ກົມອຸຕຸນິຍົມ ແລະ ອຸທົກກະສາຕ ໄດ້ຣາຍງານວ່າ ນັບແຕ່ວັນທີ 21-22 ກໍຣະກະດາ ເກີດແຜ່ນດິນໄຫວ ຢູ່ປະເທດພະມ້າ 50 ກວ່າຄັ້ງ ສົ່ງແຮງສັ່ນສະເທືອນມາເຖິງ ແຂວງ ບໍ່ແກ້ວ ແລະ ແຂວງຫລວງນ້ຳທາ.
- ແຜ່ນດິນໄຫວ ໃນວັນທີ 21 ກໍຣະກະດາ ເວລາ 23:40 ຂນາດ1 ຣິກເຕີຣ໌ ຄວາມເລິກ 4 ກິໂລແມັດ ທາງທິດຕາເວັນຕົກສ່ຽງເໜືອຂອງ ແຂວງບໍ່ແກ້ວ ປະມານ 63 ກິໂລແມັດ ແລະ ແຂວງຫລວງນ້ຳທາ ປະມານ 83 ກິໂລແມັດ. ທາງການ ເວົ້າວ່າ ຄືການເຕືອນ ຫຼື Foreshock.
- ແຜ່ນດິນໄຫວ ເກີດຂຶ້ນ ໃນວັນທີ 22 ກໍຣະກະດາ ເວລາ 00:07 ຂນາດ4 ຣິກເຕີຣ໌ ຄວາມເລິກ 3 ກິໂລແມັດ ທາງທິດຕາເວັນຕົກສ່ຽງເໜືອ ຂອງແຂວງບໍ່ແກ້ວ ປະມານ 67 ກິໂລແມັດ ແລະ ແຂວງຫຼວງນ້ຳທາ ປະມານ 76 ກິໂລແມັດ. ທາງການເວົ້າວ່າ ແຜ່ນດິນໄຫວ ຂນາດໃຫຍ່ ຫຼື Mainshock.
- ແລະ ແຜ່ນດິນໄຫວ ໃນວັນທີ 22 ກໍຣະກະດາ ເວລາ 05:22 ຂນາດ3 ຣິກເຕີຣ໌ ຄວາມເລິກ 3 ກິໂລແມັດ ທາງທິດຕາເວັນຕົກສ່ຽງເໜືອຂອງແຂວງ ບໍ່ແກ້ວ ປະມານ 62 ກິໂລແມັດ ແລະ ແຂວງຫລວງນ້ຳທາ ປະມານ 82 ກິໂລແມັດ. ທາງການເວົ້າວ່າ ເຫດການແຜ່ນດິນໄຫວຕາມມາ ຫຼື Aftershock.
ປະຊາຊົນຢູ່ເມືອງ ຫ້ວຍຊາຍ ແລະ ເມືອງຕົ້ນເຜິ້ງ ແຂວງ ບໍ່ແກ້ວ ສາມາດສຳຜັດໄດ້ເຖິງແຮງສັ່ນສະເທືອນຂອງແຮງແຜນດິນໄຫວ ແລະ ແຮງສັ່ນສະເທືອນດັ່ງກ່າວ ສາມາດສ້າງຄວາມເສັຽຫາຍໄດ້.
