ສວັນນະເຂດ ສັ່ງຍຸບມູລນິທິ ຊ່ວຍເຫຼືອ ຜູ້ປະສົບພັຍ
2022.08.25
ຮູບໂຕຢາງ: ການປະຕິບັດງານ ຂອງໜ່ວຍກູ້ພັຍ
ພາບຈາກ: ໜ່ວຍກູ້ພັຍ
ພແນກພາຍໃນ ແຂວງສວັນນະເຂດ ມີຄຳສັງຍຸບເລີກ ມູລນິທິ ອາສາຊ່ວຍເຫຼືອ ຜູ້ປະສົບພັຍ ແຂວງສວັນນະເຂດ ຢ່າງຖາວອນ ຍ້ອນວ່າ ມູລນິທິດັ່ງກ່າວ ສວຍໂອກາດຮຽກຄ່າເກັບເງິນນຳຍາດພີ່ນ້ອງ ຜູ້ປະສົບພັຍທຸກຄັ້ງ.
ຜແນກພາຍໃນ ແຂວງສວັນນະເຂດ ໄດ້ອອກແຈ້ງການໃນວັນທີ 17 ສິງຫາ 2022 ເພື່ອສັ່ງໃຫ້ຍຸບເລີກ ມູລນິທິດັ່ງກ່າວ. ແຈ້ງການດັ່ງກ່າວ ຍັງລະບຸວ່າ ມູລນິທິຮຽກເອົາເງິນ ນຳຍາຕພີ່ນ້ອງຜູ້ປະສົບພັພ ພາຍຫຼັງໃຫ້ການຊ່ວຍເຫຼືອ ເຊິ່ງເປັນການຜິດຕໍ່ກົດລະບຽບ ຫຼັກການທີ່ກຳນົດໄວ້ ໃນມູລນິທິ ທີ່ຜ່ານມາ ຄະນະຄຸ້ມຄອງວຽກງານ ອົງກາຈັດຕັ້ງຂັ້ນແຂວງ ໄດ້ເຊີນມູລນິທິມາກ່າວເຕືອນ ສຶກສາອົບຮົມ ຫຼາຍຄັ້ງ ແຕ່ມູລນິທິດັ່ງກ່າວ ກໍຍັງຝ່າຜືນລະເມີດກົດລະບຽບ.
ເຈົ້າໜ້າທີ່ກ່ຽວຂ້ອງ ແຂວງສວັນນະເຂດ ທ່ານນຶ່ງ ໄດ້ກ່າວວ່າ:
“ຊິເປັນແນວນັ້ນແຫຼະ ເພິ່ນຈຶ່ງໄດ້ສັ່ງຍຸບ ຍຸບໄປກ່ອນ ເພື່ອວ່າ ປັບປຸງກົລໄກຄືນໃໝ່ ນີ້ແຫຼະ ເພາະວ່າ ມັນບໍ່ໂປ່ງໃສ ກໍຕ້ອງຍຸບ ໄປເສັຽກ່ອນເນາະ ໄລຍະນີ້ ກະຊິແມ່ນເພິ່ນປັບປຸງກ່ອນ ໂຕນີ້ ມັນກໍຈະໄປຕາມຂັ້ນຕອນ ຫັ້ນແຫຼະ ລົດກົດໝາຍຖ້າວ່າ ມັນໃຫຍ່ ໂຕກະດຳເນີນຕາມຂັ້ນຕອນຂອງກົດໝາຍ ບໍ່ໃຫ້ຜູ້ກ່ຽວໄດ້ເຄື່ອນໄຫວ.”
ມູລນິທິດັ່ງກ່າວ ມີການຂາຍໂລງສົບ ແລະ ເກັບເງິນຄ່າເຮັດພິທີກັມ ທາງສາສນາ ນຳຍາດພີ່ນ້ອງຜູ້ເສັຽຊີວິຕໂດຍຄິດໄລ່ ຄ່າບໍຣິການແພງ.
