈານ ສີທົນ ກໍຕົກລົງເຫັນດີ ບໍ່ເຄື່ອນໄຫວ ບໍ່ທຳພິທີສູດມົນອີກ ອີງຕາມຂໍ້ມູນຈາກເຈົ້າໜ້າທີ່ ທາງການແຂວງສວັນນະເຂດ.
ນອກຈາກນີ້ ຍັງມີຊາວຄຣິສຕຽນ 7 ຄົນ ຢູ່ບ້ານປາສິງ ເມືອງຕາໂອ້ຍ ແຂວງສາຣະວັນ ຖືກຊາວບ້ານຂັບໄລ່ອອກຈາກບ້ານ ໃນເດືອນຕຸລາ 2020 ແລະ ຊາວບ້ານທີ່ບໍ່ແມ່ນ ຊາວຄຣີສຕຽນ ພາກັນໄປມ້າງເຮືອນເຂົາເຈົ້າ.
ຊາວຄຣິຕຽນຈຳນວນ 7 ຄົນ ດັ່ງກ່າວ ຕ້ອງພາກັນໄປກາງເຕັ້ນນອນ ອາສັຍຢູ່ກາງແຈ້ງ ໃນຂະນະທີ່ລໍຖ້າໃຫ້ອຳນາດການປົກຄອງບ້ານ ມາແປງເຮືອນໃຫ້ເຂົາເຈົ້າ.
ນອກຈາກນີ້ ຣາຍງານຍັງລະບຸວ່າ ໃນເດືອນມົກກະຣາ 2021 ຊາວບ້ານຕາລູ ເມືອງຕະໂອ້ຍ ແຂວງສາຣະວັນ ໄດ້ຂັບໄລ່ຊາວຄຣິສຕຽນ 14 ຄົນ ຈາກບ້ານເຂົາເຈົ້າ ຍ້ອນເຂົາເຈົ້າບໍ່ເຊົານັບຖືສາສນາ ຄຣິສຕຽນ.
ໃນເດືອນກໍຣິກະດາ ແລະ ເດືອນສິງຫາ 2021, ອຳນາດການປົກຄອງບ້ານ ນ້ຳມອງ ເມືອງນາໝໍ້ ແຂວງອຸດົມໄຊ ໄດ້ນາບຂູ່ວ່າຈະຂັບໄລ່ ຊາວຄຣິສຕຽນ 6 ຄອບຄົວ ອອກຈາກບ້ານ ພາຍໃນທ້າຍປີ ຖ້າວ່າຊາວ ຄຣິສຕຽນດັ່ງກ່າວ ບໍ່ຍອມເຊັນເອກະສານ ໃຫ້ເຊົານັບຖືສາສນາຄຣິສຕຽນ. ໃນນັ້ນມີ 4 ຄອບຄົວ ຕ້ອງຍອມເຊັນເອກະສານ ເພື່ອເຊົານັບຖືສາສນາຄຣິສຕຽນ ດ້ວຍຄວາມຢ້ານກົວ.
ນອກຈາກນີ້ ຍັງມີກໍຣະນີ ຊາວບ້ານສິງສະຫວັນ ເມືອງອາດສະພອນ ແຂວງສະວັນນະເຂດ ຍັງໄດ້ນາບຂູ່ ເພື່ອຂັບໄລ່ ຊາວຄຣິສຕຽນ 3 ຄອບຄົວ ອອກຈາກບ້ານ ຖ້າເຂົາເຈົ້າບໍ່ເຊົານັບຖືສາສນາຄຣິສຕຽນ ແລະ ຊາວຄຣິສຕຽນບາງຄົນ ຕ້ອງຫັນມາຖືສາສນາພຸທ ຍ້ອນເຂົາເຈົ້າຢ້ານ.
ຣັຖທັມມະນູນແຫ່ງ ສປປ ລາວ ໄດ້ລະບຸວ່າ ພົລເມືອງລາວ ມີສິດຈະເຊື່ອຖື ຫຼື ບໍ່ເຊື່ອຖືສາສນາ. ຣັຖບານລາວ ຮັບຮູ້ ຢ່າງເປັນທາງການ 4 ສາສນາ ຫຼັກ ຄື: ສາສນາພຸທ, ສາສນາຄຣີສຕ໌, ສາສນາອິສລາມ ແລະ ສາສນາບາຮາຍ. ດຳລັດ 315 ໄດ້ລະບຸວ່າ ຣັຖບານເປັນຜູ້ອະນຸມັດ ການຈັດກິຈກັມທາງສາສນາ.
