ຄຣູ,ນັກຮຽນ ສໍ້ຂໍ້ສອບ ຖືກໂທດ

ກົມຈັດຕັ້ງແລະພະນັກງານ ກະຊວງສຶກສາທິການແລະກິລາ ລົງໂທດພະນັກງານ ຄຣູ 4 ຄົນ ແລະນັກສືກສາ ຈໍານວນນນື່ງ ທີ່ມີສ່ວນຮ່ວມ ໃນການສໍ້ໂກງຂໍ້ສອບເສັງຊັ້ນ ມ.7 ປະຈໍາສົກປີ 2017-18 ໂດຍມີຜົນບັງຄັບໃຊ້ ນັບແຕ່ ວັນທີ 10 ກັນຍາ ເປັນຕົ້ນໄປ. ດັ່ງ ເຈົ້າໜ້າທີ່ ກະຊວງສຶກສາທິການ ແລະກິລາ ກ່າວຕໍ່ວິທຍຸເອເຊັຍເສຣີ ໃນວັນທີ່ 24 ກັນຍາ ນີ້ວ່າ:

“ເອົາເຂົາກໍປະຕິບັດເລີຍ ກໍມີການ ຂັ້ນຕອນຂອງມັນກ່ອນ ເນາະ ຫລັງຈາກນັ້ນ ກໍຄ່ອຍເຮັດ ມັນມີຂັ້ນຂອງການດໍາເນີນ ຂັ້ນ 1 ຂັ້ນ 2 ຂັ້ນ 3 ຂັ້ນ 4 ເນາະ.”

ອິງຕາມ ໜັງສືຣາຍງານ ຂອງກົມຈັດຕັ້ງ ແລະພະນັກງານ ເປິດເຜີຍວ່າມີພະນັກງານຄຣູ 4 ຄົນ ທີ່ຣະເມິດກົດຣະບຽບ ການສອບເສັງ ໂດຍ ກະຊວງສຶກສາທິການແລະກິລາ ເຫັນເປັນເອກພາບ ລົງໂທດ ບຸກຄົນດັ່ງຕໍ່ໄປນີ້:

1 ນາງແພງ ໄຊຍະສານ ເປັນຄຣູສອນ ປະຈໍາໂຮງຮຽນມັທຍົມ ການສຶກສາສົມບູນ ສີສັຕຕະນາກ ນະຄອນຫລວງ ວຽງຈັນ ມີເຈຕນາ ເອົາ ໂທຣະສັບເຂົ້າຫ້ອງສອບເສັງ ຖ່າຍເອົາຫົວຂໍ້ ບົດສອບເສັງ ໃຫ້ນັກຮຽນ ສົ່ງຕໍ່ໃຫ້ຫລານຕົນ. ການລົງໂທດຄື: ໂຈະການເລື່ອນຊັ້ນ ເວລາ 5 ປີ, ບໍ່ໃຫ້ເປັນຄນະກັມມະການ ສອບເສັງຕື່ມ ແລະ ບັນຖືກຄວາມຜິດໄວ້ ໃນປວັດຣັຖກອນ.

2 ນາງນາລີ ທັມມະວົງ ເປັນຄຣູສອນ ຢູໂຮງຮຽນ ມັທຍົມສຶກສາສົມບູນ ຫງຽນຢູ ມີຄວາມຜິດຍ້ອນ ແກ້ບົດສອບເສັງ ວິຊາພູມມິສາດ ມ.7 ສົ່ງ ຫົວຂໍ້ບົດສອບ ໃຫ້ນາງຄໍາແພງ ປະຖັມມະວົງ ແກ້ ຖຶກລົງໂທດ ໂຈະການເປັນອາຊິບຄຣູ 5 ປີບັນທຶກໄວ້ ໃນປວັດຣັຖກອນ ຫ້າມເຂົ້າ ມີສ່ວນ ໃນການສອບເສັງອີກ.

3 ທ້າວ ວຽງສວັນ ໄຊລິວົງ ເປັນຄຣູສອນ ຢູ່ໂຮງຮຽນ ມັທຍົມສຶກສາ ຫງຽນຢູ ສົມຮູ້ຮ່ວມຄິດ ກັບນາງນາລີ ສົ່ງຄໍາຕອບ ວິຊາພູມມິສາດ ໃຫ້ກຸ່ມສອບເສັງ ມ.7 ຖືກລົງໂທດ ໂຈະການເປັນຄຣູອາຊິບ 5 ປີ ພ້ອມບັນທຶກໄວ້ ໃນປວັດຣັຖກອນ ຫ້າມເຂົ້າມີສ່ວນ ຮ່ວມໃນການ ສອບເສັງ.

ແລະ 4 ນາງ ຄໍາແພງ ປະຖັມມະວົງ ຄຣູອາສາສມັກ ສຶກສາສາດ ມະຫາວິທຍາລັຍ ແຫ່ງຊາດ ສອນວິຊາ ຊີວະສາດ ເປັນ ອາຈານ ຮັບເຊີນ ມາສອນຢູ່ໂຮງຮຽນມັທຍົມ ສືກສາສົມບຸນ ມີຄວາມຜິດ ຄືແກ້ຄໍາຕອບ ວິຊາຊິວະສາດ ແລ້ວສົ່ງ ໃຫ້ນາງນາລີ ທັມມະວົງ. ຖືກລົງໂທດ ໂດຍໂຈະການເປັນຄຣູອາສາສມັກ ໃນ ມະຫາວິທຍາລັຍ ແຫ່ງຊາດ ແລະ ຈະບໍ່ຮັບເຂົ້າເປັນຣັຖກອນ ຄຣູຕໍ່ໄປ.