ກິຈກັມປະກວດ ກຸ່ມຫຼາກຫຼາຍ ທາງເພດ ຖືກຫ້າມ

ຫ້ອງ​ການ ​ສູນກາງ​ຊາວ​ໜຸ່ມ​ ປະ​ຊາ​ຊົນ​ປະ​ຕິ​ວັດ​ລາວ ໄດ້​ອອກ​ໜັງ​ສືແຈ້ງ​ການ​ໃນ​ມື້​ວັນ​ທີ 9 ກັນ​ຍານີ້ກ່ຽວ​ກັບ​ການ​ຂໍ​ອະ​ນຸ​ມັດ ​ຈັດ​ຕັ້ງ​ປະ​ຕິ​ບັດ​ການ​ປະ​ກວດ ​ບັນ​ດາ​ນາງ​ສາວ ແລະ​ຊາຍ​ງາມ​ຕ່າງໆ ຊຶ່ງ​ໃນ​ນັ້ນ​ຂໍ້​ທີ 1 ກຳ​ນົດ​ເອົາ​ໄວ້​ວ່າ “ສຳ​ລັບ​ໂຄງ​ການ​ປະ​ກວດ ​ທີ່ບໍ່​ແມ່ນ​ການ​ຄັດ​ເລືອກ​ ເອົາ​ຍິງ​ແທ້ ແລະ​ຊາຍ​ແທ້​ໂດຍ​ກຳ​ເນີດ ແມ່ນ​ທາງ​ສູນ​ກາງຊາວ​ໜຸ່ມ​ ປະ​ຊາ​ຊົນ​ປະ​ຕິ​ວັດ​ລາວ ຈະ​ບໍ່​ອະ​ນຸ​ຍາດ​ໃຫ້​ຈັດ​ງານ​ດັ່ງ​ກ່າວ​ຂຶ້ນ​ ເດັດ​ຂາດ ແລະ​ຂໍ້​ທີ 2 ກໍ​ເວົ້າ​ວ່າ ຫ້າມ​ສວຍ​ໂອ​ກາດ​ ໃນ​ການ​ໄປ​ທ່ອງ​ທ່ຽວ ແລ້ວ​ໄປ​ເຂົ້າ​ຮ່ວມ​ປະ​ກວດ, ແຂ່ງ​ຂັນ​ນາງ​ງາມ, ຊາຍ​ງາມ​ຢູ່​ຕ່າງ​ປະ​ເທດ.

ໜັງ​ສື​ແຈ້ງ​ການ ຂອງ​ອົງ​ການ​ຊາວ​ໜຸ່ມ​ສະ​ບັບ​ນີ້ ອີງ​ຕາມ​ຄຳ​ເວົ້າ​ຂອງ​ຊາວ​​ນຸ່ມ​ລາວ ທີ່​ນະ​ຄອນ​ຫລວງວຽງ​ຈັນ​ນາງ​ນຶ່ງ ຕໍ່​ວິ​ທ​ຍຸ​ເອ​ເຊັຽ​ເສ​ຣີ​ໃນ​ມື້​ວັນ​ທີ 15 ກັນ​ຍານີ້​ແລ້ວ​ແມ່ນ​ວ່າ ຊາວ​ໜຸ່ມ​ລາວຈຳ​ນວນ​ຫລວງ​ຫລາຍ​​ບໍ່​ເຫັນ​ດີ​ນຳ ແລະ​ບໍ່​ດີ​ໃຈນຳ​ໜ່ວຍ​ງານ ທີ່​ເຮັດ​ວຽກ​ກ່ຽວ​ກັບ​ເຣື່ອງນີ້.

