ໂຮງງານໂຟມຢາງ ຂັ້ນຫວີກ້ວຍຈີນ ລົບກວນ ຊາວບ້ານ
2019.12.04
ສວນກ້ວຍ ຂອງນັກລົງທຶນຈີນ ຢູ່ ສປປລາວ
ໂຮງງານຜລິຕໂຟມຢາງ ເພື່ອຂັ້ນຫວີກ້ວຍ ເວລາໃສ່ແກັດຂອງຈີນ ຢູ່ບ້ານຊຸ້ນ, ເມືອງປາກຊັນ ແຂວງບໍຣິຄຳໄຊ ສົ່ງກິ່ນຂິວ ແລະ ສຽງດັງ ລົບກວນໄປເຖິງປະຊາຊົນ ບ້ານທົ່ງ 10 ປາຍຄອບຄົວ ທີ່ມີເຮືອນ ຢູ່ໃກ້ກັບໂຮງງານ, ມີອາການແສບດັງ ແລະ ແສບຕາ.
ເຄື່ອງຈັກ ທີ່ຜລິຕໂຟມຢາງນັ້ນ, ສົ່ງສຽງດັງ ລົບກວນຊາວບ້ານ ທັງເວັນທັງຄືນ ຕັ້ງແຕ່ 6 ໂມງເຊົ້າ ໄປເຖິງ 12 ໂມງທ່ຽງຄືນ, ຕາມຄຳເວົ້າຂອງປະຊາຊົນ ບ້ານທົ່ງໃຫຍ່, ເມືອປາກຊັນ ຕໍ່ວິທຍຸເອເຊັຽເສຣີ ໃນມື້ວັນທີ 4 ທັນວານີ້.
“ເພິ່ນມາຕັ້ງໂຮງງານຂອງຄົນຈີນ, ແຕ່ໂຮງງານມັນຢູ່ໃກ້ຊຸມຊົນ ກໍກິ່ນຂິວ ອອກຈາກເຜົາໄໝ້ຂອງເຕົາແກ໊ສ ເພິ່ນຜລິຕຫັ້ນແຫຼະ ຜົນກະທົບແຮງ ມັນຂິວ ແລ້ວເຂົາເຈົ້າຢູ່ບໍ່ໄດ້ ແສບດັງ ແສບຕາ ແລະ ກໍເຣື້ອງສຽງ ມີຜົລກະທົບຕໍ່ພໍ່ແມ່ປະຊາຊົນ.”
ນາງກ່າວວ່າ ໂຮງງານດັ່ງກ່າວ ຫາກໍຕັ້ງມາແຕ່ມື້ວັນທີ 10 ຕຸລາ ທີ່ຜ່ານມາ ໂດຍທີ່ບໍ່ທັນໄດ້ຮັບອະນຸຍາດ ຈາກທາງການເມືອງ ແລະ ແຂວງ, ແຕ່ກໍໄດ້ທຳການຜລິຕໂຟມຢາງນັ້ນມາຈົນຮອດມື້ນີ້ ແລະ ວ່າ ທີ່ຜ່ານມາ ອຳນາດການປົກຄອງບ້ານ ກໍໄດ້ສເນີ ບັນຫາດັ່ງກ່າວ ໄປຍັງຫ້ອງການ ສະພາປະຊາຊົນແຂວງແລ້ວ, ແຕ່ບັນຫານັ້ນ ກໍຍັງບໍ່ທັນໄດ້ຮັບການແກ້ໄຂ. ດັ່ງນັ້ນຈຶ່ງຢາກສເນີ ໃຫ້ພາກສ່ວນທີ່ກ່ຽວຂ້ອງ ຊ່ອຍແກ້ໄຂ.
ກ່ຽວກັບເຣຶ່ອງທີ່ວ່ານີ້ ເຈົ້າໜ້າທີ່ຜແນກແຜນການ ແລະການລົງທຶນແຂວງບໍລິຄຳໄຊ ກ່າວວ່າ ທີ່ຜ່ານມາ ໂຮງງານຜລິດໂຟມຂັ້ນຫວີກ້ວຍຈີນນີ້ ກໍໄດ້ຍື່ນໜັງສື ຂໍສ້າງໂຮງງານໃຫ້ຖືກຕ້ອງມາຍັງທາງແຂວງ ແຕ່ບໍ່ໄດ້ຮັບອະນຸຍາດໃຫ້ສ້າງ ຍ້ອນວ່າ ໂຮງງານທີ່ຈະສ້າງນັ້ນຕັ້ງຢູ່ໃກ້ເຂດຊຸມຊົນເກີນໄປ, ມີປະຊາຊົນອາໄສຢູ່ຫຼາຍ, ແຕ່ທາງໂຮງງານ ກໍຍັງດຳເນີນການຜລິຕຢູ່, ດັ່ງທີ່ທ່ານກ່າວ ໃນມື້ດຽວກັນນັ້ນວ່າ:
“ມັນໃກ້ຊຸມຊົນໂພດ ພວກເຂົາເຈົ້າມາຕັ້ງໂຮງງານ ແລ້ວບໍ່ມາສເນີພວກຂ້ອຍ ພວກຂ້ອຍບໍ່ຮູ້. ໄປລົມແລ້ວ ມີມາລົມແລ້ວ ມີແຕ່ວ່າໃຫ້ໂຍກຍ້າຍ ຍ້າຍໄປຢູ່ບ່ອນອື່ນ.”
