ທາງການລາວ ກວດກາ ສິ່ງຜິດກົດໝາຍ ຢູ່ເຂດເສຖກິຈ ພິເສດ ສາມຫຼ່ຽມຄຳ
2022.09.08
ຢູ່ຕໍ່ໜ້າ ກາສິໂນ ຄິງສ໌ໂຣມັນສ໌ ເມືອງຕົ້ນເຜິ້ງ ແຂວງບໍ່ແກ້ວ.
RFA
ກະຊວງປ້ອງກັນຄວາມສງົບ ແລະ ພາກສ່ວນກ່ຽວຂ້ອງ ຂອງແຂວງບໍ່ແກ້ວ ລົງພື້ນທີ່ກວດກາ ຫາສິ່ງຜິດກົດໝາຍ ເພື່ອສ້າງຄວາມເປັນຣະບຽບຮຽບຮ້ອຍ ຂອງຜູ້ປະກອບການ ແລະ ຄົນງານ ພາຍໃນເຂດເສຖກິຈ ພິເສດສາມຫລ່ຽມຄຳ ເມືອຕົ້ນເຜິ້ງ ແຂວງບໍ່ແກ້ວ.
ການລົງກວດກາ ໄດ້ມີຂຶ້ນໃນຕອນຄ່ຳຂອງວັນທີ 6 ກັນຍາ ໂດຍ ເຈົ້າໜ້າທີ່ມີຈຸດປະສົງ ກວດກາຫາສິ່ງເສບຕິດ, ການນຳໃຊ້ແຮງງານຜິດກົດໝາຍ, ການຄ້າມະນຸສ ແລະ ການສໍ້ໂກງ ທາງອິນເຕີຣ໌ເນັດ ແຕ່ປະກົດວ່າ ບໍ່ພົບເຫັນສິ່ງຜິດກົດໝາຍ.
ເຈົ້າໜ້າທີ່ ປກສ ແຂວງບໍ່ແກ້ວ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 8 ກັນຍາ ວ່າ:
“ເຈົ້າໜ້າທີ່ເຮົາໄປຫັ້ນ ທີ່ຜ່ານມາ ກະບໍ່ເຄີຍເຫັນ ເພາະໃນຫັ້ນ ມັນກະເຂົ້າຍາກຢູ່ແລ້ວ ແຕ່ສະເພາະເຈົ້າໜ້າທີ່ເຮົາ ຊິເຂົ້າໄປໃນເຂດຫັ້ນກະຍາກ ໄປແບບເຮົາມີວຽກເຮົາກະຈັ່ງໄປ.
ທ່ານກ່າວຕື່ມວ່າ ການລົງພື້ນທີ່ກວດກາຫາສິ່ງຜິດກົດໝາຍ ເພື່ອສ້າງຄວາມເປັນລະບຽບຮຽບຮ້ອຍ ຂອງຜູ້ປະກອບການ ແລະ ຄົນງານ ພາຍໃນເຂດເສຖກິຈ ພິເສດສາມຫລ່ຽມຄຳ ໃນຄັ້ງນີ້ ແມ່ນກໍລະນີພິເສດ ເນື່ອງຈາກເຈົ້າໜ້າທີ່ ລະດັບສູນກາງ ຕ້ອງການປັບປຸງຄຸ້ມຄອງ ແລະ ຍົກລະດັບຄວາມປອດພັຍໃນເຂດ.
ປັດຈຸບັນ ການລົງພື້ນທີ່ກວດກາ ເພື່ອສ້າງຄວາມເປັນລະບຽບຮຽບຮ້ອຍ ຂອງຜູ້ປະກອບການ ແລະ ຄົນງານພາຍໃນເຂດເສຖກິຈ ພິເສດສາມຫລ່ຽມຄຳ ຈະບໍ່ໄດ້ປະຕິບັດເປັນປະຈຳ ແລະ ຕໍ່ເນື່ອງ ຍ້ອນວ່າ ມີຄົນຄຸ້ມຄອງເຂດເສຖກິຈ ພິເສດສາມຫລ່ຽມຄຳ.
ທີ່ຜ່ານມາ ມີເຫດການຕີກັນ, ຂ້າກັນ, ຍິງກັນ, ການເຂົ້າໄປຊ່ວຍເຫຼືອ ຄົນງານທີ່ຖືກຕົວະໄປເຮັດວຽກ ຫຼື ການບັງຄັບໃຊ້ແຮງງານ ແລະ ບັນຫາດັ່ງກ່າວ ກໍຖືກປົກປິດໄວ້ ແຕ່ຜູ້ຄົນຈະຮູ້ຜ່ານສື່ສັງຄົມອອນລາຍນ໌ ເທົ່ານັ້ນ.