“ຂະເຈົ້າຢາກໃຫ້ຖອນ ເບິດເລີຍ ໃຜກະອອກມາຮຽກຮ້ອງເບິດ ສ່ວນຫລາຍແມ່ນໍ່ເຫັນດີເລີຍຫັ້ນນ່າ ປະກາດຈາກອົງການ ຊາວໜຸ່ມຂອງລາວ. ອົງການແບບວ່າ ສໍາລັບວັຍໜຸ່ມເລີຍຫັ້ນນ່າ ແລ້ວກໍສໍາຄັນ ຖ້າສົມມຸດເພິ່ນມາອອກແຈ້ງການ ຈໍາກັດຄວາມເທົ່າທຽມແນວນີ້ ຫລາຍໆຄົນກໍບໍ່ພໍໃຈ ຢ່າງແຮງ ເພິ່ນຈໍາກັດບໍ່ໃຫ້ ມີການປະກວດທີ່ເປັນ ຂອງພວກອັນນ່າ LGBT ອີ່ຫຍັງ ສ່ວນຫລາຍ ຂອງລາວຄົນດັງກໍຫລາຍ ເປັນດາຣາ ຫລືວ່າຄົນທີ່ມີຊື່ສຽງ ເພິ່ນກໍອອກມາເວົ້າມາຫຍັງ.”

ພ້ອມ​ດຽວ​ກັນ​ນັ້ນ ຊາວ​ໝຸ່ມ​ລາວ​ຫລາຍ​ຄົ​ນ ກໍ​ຢາກ​ໃຫ້ສູນກາງ​ຊາວ​ໜຸ່ມ​ ປະ​ຊາ​ຊົນ​ປະ​ຕິ​ວັດ​ລາວ ທີ່​ເຮັດ​ວຽກ​ກ່ຽວ​ກັບ​ ຊາວ​ໜຸ່ມ​ລາວ​ໂດຍ​ຕຣົງ ສ​ນັບ​ສ​ນູນ ສົ່ງ​ເສີມ​ຄວາມ​ຫລາ​ກ​ຫລາຍ ​ທາງ​ເພດ ໃຫ້​ຫລາຍ​ຂຶ້ນ ຍ້ອນ​ກຸ່ມ​ຄົນ​ດັ່ງ​ກ່າວ ຕ້​ອງ​ການ​ການຍອມ​ຮັບ ແລະ​ການ​ປະ​ຕິ​ບັດ​ຕໍ່ ຄື​ກັນ​ກັບ​ຄົນ​ອື່ນໆ​ໃນ​ສັງ​ຄົມ.

ດັ່ງ​ຊາວ​ໜຸ່ມ​ລາວ ​ຢູ່​ເມືອງ​ຫົງ​ສາ ແຂວງ​ໄຊ​ຍະ​ບູ​ຣີ​ຜູ້​ນຶ່ງ ກ່າວ​ໃນ​ມື້​ດຽວ​ກັນ​ນີ້​ວ່າ:

“ເອີ! ນ່າຈະບໍ່ ບໍ່ເຄີຍເຫັນຈັກເທື່ອ ໂຕນີ້ເຮົາກະບໍ່ຮູ້ວ່າ ຈຸດປະສົງເພິ່ນແມ່ນຫຍັງ ແທ້ໆຫັ້ນນ່າ ກໍບໍ່ເຫັນດີນໍາເພິ່ນຫັ້ນແຫະ ເພິ່ນກໍຢາກປະກາດ ຄວາມເທົ່າທຽມຫັ້ນແຫລະ ຈັດໄປ ຢາກເຫັນ ຄວາມເທົ່າທຽມ.  ສນັບສນູນກັນທຸກຮູບແບບຫັ້ນແຫລະ ບັນດາກະເທີຍ, ເກບໍ່ ອີ່ຫຍັງຫັ້ນແຫລະ ກໍຄືຜູ້ຍິງ ຢາກມີບົດບາດເທົ່າທຽມຜູ້ຊາຍ ກະເທີຍກໍເຊັ່ນກັນ. ຄັນເຮົາໄປປິດກັ້ນໄປອັນນັ້ນອັນນີ້ເຂົາ ມັນກໍບໍ່ຖືກຕ້ອງ ໃນຍຸກສມັຍນີ້ຫັ້ນນ່າ.”