ເຈົ້າໜ້າທີ່ກົມອຸຕຸນິຍົມ ແລະ ອຸທົກກະສາຕ ໄດ້ກ່າວຕໍ່ວິທຍຸເອເຊັຽເສເຣີ ໃນວັນທີ 22 ກໍຣະກະດາ ວ່າ:
" ຢູ່ ລະ ດັບ ປານ ກາງ ເນາະ ຖື ວ່າ 6 ຂຶ້ນ ໄປ ຈະ ໃສ່ ແບບ ແຮງ ແລ້ວ ຫັ້ນ ນ່າ ມັນ ກໍ ຂຶ້ນ ກັບ ແວດ ລ້ອມ ນຶ່ງ ເນາະ ຂ ນາດ ຂອງ ແຜ່ນ ດິນ ໄຫວ ສອງ ຄວາມ ເລິກ ແລະ ກໍ ແວດ ລ້ອມ ພູມ ສັນ ຖານ ອີ່ ຫຍັງ ຕ່າງໆ ນີ້ ນ່າ ສົມ ມຸດ ວ່ ມັນ ເກີດ ຢູ່ ພູ ເນາະ ຢູ່ ທີ່ ວ່າ ດິນ ແຂງ ຫັ້ນ ນ່າ ມັນ ກໍ ບໍ່ ສາ ມາດ ທີ່ ຈະ ກະ ຈາຍ ອ່າ ກະ ຈາຍ ຄື້ນ ໄດ້ ໄກ ຢ່າງ 6.4 ຣິກ ເຕີ ນີ້ ເນາະ ອາ ຈ ເປັນ ຜົ ລ ກະ ທົບ ແບບ ວ່າ ຂຶ້ນ ກັບ ວ່າ ລັກ ສະ ນະຂອງ ໂຄງ ສ້າງ ປະ ເທດ ລາວ ເຮົາ ນີ້ ນ່າ ການ ປຸກ ສ້າງ ເນາະ ຈະ ເຮັດ ແບບ ປະ ຖົມ ປະ ຖານ ຈັ່ງ ຊີ້ ນ່າ ອາ ຈ ເກີດ ຄວາມ ເສັຽ ຫາຍເນາະ ."
ຍາງນາງ ກ່າວຕື່ມວ່າ ຕາມຫຼັກວິຊາການ ຄວາມເລິກທີ່ໜ້ອຍກວ່າ 50 ກິໂລແມັດ ໃນຂະນະທີ່ແຜ່ນດິນໄຫວ ຖືວ່າ ເປັນຄວາມເລິກທີ່ສ້າງຄວາມເສັຽຫາຍໄດ້ ເຊິ່ງ ເມືອງຕົ້ນເຜິ້ງ ແລະ ເມືອງຫ້ວຍຊາຍ ກໍມີຄວາມເລິກ 3-4 ກິໂລແມັດ ໃນຂະນະທີ່ເກີດແຜ່ນດິນໄຫວ ຈຶ່ງຕ້ອງເຝົ້າລະວັງຕື່ມ ນອກຈາກນີ້ ກົມອຸຕຸນິຍົມ ແລະ ອຸທົກກະສາຕ ກໍຈະຕິດຕາມຕໍ່ໄປ.
ຫຼາຍຄົນ ທີ່ອາສັຍ ຢູ່ອາຄານສູງໃນເຂດເສຖກິຈພິເສດ ສາມຫຼ່ຽມຄຳ ກໍຮູ້ສຶກເຖິງແຮງສະເທືອນຂອງແຜ່ນດິນໄຫວ ໂດຍສະເພາະແຜ່ນດິນໄຫວ ຂນາດ 6.4 ຣິກເຕີຣ໌ ຄວາມເລິກ 3 ກິໂລແມັດ ແລະ ຜູ້ຄົນຢູ່ເຂດດັ່ງກ່າວ ກໍໄດ້ພາກັນອົພຍົບ ອອກຈາກອາຄານລົງມາເດີ່ນ ທັນທີ ແຕ່ ກໍຍັງບໍ່ມີຣາຍງານຜົລເສັຽຫາຍ.