ຊາວບ້ານ ໃນແຂວງສວັນນະເຂດ ທ່ານນຶ່ງ ໄດ້ກ່າວວ່າ:
“ແບບວ່າ ເຂົາກໍຊີຮຽກຮ້ອງເງິນຈາກສົບ ແລ້ວກະຂາຍໂຮງສົບພ້ອມກັບກູ້ໄພ ກໍຢາກໃຊ້ບໍຣິການທາງຝັ່ງເຂົາ ເຂົ້າກະເປົ໋າໂຕເອງ ມູລນິທິ ກໍໄດ້ໜ້ອຍດຽວນຶ່ງດອກ ຕາຍກໍຕາຍໄປແລ້ວ ຜູ້ຢູ່ນີ້ແຫຼະຫາເງິນຫຍຸ້ງຍາກ ຍາກລຳບາກ ຢາກໃຫ້ແກ້ໄຂ ເນາະ ປັບປຸງເບິ່ງວ່າ ສ່ວນໃດ ທີ່ມັນບົກພ່ອງ ໄປຫັ້ນນ່າ ກໍປັບປຸງໜ້ອຍນຶ່ງ.”
ຊາວບ້ານທ່ານນີ້ ກ່າວຕື່ມວ່າ ຖ້າເບິ່ງອີກມຸມນຶ່ງ ບາງເທື່ອກໍເຂົ້າໃຈວ່າ ມູລນິທິດັ່ງກ່າວ ບໍ່ໄດ້ຮັບເງິນຈາກຣັຖບານ ຫຼື ອາຈມີຍອດຜູ້ບໍຣິຈາກເງິນໜ້ອຍເກີນໄປ ບາງຄັ້ງກໍຈຳເປັນຈະຕ້ອງຮຽກເອົາຄ່ານ້ຳມັນ, ຄ່າເດີນທາງ ກັບນຍາດຜູ້ປະສົບພັຍ ເພາະສ່ວນໃຫຍ່ ໃນເວລາເກີດອຸບັດຕິເຫດ ປະຊາຊົນກໍຈະໂທຫາ ແລະ ເພິ່ງພາ ໜ່ວຍກູ້ພັຍກ່ອນ ເພາະບໍ່ຮູ້ວ່າ ຈະເພິ່ງພາໜ່ວຍງານ ຂອງພາກຣັຖພາກສ່ວນໃດໄດ້.
ກ່ຽວກັບກໍຣະນີທີ່ເກີດຂຶ້ນ ມັນຈະເປັນບຸກຄົນຈຳນວນນຶ່ງ ທີ່ກະທຳຜິດ ຢູ່ໃນມູລນິທິນັ້ນ ແຕ່ ພາກຣັຖກໍຄົງເປັນຜູ້ແກ້ໄຂ.
ຊາວບ້ານອີກຄົນນຶ່ງ ຢູ່ແຂວງສວັນນະເຂດ ໄດ້ກ່າວວ່າ:
“ມັນກະຜິດລະບຽບເນາະ. ຜິດຈັນຍາບັນເພາະ ແຕ່ວ່າ ມັນເຣື່ງຂອງບຸກຄົນ. ບາງເທື່ອກະລູກນ້ອງສວຍໃຊ້ໂອກາດກະມີ ມັນມີບັນຫາແນວນີ້ແລ້ວ. ມັນກະຍັງຂຶ້ນກັບໜ່ວຍງານພາກຣັຖ ເປັນຜູ້ແກ້.”
ຊາວບ້ານເຫັນເຈົ້າໜ້າທີ່ ມູລນິທິຫຼາຍຄົນ ມີການຂາຍໂລງສົບ ຫຼື ຮຽກຮ້ອງເງິນກັບຍາດຕພີ່ນ້ອງຜູ້ປະສົບພັຍ.
ຊາວບ້ານ ໃນແຂວງສວັນນະເຂດ ອີກຄົນນຶ່ງ ໄດ້ກ່າວວ່າ:
“ມັນກໍຜິດຫັ້ນແຫຼະເນາະ. ຮຽກຮ້ອງເອົາເງິນກັບປະຊາຊົນຫຼາຍເກີນຂອບເຂດ ສົມມຸດວ່າ ຂົນສົ່ງຄົນຕາຍເອົາ 5 ລ້ານ ມັນກະເກີນໂພດ. ຈຳເປັນຕ້ອງໄດ້ໃຫ້ແຫຼະ ສົມມຸດແບບນັ້ນ ປະຊາຊົນນ່າ ເຮັດຫຍັງບໍ່ໄດ້ດອກ. ເພິ່ນເວົ້າມາແນວໃດ ກໍໄດ້ຕາມເພິ່ນເນາະ.”