ນັບ​ຕັ້ງ​ແຕ່​ ແຈ້ງ​ການ​ສ​ບັບ​ດັ່ງ​ກ່າວ ຖືກ​ເຜີຍ​ແພ່​ໃນ​ມື້​ວັນ​ທີ 14 ກັນ​ຍານີ້​ມາ, ຊາວ​ໜຸ່ມ, ດາ​ຣາ, ສິ​ລ​ປິນ ແລະ​ຜູ້​ມີ​ຊື່​ສຽງ​ ໃນ​ປະ​ເທດ​ລາວ​ຫລາຍ​ຄົນ ສະ​ແດງຄວາມ ບໍ່​ເຫັນ​ດີ​ນຳ ຜ່ານ​ສື່​ສັງ​ຄົມ​ອອນ​ລາຍນ໌ ແລະ​ທັງ​ຕັ້ງ​ຄຳ​ຖາມ​ວ່າ ຍ້ອນ​ສາ​ເຫດ​ໃດ ສູນກາງ​ຊາວ​ໜຸ່ມ​ ປະ​ຊາ​ຊົນ​ປະ​ຕິ​ວັດ​ລາວ ຈຶ່ງ​ອອກ​ແຈ້ງ​ການ​ນັ້ນ ຍ້ອນ​ທີ່​ຜ່ານ​ມາ ການ​ຈັດ​ເວ​ທີ​ປະ​ກວດ ​ກຸ່ມ​ຄົນ​ຫລາກ​ຫລາຍ​ທາງ​ເພດ (LGBTQ+) ຍັງບໍ່ຄ່ອຍ​ເຫັນ, ຍັງ​ບໍ່​ເຄີຍ​ໄດ້​ຮັບ​ອະ​ນຸ​ຍາດ ຫລື​ການ​ສ​ນັບ​ສ​ນູນ​ແນວ​ໃດ ​ຈາກ​ທາງ​ການ​ລາວເທື່ອ.

ດັ່ງ​ຊາວ​ໜຸ່ມ​ລາວ ​ຢູ່​ນະ​ຄອນ​ປາກ​ເຊ ແຂວງ​ຈຳ​ປາ​ສັກ​ຜູ່​ນຶ່ງ ເວົ້າ​ຕໍ່​ວິ​ທ​ຍຸ​ເອ​ເຊັຽ​ເສ​ຣີ​ ໃນ​ມື້​ວັນ​ທີ 15 ກັນ​ຍານີ້​ວ່າ:

“ບໍ່ຄ່ອຍໄດ້ມີການ ປະກວດໂຕນີ້ເນາະ ແບບວ່າທີ່ເຂົາປະກວດ ກໍມີແຕ່ຕາມບຸນບ້ານບຸນວັດ ແບບອາໂຣເຄຫາຊື່ໆ ແຕ່ວ່າ ຄັນຖ້າສົມມຸດວ່າ ເປັນທາງການຫັ້ນ ມັນຍັງບໍ່ມີເພາະວ່າຢູ່ລາວ ປະຊາກອນມັນໜ້ອຍເນາະ ຄົນທີ່ເປັນ transgender ກໍມີໜ້ອຍແດ່ ສ່ວນຫລາຍຂະເຈົ້າກໍມີໂອກາດ ແລ້ວຂະເຈົ້າກໍຈະໄປໄທຍ ໄປຫຍັງບໍ່ຫລື ວ່າໄປປະທດເພື່ອນບ້ານ ເພື່ອວ່າຈະປະກວດອີ່ຫຍັງ ມັນກໍຈະເປັນແບບນັ້ນ ເພາະວ່າ ວົງການໂຕນີ້ມັນ ຍັງບໍ່ທັນມີຫລາຍເທື່ອວ່າຊັ້ນສາ.”

ປັດ​ຈຸ​ບັນ ເຖິງ​ແມ່ນ​ວ່າ ຈະ​ມີ​ການ​ເປີດກວ້າງ ແລະ​ຍອມ​ຮັບ​ກຸ່ມ​ຄົນ​ ຫລາກຫລາຍ​ທາງ​ເພດ ໃນ​ວົງ​ກວ້າງ ແຕ່​ກໍ​ຍັງ​ມີ ​ຜູ້​ບໍ​ລິ​ຫານ​ຈຳ​ນວນ​ນຶ່ງ ​ຍັງ​ບໍ່​ທັນ​ຍອມ​ຮັບ​ພໍ​ເທົ່າ​ໃດ.