ສູນກາງແນວລາວສ້າງຊາດ ແລະ ກະຊວງພາຍໃນ ເປັນໜ່ວຍງານທີ່ຄຸ້ມຄອງ ກິຈກັມທາງສາສນາ.
ກຸ່ມທີ່ເຄື່ອນໄຫວທາງດ້ານສາສນາ ໃນຂັ້ນແຂວງ ຈະຕ້ອງໄດ້ຮັບອະນຸຍາດຈາກກະຊວງພາຍໃນ ແລະ ຖ້າຈະໄປເຂື່ອນໄຫວຢູ່ຂັ້ນເມືອງ ຈະຕ້ອງໄດ້ຮັບອະນຸຍາດຈາກຂັ້ນແຂວງກ່ອນ, ຖ້າຈະໄປເຄື່ອນໄຫວຢູ່ບ້ານ ຈະຕ້ອງໄດ້ຮັບອະນຸຍາດ ຈາກເຈົ້າໜ້າທີ່ຂັ້ນເມືອງ ຕາມຂັ້ນຕອນ.
ອີງຕາມຂໍ້ມູນຈາກຜູ້ນຳທາງສາສນາ, ຂໍ້ຂັດແຍ່ງສ່ວນຫຼາຍທີ່ເກີດຂຶ້ນຢູ່ໃນບ້ານ ທີ່ຢູ່ເຂດຫ່າງໄກ ບ່ອນທີ່ເຈົ້າໜ້າທີ່ຂັ້ນສູນກາງ ເຂົ້າໄປດຳເນີນການໄກ່ເກັ່ຽລຳບາກ.
ບັນຫາທີເກີດຂຶ້ນຢູ່ບ້ານທີ່ຢູ່ເຂດຫ່າງໄກ ກໍຄື ເຈົ້າໜ້າທີ່ຂັ້ນບ້ານ ທີ່ບໍ່ແມ່ນຊາວຄຣິສຕຽນ ຈະໄປບັງຄັບໃຫ້ຊາວບ້ານ ທີ່ເປັນຄຣິສຕຽນເຊົານັບຖືສາສນາຄຣິສຕຽນ.
ພົລເມືອງລາວທັງໝົດມີ 7.6 ລ້ານ ຄົນ ອີງຕາມການສຳຣວດໃນປີ 2021. ອັດຕຣາສ່ວນ ໃນການນັບຖືສາສນາຂອງຄົນລາວ ທີ່ມີການສໍາຣວດ ໃນປີ 2015 ຄື 64.7 ເປີເຊັນ ນັບຖືສາສນາພຸທ, 1.7 ເປີເຊັນ ນັບຖືສາສນາ ຄຣິສຕຽນ, 31.4 ເປີເຊັນ ບໍ່ໄດ້ນັບຖືສາສນາ, 2.1 ເປີເຊັນ ນັບຖືສາສນາອື່ນໆ.
ທັງໝົດທີ່ກ່າວໄປນັ້ນ ແມ່ນສ່ວນນຶ່ງຂອງດບົດຣາຍງານ ປະຈຳປີ 2021 ທີ່ກະຊວງການຕ່າງປະເທດສະຫະຣັຖ ໄດ້ລົງເຜີຍແຜ່ໃນວັນທີ 2 ມິຖຸນານີ້.
ນອກຈາກນີ້ ຍັງມີອີກຫຼາຍເຫດການທີ່ເກີດຂຶ້ນ ກໍຣະນີທີ່ຊາວຄຣິຕຽນລາວຖືກຄຸກຄາມ ໂຕຢ່າງເຫດການທີ່ເກີດຂຶ້ນ:
- ຊາວຄຣິສຕຽນລາວ ຄອບຄົວນຶ່ງ ຢູ່ບ້ານດົງສວັນ ເມືອງພະລານໄຊ ແຂວງສວັນນະເຂດ ທີ່ວ່າເຮືອນຖືກເຜົາໃນວັນທີ 10 ກຸມພາ 2022 ແລະດິນນາຖືກຍຶດ ໃນເດືອນທັນວາ ປີ ທາງຄະນະກັມມະການ ແກ້ໄຂບັນຫາຂໍ້ຂັດແຍ່ງ ໄດ້ເຊີນຊາວຄຣິສຕຽນລາວ ທີ່ເປັນຫົວໜ້າຄອບຄົວດັ່ງກ່າວ ພ້ອມດ້ວຍເຄືອຂ່າຍຊາວຄຣິສຕຽນລາວ ມາຫາລືກັນອີກເທື່ອນຶ່ງ ຢູ່ຫ້ອງການພາຍໃນເມືອງພະລານໄຊ, ແຕ່ ການແກ້ໄຂບັນຫາດັ່ງກ່າວ ຂອງພາກສ່ວນທີ່ກ່ຽວຂ້ອງ ກໍຍັງບໍ່ມີຄວາມຄືບໜ້າ.