ບັນຫາທີ່ເຈົ້າໜ້າທີ່ມູລນິທິກູ້ພັຍ ເກັບເງິນນຳຍາຕພີ່ນ້ອງຜູ້ປະສົບພັຍ ບໍ່ສະເພາະເກີດຢູ່ແຂວງສວັນນະເຂດ ແຕ່ ກໍເກີດຢູ່ແຂວງອື່ນນຳອີກດ້ວຍ ເຊິ່ງເຮັດໃຫ້ເຈົ້າໜ້າທີ່ມູລນິທິຕ້ອງເສັຽຊື່ສຽງ.
ເຈົ້າໜ້າທີ່ກູ້ພັຍ ທ່ານນຶ່ງ ຢູ່ນະຄອນຫລວງວຽງຈັນ ກ່າວໃນວັນທີ 25 ສິງຫາ ວ່າ:
“ກະເຄີຍໄດ້ຍິນຢູ່ ກະມີຫຼາຍ ຮູບແບບດອກຄັນ ເຂົາຈະເອົາ ບາງຄົນກໍເອົາອັນນັ້ນ ອັນນີ້ ມາອ້າງຊິນ່າ. ບາດນີ້ໂອນເງິນເຂົ້າບັນຊີໃນໂຕຈິງ ເຮົາກະບໍ່ຮູ້ວ່າ ເຂົາໂອນເຂົ້າເທົ່າໃດ ບາງທີເຂົ້າໂຕເອງແດ່ ກະມີຊິນ່າ ມັນກໍສົ່ງຜົລສະທ້ອນຫຼາຍຢ່າງຫັ້ນແຫຼະ. ບາງທີເຮົາກໍຢາກຊ່ວຍເນາະ ບາດນີ້ ມັນເຈີ ບັນຫາແນວນີ້ມາຫຼາຍເຂົາບໍ່ໄວ້ໃຈ ສົມມຸດວ່າ ເຮົາຊ່ວຍໄປແລ້ວ ເງິນໂຕນັ້ນ ຊິໄດ້ໄປຊ່ວຍຜູ້ທີ່ວ່າເດືອດຮ້ອນແທ້ໆບໍ່.”
ວິທຍຸເອເຊັຽເສຣີ ພະຍາຍາມ ຕິດຕໍ່ຫາ ມູລນິທິ ອາສາຊ່ວຍເຫຼືອຜູ້ປະສົບພັຍ ແຂວງສວັນນະເຂດ ເພື່ອສອບຖາມຂໍ້ມູນເພີ່ມເຕີມກ່ຽວກັບເຣື່ອງນີ້ ແຕ່ບໍ່ສາມາດຕິດຕໍ່ໄດ້.
ມາດຕຣາ 1 ຂອງແຈ້ງການສັ່ງຍຸບເລີກ ໄດ້ລະບຸວ່າ: ເຫັນດີຍຸບເລີກ ມູລນິທິອາສາຊ່ວຍເຫຼືອຜູ້ປະສົບພັຍ ແຂວງສວັນນະເຂດ ທີ່ໄດ້ຮັບການອະນຸມັດສ້າງຕັ້ງ ຈາກ ທ່ານ ເຈົ້າແຂວງ ສວັນນະເຂດ ສະບັບເລກທີ 948 ລົງວັນທີ 21 ມິຖຸນາ 2017.
ມາຕຣາ 2 ໄດ້ລະບຸວ່າ: ໃຫ້ມູລນິທິອາສາຊ່ວຍເຫຼືອຜູ້ປະສົບພັຍ ແຂວງສວັນນະເຂດ ແກ້ໄຂບັນຫາໜີ້ສິນ ໃຫ້ສຳເຣັດແລ້ວ ຣາຍງານ ຜແນກພາຍໃນ ແຂວງຊາບຕາມລະບຽບການ ສຳລັບຊັບສິນ ທີ່ຍັງເຫຼືອໃຫ້ປະຕິບັດຕາມາດຕຣາ 32 ຂອງດຳຣັຖວ່າດວ້ຍມູລນິທິ ສະບັບເລກທີ 149 ລົງວັນທີ 19 ພຶສພາ 2011.
ມາດຕຣາ 3 ມອບໃຫ້ ປກສ ແຂວງ ສົມທົບກັບ ຂແນງການທີ່ກ່ຽວຂ້ອງ ເປັນຜູ້ດຳເນີນ ເກັບກູ້ຄືນພາຫະນະ, ວັດຖຸອຸປະກອນຕ່າງໆ ທີ່ສັງຄົມບໍຣິຈາກ ເພື່ອນຳໄປຈົດດທະບຽນ ຊັບສິນໃຫ້ຖືກຕ້ອງ ຕາມລະບຽບກົດໝາຍ.