ດັ່ງ​ຊາວ​ໜຸ່ມ​ລາວ ​ຜູ້​ດຽວ​ກັນ​ນີ້​ເວົ້າ​ວ່າ:

“ຜູ້ທີ່ເປັນບໍຣິ ຫານທຸກມື້ນີ້ ສ່ວນຫລາຍກໍເປັນຄົນໃນລະບອບເກົ່າ. ໃນເຣື່ອງຄວາມເຂົ້າໃຈເພິ່ນ ບາງທີກໍອາຈບໍ່ທັນເຖິງຖອງ ເທົ່າກັບຄົນຮຸ່ນໃໝ່ນີ້. ກໍມີແຕ່ບາງບຸກຄົນຊື່ໆ ເອີ ຈະເປັນໃຜທີ່ວ່າອອກມາ ທີ່ວ່າອອກ ທີ່ວ່ານິຕິກັມ. ໂຕນີ້ ຈະເປັນໃຜທີ່ວ່າຈະຮູ້ ຄຸມວຽກງານໂຕນີ້ ຕັດສິນຊື່ໆດອກ ແຕ່ວ່າໂດຍທົ່ວໄປ ແຕ່ວ່າຂະເຈົ້າກະຍອມຮັບ ຫັ້ນແຫລະ. ມັນກໍບໍ່ໄດ້ມີບັນຫາຫຍັງດອກ ຢູ່ບ້ານເຮົານີ້ນ່າ.”

ກ່ຽວ​ກັບ​ເຣື່ອງ​ສາ​ເຫດ ​ທີ່ເຮັດ​ໃຫ້ສູນກາງ​ຊາວ​ໜຸ່ມ ​ປະ​ຊາ​ຊົນ​ປະ​ຕິ​ວັດ​ລາວ ​ອອກ​ແຈ້ງ​ການ ຫ້າມບໍ່​ໃຫ້​ມີ​ການ​ຈັດ​ປະ​ກວດ ​ດັ່ງ​ກ່າວນີ້ ຜູ້​ປະ​ກອບ​ການ ​ທີ່​ເຮັດ​ວຽກ​ກ່ຽວ​ກັບ​ ລະ​ບົບ​ຄັດ​ເລືອກ​ຄົນ​ລາວ ໄປ​ປະ​ກວດ​ໃນ​ເວ​ທີ ຄົນ​ຫລາກ​ຫລາຍ​ທາງ​ເພດ ຢູ່​ຕ່າງ​ປ​ແທດ ຜູ້​ຂໍ​ສງວນ​ຊື່ ແລະ​ສຽງ​ທ່ານ​ນຶ່ງ ​ເວົ້າຕໍ່​ວິ​ທ​ຍຸ​ເອ​ເຊັຽ​ເສ​ຣີ​ວ່າ “ສາ ເຫດອັນນຶ່ງກໍຄືປີທີ່ຜ່ານມາ ເມື່ອແຕ່ກີ້ນີ້  Miss International Queen ທີ່ ໄປປະກວດຫັ້ນນ່າ ກໍບໍ່ໄດ້ຜ່ານເພິ່ນຢູ່ແລ້ວ. ກໍດ້ານ ປະກວດຢູ່ແລ້ວ ກໍຄືຖືກ ຄັດເລືອກ ແລ້ວກໍແຕ່ງຕັ້ງໂຕເອງໄປ ກໍໄປ ແລ້ວກໍເວົ້າ ເຖິງຄວາມເໝາະສົມ ກິຣິຍາມາຣະຍາດ ຢູ່ເທິງເວທີສາກົນບໍ່ໂອເຄ. ບາດນີ້ກນ່າ ຈະເປັນຈຸດນຶ່ງທີ່ເຮັດ ໃຫ້ມັນເປັນການຕລົກໄປ ເຮຮາໄປຫັ້ນນ່າ.”