ເຈົ້າໜ້າທີທ້ອງຖິ່ນເມືອງຕົ້ນເຜິ້ງ ແຂວງບໍ່ແກ້ວ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 8 ກັນຍາ ວ່າ:
“ເຂດຂະເຈົ້າຂຶ້ນເປັນເຂດພິເສຖເນາະ ເມືອງເຮົາກະບໍ່ຊ່າງຊິວ່າ ເຂົາກະບໍ່ຢາກເປີດເຜີຍ ແມ່ນຫຍັງຂອງເຂົາແຫຼະ ເຂົາກະຄືຊິບໍ່ແຈ້ງເປັນທາງການ ວ່າ ມື້ນັ້ນ, ມື້ນີ້ ມີຜູ້ຂ້າກັນຕາຍ. ແຕ່ຜ່ານມາຫັ້ນ ເຫັນເຂົາລົງເຟສ, ເຫັນຂະເຈົ້າລົງຢູ່ເນາະ ແຕ່ວ່າ ເຮົາກະບໍ່ມີສ່ວນກ່ຽວຂ້ອງຫຍັງ ກັບຂະເຈົ້າແຫຼະ ກະບໍ່ມີສິທໄປເວົ້າຫຍັງ ມີແຕ່ໜ່ວຍສະເພາະກິຈ ຂະເຈົ້າໄປແກ້ໄຂກັນເອງ.”
ພາຍໃນເຂດເສຖກິຈ ພິເສດສາມຫລ່ຽມຄຳ ມີຄົນຈີນ ເຂົ້າເປີດບໍຣິສັດ ແລະ ຫ້າງຮ້ານ ເປັນຈຳນວນຫຼາຍ ເຊິ່ງບາງບໍຣິສັດ ກໍດຳເນີນທຸຣະກິຈ ແບບໂປ່ງໄສ ມີຄວາມໜ້າເຊື່ອຖືໝັ້ນຄົງ ແຕ່ກໍມີບາງບໍຣິສັດ ທີ່ດຳເນີນທຸຣະກິຈ ບໍ່ເປັນໄປຕາມກົດໝາຍ ຈົນເຮັດໃຫ້ຄົນງານ ທີ່ເຮັດວຽກນຳບໍຣິສັດ ຖືກເອົາປຽບ ແລະ ບໍ່ໄດ້ຮັບການຄຸ້ມຄອງ ຈາກທາງການ.
ຄົນງານລາວ ທີ່ເຮັດວຽກຢູ່ພາຍໃນເຂດເສຖກິຈ ພິເສດສາມຫລ່ຽມຄຳ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 8 ກັນຍາ ວ່າ:
“ການຄຸ້ມຄອງຄັນວ່າ ເປັນວຽກທີ່ຜິດກໍ ຍາກໆ ໂຕນີ້ ເຂົ້າໄປມັນກະຫຍຸ້ງຍາກເຮົາເອງ ເພາະວ່າ ຄວາມກົດດັນມັນຕ້ອງສູງໜ້ອຍນຶ່ງໄດ໋ໂຕນັ້ນ, ຄັນວ່າເຮັດວຽກນຳບໍຣິສັດ ເຮົາຕ້ອງເບິງກວດກາເບິ່ງວ່າ ມີສັນຍາ ຫຼື ບໍ່ມີສັນຍາ ຄັນວ່າ ມີສັນຍາ ເຈົ້າເຮັດຕາມສັນຍາເຂົາ 3 ເດືອນ 6 ເດືອນ.”
ປັດຈຸບັນ ຂ່າວການບັງຄັບໃຊ້ແຮງງານຄົນ ໃນຮູບແບບອື່ນໆ ຢູ່ເຂດເສຖກິຈ ກໍມິດງຽບໄປ.
ນາຍໜ້າຊາວລາວ ທີ່າຊອກຫາຄົນງານ ເຂົ້າໄປເຮັດວຽກ ໃນເຂດເສຖກິຈ ພິເສດສາມຫລ່ຽມຄຳ ໄດ້ກ່າວຕໍ່ວິທຍຸເອເຊັຽເສຣີ ວ່າ:
“ຂະເຈົ້າບໍ່ສາມາດຄ້າຂາຍຄົນໄດ້ ບໍ່ສາມາດບັງຄັບຄົນແບບຈັ່ງຊີ້ ຈັ່ງຊັ້ນໄດ້ ຕີກັນບໍ່ ຫຼື ຍັງເຫັນນ່າ. ມັນບໍ່ໄດ້ແລ້ວໂຕນີ້ນ່າ ຖ້າວ່າ ຂະເຈົ້າເກີດບັນຫາ ແບບຕີກັນບໍ່ ຫຼືວ່າ ແມ່ນຫຍັງຫັ້ນນ່າ ເຮົາສົ່ງກັບໝົດ.”
