ກອງປະຊຸມຣັຖມົນຕຣີ ພລັງງານ ອາຊຽນ

ໄທ ຈະ ເຂົ້າຮ່ວມ ກອງປະຊຸມ ຣັຖມົນຕຣີ ພລັງງານ ອາຊຽນ ທີ່ ຈະ ຈັດຂຶ້ນ ຢູ່ ສປປລາວ ແຕ່ ວັນທີ 22 ຫາ 23 ກັນຍາ 2014. ຂ່າວ ເບີນາມາ ຣາຍງານ ຈາກ ບາງກອກ ໃນວັນທີ 17 ກັນຍາ ນີ້ວ່າ ການ ຮ່ວມມື ດ້ານ ພລັງງານ ຂອງໄທ ກັບ ພະມ້າ ແລະ ລາວ ຈະເປັນ ສ່ວນໜຶ່ງ ຂອງ ວາຣະ ກອງປະຊຸມ ຄັ້ງນີ້.

ທ່ານ ຊະວາລິດ ພິຊະໄລ ຫົວໜ້າ ຫ້ອງການ ນະໂຍບາຍ ພລັງງານ ແລະ ແຜນການ EPPO ກະຊວງ ພລັງງານ ຂອງໄທ ເວົ້າວ່າ EPPO ຈະສເນີ ໃຫ້ ຣັຖມົນຕຣີ ພລັງງານໄທ Narongchai Akrasanee ຂຍາຍ ການ ຮ່ວມມື ຂໍ້ຕົກລົງ ພລັງງານ ກັບ ພະມ້າ ທີ່ ຈະປຶກສາ ກັນ ໃນ ກອງປະຊຸມ ຢູ່ລາວ ໃນ ສັປດາ ໜ້າ.

ຂໍ້ສເນີ ດັ່ງກ່າວ ມີຮວມທັງ ແຜນການ ຂອງໄທ ທີ່ ຈະຊື້ ໄຟຟ້າ ຈາກ ພະມ້າ ຫລາຍຂຶ້ນ ຄືຈາກ 1500 ເມັກກາວັດ ມາເປັນ 10 ພັນ ເມັກກາວັດ ແລະ ທັງຈະຊື້ ນ້ຳມັນກາສ ຈາກ ພະມ້າ ນໍາດ້ວຍ. ຜູ້ວ່າການ ການ ໄຟຟ້າ ຝ່າຍຜລິດ ແຫ່ງ ປະເທດໄທ ຫລື EGAT ສຸນໃຈ ຄຳນູນເສດ ກ່າວ ຕໍ່ນັກຂ່າວ ວ່າ ໄທ ຈະຫາຣື ກັບ ຝ່າຍລາວ ເພື່ອ ປ່ຽນແປງ ເຣື່ອງການ ນຳເຂົ້າ ໄຟຟ້າ ຈາກ ປະເທດ ລາວ.