ແລະ​ນັກ​ກົດ​ໝາຍ​ລາວ ທີ່​ເຮັດ​ວຽກ​ດ້ານ ​ຄວາມ​ເທົ່າ​ທຽມ​ທາງ​ເພດ ຮ່ວມ​ກັບ ສູນ ກາງ​ຊາວ​ໜຸ່ມ​ປະ​ຊາ​ຊົນ​ປະ​ຕິ​ວັດ​ລາວ ທ່ານ​ນຶ່ງ ຜູ້​ຂໍ​ສງວນ​ຊື່ ແລະ​ສຽງຄື​ກັນ​ນັ້ນ ກໍ​ເວົ້າ​ໃນ​ມື້​ດຽວ​ກັນ​ນີ້​ວ່າ ສູນກາງ​ຊາວ​ໜຸ່ມ​ປະ​ຊາ​ຊົນ​ປະ​ຕິ​ວັດ​ລາວ ປະ​ກາດ​ໃຫ້​ປະ​ຊາ​ຊົນ​ທົ່ວ​ໄປ​ຮັບ​ຮູ້​ວ່າ ຖ້າ​ມີ​ການ​ຈັດ​ເວ​ທີ​ ປະ​ກວດ​ແນວ​ໃດ​ກໍ​ຕາມ ທີ່ກ່ຽວ ຂ້ອງ​ກັບ​ກຸ່ມ​ຄົນ​ ຫລາກ​ຫລາຍ​ທາງ​ເພດ ທັງ​ຢູ່​ພາຍ​ໃນ ແລະ​ຕ່າງ​ປະ​ເທດ​ນັ້ນ ແມ່ນ​ເປັນ​ການ​ຈັດ​ປະ​ກວດ​ໂດຍ​ເອກ​ກະ​ຊົນ, ບໍ່​ມີ​ສ່ວນກ່ຽວ​ຂ້ອງ​ແນວ​ໃດ ​ກັບ​ທາງ​ການ ແລະ​ພາກ​ສ່ວນ​ທີ່​ກ່ຽວ​ຂ້ອງ. ທ່ານ​ເວົ້າ​ວ່າ: “ສູນກາງຊາວໜຸ່ມຫັ້ນນ່າ ຂະເຈົ້າຈະບໍ່ອະນຸຍາດ. ເຂົ້າໃຈນະວ່າ ສູນກາງຊາວໜຸ່ມ ຂະເຈົ້າຈະມີໜ້າທີ່ໃນການ ເບິ່ງໃນການປະກວດອິ່ຫຍັງຕ່າງໆຊີ້ຫັ້ນນ່າ. ຄັນວ່າບໍ່ໄດ້ອະນຸຍາດ ກໍໝາຍຄວາມວ່າ ບໍ່ໄດ້ຢູ່ໃນການດູແລ ຂອງກົມກອງເພິ່ນ ວ່າຊັ້ນສາ, ແຕ່ວ່າຄັນຊິເຮັດ ກໍມີແຕ່ເປັນ private sector ໂຕນີ້ ແຕ່ກໍບໍ່ໄດ້ຮັບຮູ້ໂດຍຣັຖ ຊີ້ຫັ້ນນ່າ.”

ອີງ​ຕາມໜັງ​ສືແຈ້ງ​ການ ຂອງຫ້ອງ​ການ​ສູນກາງ​ຊາວ​ໜຸ່ມ ​ປະ​ຊາ​ຊົນ​ປະ​ຕິ​ວັດ​ລາວ ​ລົງ​ວັນ​ທີ 9 ກັນ​ຍານີ້, ໂຄງ​ການ​ປະ​ກວດ ​ທີ່​ໄດ້​ຮັບ​ລິ​ຄະ​ສິດ​ ຈາກ​ຕ່າງ​ປະ​ເທດ ມາ​ຄັດ​ເລືອກ​ເອົາ ​ຊາວ​ໜຸ່ມ​ລາວ ທັງ​ເພດ​ຍິງ ແລະ​ເພດ​ຊາຍ ຈະ​ປະ​ກວດ​ພາຍ​ໃນ​ປະ​ເທດ, ຢູ່​ໃນ​ລະ​ດັບ​ພາກ​ພື້ນ ແລະ​ສາ​ກົນ ແມ່ນ​ໃຫ້​ມາ​ພົວ​ພັນ ແລະ​ຂໍ​ອະ​ນຸ​ມັດ ​ຈາກສູນກາງ​ຊາວ​ໜຸ່ມ ​ປະ​ຊາ​ຊົນ​ປະ​ຕິ​ວັດ​ລາວ ​ຕາມ​ລະ​ບຽບ.