ເຈົ້າໜ້າທີ່ຜແນກຊັພຍາກອນ ທຳມະຊາດ ແລະ ສິ່ງແວດລ້ອມ ແຂວງບໍລິຄຳໄຊ ກໍກ່າວວ່າ ໃນໄລຍະ 3 ເດືອນຜ່ານມາ ຄື ເຣີ່ມຕັ້ງແຕ່ໄດ້ສ້າງໂຮງງານມາ ຂແນງສິ່ງແວດລ້ອມ ກໍໄດ້ສົ່ງ ໜັງສືແຈ້ງການ ໄປຍັງໂຮງງານນັ້ນ, ໃຫ້ເລືອກສະຖານທີ່ ທີ່ເໝາະສົມ ສຳລັບຕັ້ງໂຮງງານ, ບ່ອນທີ່ບໍ່ສົ່ງຜົລກະທົບ ຕໍ່ສິ່ງແວດລ້ອມ ແລະ ຕໍ່ຊຸມຊົນ ຍ້ອນວ່າ ໂຮງງານນີ້ ສົ່ງກິ່ນຂິວ ລົບກວນຊາວບ້ານ, ແຕ່ທາງໂຮງງານ ກໍຍັງຜລິຕຕໍ່ຢູ່. ດັ່ງທີ່ທ່ານກ່າວໃນມື້ດຽວກັນນີ້ວ່າ:
“ເພາະວ່າໂຮງງານນີ້ ພວກເຮົາບໍ່ໄດ້ອອກອະນຸຍາດໃຫ້ ໃນເບື້ອງຕົ້ນຫັ້ນນະ ເຮົາບໍ່ໄດ້ອະນະຍາດຫຍັງ ແຕ່ວ່າຜູ້ປະກອບການນີ້ເຮັດໄປກ່ອນ. ພວກເຮົາມີໜັງສື ແຈ້ງຜູ້ປະກອບການນີ້ ໄປຄັດເລືອກສະຖານທີ່ ທີ່ເໝາະສົມ ໃນການສ້າງຕັ້ງໂຮງງານນັ້ນ ເພາະບ່ອນນັ້ນ ມັນບໍ່ເມາະສົມ. ມັນຢູ່ກາງຊຸມຊົນ ແລະ ອາຈມີຜົລກະທົບ ຕໍ່ຊຸມຊົນນັ້ນ.”
ເຣື້ອງກິ່ນຂິວ ຈາກໂຮງງານທີ່ວ່ານີ້, ເຈົ້າໜ້າທີ່ຜແນກອຸດສາຫະກຳ ແລະ ການຄ້າ ແຂວງບໍລິຄຳໄຊ ເວົ້າວ່າ ທາງຜແນກໄດ້ລົງໄປກວດກາ 3 ເທື່ອແລ້ວ, ໄດ້ພົບແກ໊ສເຜົາຢາງພລາສຕິກ ເພື່ອຜລິຕໂຟມນັ້ນ, ສົ່ງກິ່ນຂິວ ອອກໄປທາງນອກ ແລະ ໄດ້ສັ່ງບໍ່ໃຫ້ໂຮງງານຜລິຕ, ແຕ່ທາງໂຮງງານກໍບໍ່ເຊົາ. ແລະວ່າ ທາງຜແນກຈະສເນີ ຂຶ້ນຫາຂັ້ນແຂວງ ເພື່ອໃຊ້ມາດຕະການເດັດຂາດ ເປັນຕົ້ນ ຕັດໄຟຟ້າ ຫຼືສັ່ງໂຈະ ບໍ່ໃຫ້ຜລິຕຕໍ່ໄປ ຍ້ອນວ່າ ໃນໄລຍະ 3 ເດືອນ ທີ່ໂຮງງານຜລິຕໂຟມຢາງມານີ້ ເຮັດໃຫ້ຄົນງານ ໃນໂຮງງານ ເສັຽຊີວິດຍ້ອນກິ່ນຂິວໄປແລ້ວ 1 ຄົນ. ດັ່ງທີ່ທ່ານໄດ້ກ່າວ ຕໍ່ວິທຍຸເອເຊັຽເສຣີ ໃນມື້ວັນທີ 4 ທັນວານີ້:
“ຍັງບໍ່ໄດ້ເຮັດຫຍັງ ຄິດວ່າສິສເນີທາງເຈົ້າແຂວງ ເພື່ອໃຫ້ມີວິທີນັ້ນແຫຼະ, ໂດຍສະເພາະມາຕການເດັດຂາດ ເພື່ອບໍໃຫ້ເຂົາເຈົ້າເຮັດຕໍ່ໄປ ຕັດໄຟຕັດມະຫຍັງຫັ້ນແຫຼະ ເອົາຕຳຣວດເຂົ້າໄປຈັດການ ຄິດວ່າເຖິງຂັ້ນນັ້ນແລ້ວແຫຼະ. ຕາຍຜູ້ນຶ່ງແລ້ວເກາະ ຕາຍຢູ່ໂຮງງານນັ້ນແຫຼະ, ເວົ້າງ່າຍໆສະ ມັນກໍຕ້ອງຮັບຜິດຊອບ ມັນຕ້ອງສັ່ງໂຈະ.”
ອີງຕາມຄຳເວົ້າ ຂອງເຈົ້າໜ້າທີ່ຜແນກອຸດສາຫະກຳ ແລະ ການຄ້າ ທ່ານນີ້ແລ້ວແມ່ນວ່າ ໂຮງງານຜລິຕໂຟມຢາງ ຂອງຈີນແຫ່ງນີ້ ເປັນໂຮງງານໃຫຍ່ ຕັ້ງຢູ່ກາງຊຸມຊົນ ໃນເນື້ອທີ່ 1 ເຮັກຕາ. ເມື່ອຜລິຕໂຟມໄດ້ແລ້ວ ກໍສົ່ງໄປສວນກ້ວຍ ຢູ່ເມືອງບໍລິຄັນ.