ປະຊາຊົນ ຢູ່ເຂດເສຖກິຈພິເສດ ສາມຫຼ່ຽມຄຳ ເມືອງຕົ້ນເຜິ່ງ ກ່າວໃນວັນທີ 22 ກໍຣະກະດາ ວ່າ:
" ບໍ່ ແມ່ນ ແຮງ ປານ ໃດ ເດີ ບໍ່ ແມ່ນ ເຮົາ ຢູ່ ເທິງ ເຮົາ ຢູ່ ຕິດ ດິນ ແລ້ວ ມັນ ບໍ່ ແຮງ ຫຼາຍ ເຂົາ ເຈົ້າ ລົງ ມາ ໝົດ ແລ້ວ ຜູ້ ຢູ່ ຕຶກ ສູງໆ ນ່າ ເຄູ່ອງ ຂອງ ເຮົາ ບໍ່ ເສັຽ ຫາຍ ເພາະ ວ່າ ເຮົາ ເປີ ດ ຮ້ານ ອາ ຫານ ເຮົາ ຢູ່ ຕິດ ດິນ ເລີຍ ມັນ ກໍ ບໍ່ ແຮງ ປາຍ ໃດ ມັນ ກໍ ໜ້ອຍ ດຽວຊື່ໆ ."
ແຜ່ນດິນໄຫວຄັ້ງນີ້ ເຮັດໃຫ້ປະຊາຊົນ ຢູ່ ເມືອງຫ້ວຍຊາຍ ພາກັນຕົກໃຈ ໃນຂະນະທີ່ ບາງຄົນ ກໍກຳລັງນອນຢູ່.
ປະຊາຊົນ ຢູ່ບ້ານ ນ້ຳຕ໋ອງ ເມືອງຫ້ວຍຊາຍ ແຂວງບໍ່ແກ້ວ ໄດ້ກ່າວໃນວັນທີ 22 ກໍຣະກະດາ ວ່າ:
"ນ້ອງນີ້ ນອນ ລະ ເດ້ ເຫັນ ສັ່ນໆ ຄິດ ວ່າ ແມ່ນ ຫຍັງ ໂອ້ ມາ ຍູ້ ຕຽງນ້ອງ ແຮງ ຈົນຕົກ ໃຈ ມັນ ຫຼາຍ ປີ ແລ້ວ ບໍ່ ເກີດ ຂຶ້ນ ເກີດ ຂຶ້ນ ແຕ່ ມັນ ບໍ່ ແຮງ ແຕ່ ປີນີ້ ເກີດ ຂຶ້ນ ແຮງ ບໍ່ ບໍ່ ເຫັນ ອອກ ມາ ແຈ້ງ ຫຍັງ ໃຫ້ ເຝົ້າ ລະ ວັງ ບໍ່ ໝີ ເພາະ ມັນ ໄມ້ ເຄີຍ ໄຫວ ມາ ກ່ອນ ."
ປະຊາຊົນ ຢູ່ບ້ານດອນເງິນ ເມືອງຕົ້ນເຜິ້ງ ທີ່ຢູ່ຫ່າງຈາກເທສບານ ເມືອງຕົ້ນເຜິ້ງເກືອບ 30 ກິໂລແມັດ ກໍຮູ້ສຶກເຖິງແຮງສັ່ນສະເທືອນ ຂອງແຜ່ນດິນໄຫວ ຄືກັນ ແຕ່ບໍ່ຮຸນແຮງ ຈົນເກີດຜົລເສັຽຫາຍຕໍ່ບ້ານເຮືອນ.
ປະຊາຊົນ ຢູ່ບ້ານ ດອນເງິນ ເມືອງຕົ້ນເຜິ້ງ ໄດ້ກ່າວໃນວັນທີ 22 ກໍຣະກະດາ ວ່າ:
"ບໍ່ ມີ ອີ່ ສັງ ບໍ່ ແຮງ ປານ ໃດ ພໍ ໃຫ້ ຮູ້ ສຶກ ສັ່ນ ສະ ເທືອນ ຊື່ໆ ບໍ່ ໄດ້ ເສັຽ ຫາຍ ຈັກ ຢ່າງດອກ ບາງ ຄົນ ກໍ ບໍ່ ຮູ້ ສຶກ ເລີຍ ຫັ້ນ ນ່າ ບໍ່ ຮູ້ ແຜ່ນ ດິນ ໄຫວ ຊ້ຳ ບາງ ຄົນ ເຂົາ ບໍ່ ຄ່ອຍ ໄດ້ ຜ່ານ ໄດ້ ຜ່ານ ພົບ ເນາະ ເຂົາ ກໍ ບໍ່ ຮູ້ ເສີຍ ວ່າ ເຮືອນ ເປັນ ຫຍັງ ຮື ຍັບ ລະ ຍິບ ລະ ຍິບນີ້ ເຂົາ ກໍ ບໍ່ ຮູ້ ."