ມາຮອດປັດຈຸບັນ ການແກ້ໄຂບັນຫາດັ່ງກ່າວ ຂອງພາກສ່ວນທີ່ກ່ຽວຂ້ອງ ກໍຍັງບໍ່ມີຄວາມຄືບໜ້າ.
ດັ່ງນາງ ແສງອາລຸນ ຊາວຄຣິສຕຽນລາວ ຜູ້ເສັຍຫາຍ ເຄີຍກ່າວຕໍ່ວິຍຸເອເຊັຽເສຣີ ໃນວັນທີ່ 15 ມິນາ ນີ້ວ່າ:
“ເພິ່ນວ່າຊິແກ້ໄຂ ແຕ່ເພິ່ນຍັງບໍ່ທັນແກ້ໄຂເທື່ອ ຢາກໃຫ້້ເຮັດຫັ້ນແຫຼະເນາະ ເພາະວ່າ ຂະນ້ອຍຢູ່ໃນດົງໃນປ່າທັງໝົດຫັ້ນ ຄອບຄົວຂະນ້ອຍຫັ້ນ ມື້ນັ້ນຕໍາຣວດມາ ເພິ່ນກະຍັງບໍ່ໄດ້ເວົ້າອິຫຍັງ ຍັງບໍ່ແລ້ວ.”
- ໃນເດືອນເມສາ 2021, ທີ່ຜ່ານມາ ຊາວຄຣິສຕຽນລາວ ຊົນເຜົ່າມົ້ງ 6 ຄອບຄົວ ຈຳນວນສະມາຊິກທັງໝົດ ເກືອບ 30 ຄົນ ຢູ່ບ້ານໂພນສະອາດ, ເມືອງຄຳເກີດ ແຂວງບໍຣິຄຳໄຊ ຖືກຍາດພີ່ນ້ອງ, ເຊິ່ງເປັນຜູ້ອາວຸໂສກວ່າ ພາກັນຂົ່ມເຫງ ແລະ ລົບກວນການໃຊ້ຊີວິຕປະຈຳວັນ ຍ້ອນບໍ່ພໍໃຈ ທີ່ທັງ 6 ຄອບຄົວດັ່ງກ່າວ ບໍ່ຍອມປະລະການເຊື່ອຖື ສາສນາຄຣິສຕຽນ.
ເມື່ອເດືອນເມສາ ປີ 2021 ທີ່ຜ່ານມານີ້ ໄດ້ເກີດເຫດການ ຊາວຄຣິສຕຽນລາວ ຊົນເຜົ່າອາຂ່າ 10 ຄອບຄົວ ມີຈໍານວນທັງໝົດ 27 ຄົນ ຢູ່ເມືອງຄັນ, ເມືອງລອງ ແລະ ບ້ານນໍ້າຢາງ ເມືອງຫຼວງນໍ້າທາ ແຂວງຫຼວງນໍ້າທາ ໄດ້ຖືກນາຍບ້ານ ແລະຊາວບ້ານ ພາກັນມ້າງເຮືອນ ແລະໄລ່ພວກເຂົາເຈົ້າອອກຈາກບ້ານ ຍ້ອນສາເຫດ ບໍ່ຍອມປະລະ ເຊື່ອຖື ສາສນາຄຣິສຕຽນ ເຮັດໃຫ້ປັດຈຸບັນ ພວກເຂົາເຈົ້າຕ້ອງອອກມາ ເຊົ່າຫ້ອງແຖວຢູ່ ພາຍໃນເມືອງຫຼວງນໍ້າທາ.