ອີງຕາມຂໍ້ມູນຈາກປະຊາຊົນ, ເຂດເສຖກິຈ ພິເສດສາມຫລ່ຽມຄຳ ເຄີຍຖືກຮ້ອງຮຽນ ກ່ຽວກັບບັນຫາຢາເສບຕິດ ການທຳຮ້າຍຮ່າງກາຍຄົນງານ ແລະ ການຄ້າມະນຸສ, ແຕ່ບັນຫາ ແລະ ຄໍາຮ້ອງເຫຼົ່ານັ້ນ ກໍບໍ່ໄດ້ຮັບການແກ້ໄຂ ຢ່າງເປັນຮູບປະທັມ ແລະ ນອກຈາກນີ້ ຢູ່ເຂດຄາສິໂນ ເຈົ້າໜ້າທີ່ທາງການລາວ ກໍບໍ່ສາມາດເຂົ້າໄປກວດກາ ໄດ້ຢ່າງເປັນອິສຣະ.
ເຈົ້າໜ້າທີ່ກ່ຽວຂ້ອງ ແຂວງບໍ່ແກ້ວ ທ່ານນຶ່ງ ໄດ້ກ່າວວ່າ:
“ຄືເຫັນຫັ້ນລະ ຂັ້ນວ່າກົດໝາຍເຮົາຈະໃຊ້ຢູ່ຫັ້ນໄດ້ ຫຼາຍຄົນຄົງຊິບໍ່ຕົກເປັນການຄ້າມະນຸສ ແຕ່ວ່າ ອັນນີ້ ເຮົາກະເຂົ້າໄປບໍ່ໄດ້ໂຕນີ້, ກວດກາໄດ້ນີ້ ແຕ່ກວດຢູ່ແຖວໂຕເມືອງ ແຖວຕົ້ນເຜິ້ງເນາະ ແຕ່ວ່າ ເຂົ້າຄາສິໂນ ກວດແບບຮ້ານບັນເທີງ ອັນນີ້ຖືວ່າ ກວດບໍ່ໄດ້ເນາະ ສ່ວນຫຼາຍຈະເປັນຂອງຄົນຈີນໝົດເລີຍເນາະ.”
ຍານາງ ກ່າວຕື່ມວ່າ: “ຣັຖບານ ຕ້ອງໃຊ້ສິທອຳນາດ ໃຫ້ເຈົ້າໜ້າທີ່ລາວ ເປັນຕົ້ນສະຫະພັນແມ່ຍິງ, ສະພາປະຊາຊົນແຂວງ, ກັມມະບານ, ຂແນງການຄຸ້ມຄອງແຮງງານ ແລະ ອົງການຈັດຕັ້ງສິທທິມະນຸສ ສາມາດເຂົ້າກວດກາຢ່າງຈິງຈັງ ເພື່ອປາປາມການຄ້າມະນຸສ ແລະ ການໃຊ້ແຮງງານ ຢູ່ໃນເຂດເສຖກິຈ ພິເສດສາມຫລ່ຽມຄຳ.”
ແມ່ຍິງລາວຫຼາຍຄົນ ເຂົ້າໄປເຮັດວຽກຕອບແຊັດ ຢູ່ໃນເຂດເສຖກິຈ ພິເສດສາມຫລ່ຽມຄຳ ແຕ່ຖືກຕົວະໃຫ້ຂາຍບໍຣິການທາງເພດ ຫຼື ຖືກບັງຄັບໃຊ້ແຮງງານຕ່າງໆ.
ໃນວັນທີ 19 ກະຣະກະດາ 2022 ທີ່ຜ່ານມາ ຄະນະຄຸ້ມຄອງເຂດເສຖກິຈ ພິເສດສາມຫລ່ຽມຄຳ ກໍໄດ້ອອກແຈ້ງການໃຫ້ບໍຣິສັດຕ່າງໆ ໃນ ເຂດດັ່ງກ່າວ ໂຈະການນຳເຂົ້າຄົນງານ ມາເຮັດວຽກຕອບແຊັດ.
ປັດຈຸບັນ ກະຊວງແຮງງານ ແລະ ສວັດດີການສັງຄົມ ຍັງເລັ່ງຂຶ້ນທະບຽນຄົນງານລາວ ທີ່ມາເຮັດວຽກຢູ່ໃນເຂດເສຖກິຈ ພິເສດສາມຫລ່ຽມຄຳ ເພື່ອໃຫ້ງ່າຍໃນການຕິດຕາມກວດກາ ແລະ ຄຸ້ມຄອງໃຫ້ໄປຕາມລະບຽບກົດໝາຍ ຂອງປະເທດລາວ.
ທາງການລາວ ໄດ້ຣາຍງານວ່າ ໄດ້ມີການຂຶ້ນທະບຽນຄົນງານລາວ ຢູ່ໃນເຂດເສຖກິຈພິເສດໄປແລ້ວ 1,200 ປາຍຄົນ ແລະ ຍັງສືບຕໍ່ຂຶ້ນທະບຽນໄປເລື້ອຍໆ ຈົນກວ່າຈະໄດ້ໝົດທຸກຄົນ ສ່ວນວ່າ ຄົນງານຕ່າງປະເທດນັ້ນ ທາງການລາວມີແຜນຂຶ້ນທະບຽນໃນຕົ້ນປີ 2023.