ໃນວັນທີ 22 ກໍຣະກະດາ ຫ້ອງການປົກຄອງເມືອງຫ້ວຍຊາຍ ໄດ້ອອກແຈ້ງການ ໄປຫາອຳນາດການປົກຄອງ ຂັ້ນບ້ານ ໃນທົ່ວເມືອງໃຫ້ເຝົ້າລະວັງ ແຜ່ນດິນໄຫວ ແລະ ໃຫ້ຫ້ອງການແຮງງານ ສວັດດີການສັງຄົມ ເກັບກຳຂໍ້ມູນນຳນາຍບ້ານໃນທົ່ວເມືອງ ແລ້ວແຈ້ງຜົລເສັຽຫາຍ ແລ້ວສເນີຕໍ່ ຂັ້ນແຂວງໃນຂັ້ນຕໍ່ໄປ ໃນຂະນະທີ່ ເມືອງຫ້ວຍຊາຍ ຍັງບໍ່ມີຣາຍງານຜູ້ເສັຽຊີວິຕ ແລະ ບາດເຈັບ.
ເຈົ້າໜ້າທີ່ກ່ຽວຂ້ອງ ເມືອຫ້ວຍຊາຍ ໄດ້ກ່າວໃນວັນທີ 22 ກໍຣະກະດາ ວ່າ:
"ດຽວນີ້ ສຳ ລັບ ເມືອງ ຫ້ວຍ ຊາຍ ພວກ ເຮົາ ໄດ້ ປະ ສານ ແລ້ວ ລົງ ໄປ ແລ້ວ ເພາະ ກໍ ບໍ່ ມີ ບ້ານ ໃດ ໄດ້ ຮັບ ຄວາມ ເສັຽ ຫາຍ ຫຼື ເປ່ ເພ ອີ່ ຫຍັງ ເພື່ອ ເນາະ ເພາະ ວ່າ ເຮົາ ໄດ ຕິດ ຕາມ ແຕ່ ຕອນ ເຊົ້າ ມາ ແລ້ວເນາະ ພວກ ເຮົາ ໄດ້ ອອກ ແຈ້ງ ການ ໄດ້ ອອກ ທົ່ວ ເມືອງ ມາ ຮອດ ຈັດ ຈຸ ບັນນີ້ ຍັງ ບໍ່ ມີ ບ້ານ ໃດ ໄດ້ ແຈ້ງ ຄວາມ ເສັຽ ຫາຍ ແນວ ໃດ ເນາະ ."
ເຖິງຢ່າງໃດກໍຕາມ, ຍັງບໍ່ທີຣາຍງານ ຂໍ້ມູນຈາກແຂວງ ແຂວງຫຼວງນ້ຳທາ ກ່ຽວກັບແຜ່ນດິນໄຫວຄັ້ງນີ້.
ນອກຈາກນີ້ ກໍຍັງມີຣາຍງານວ່າ ຢູ່ເມືອງແມ່ສາຍ ແຂວງຊຽງຮາຍ ປະເທດໄທຍ ກໍຮູ້ສຶກເຖິງແຮງສັ່ນສະເທືອນຂອງແຜ່ນດິນໄຫວດັ່ງກ່າວ.