ຣັຖບານມາເລເຊັຽ ແລະ ໄທຍ ມີແຜນຈະເຊື່ອມຕໍ່ທາງຣົຖໄຟ ຂອງຕົນມາໃສ່ ທາງຣົຖໄຟ ລາວ-ຈີນ ໃນອະນາຄົຕ ເຊິ່ງມີໄລຍະທາງທັງໝົດປະມານ 2,000 ກິໂລແມັດ ອີງຕາມການຣາຍງານ ຂອງສຳນັກຂ່າວບາງກອກໂພສຕ໌ ຂອງໄທຍ ໃນວັນທີ 18 ສິງຫາ 2022.
ມີການຄຳນວນອອກມາວ່າ ການເດີນທາງດ້ວຍຣົຖໄຟ ຈາກມາເລເຊັຽມາຮອດປະເທດລາວ ຈະໃຊ້ເວລາປະມານ 70 ຊົ່ວໂມງ.
ໃນວັນທີ 15 ສິງຫາ ທີ່ຜ່ານມາ, ຜູ້ວ່າການຣົຖໄຟແຫ່ງປະເທດໄທຍ ແລະ ຜູ້ວ່າການຣົຖໄຟຂອງມາເລເຊັຽ ໄດ້ເປີດພິທີທົດລອງແລ່ນ ຂບວນຣົຖໄຟຂົນສົ່ງສິນຄ້າ ຈຳນວນ 20 ຕູ້ ຄອນເທນເນີຣ໌ ຜ່ານດ່ານປາດັງເຊຊາຣ໌ ຢູ່ຊາຍແດນມາເລເຊັຽ-ໄທຍ ມາຮອດ ແຂວງໜອງຄາຍ. ຣົຖໄຟຂບວນດັ່ງກ່າວ ແລ່ນຈາກປະເທດມາເລເຊັຽ ໃນວັນທີ 12 ສິງຫາ ແລະ ມາຮອດແຂວງໜອງຄາຍ ໃນວັນທີ 17 ສິງຫາ.
ເຈົ້າໜ້າທີ່ປະຈຳສຖານນີຣົຖໄຟ ແຂວງໜອງຄາຍ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 22 ສິງຫາ ວ່າ:
" ເປັນການ ທົດ ສອບ ແລ່ນ ມາ ຈາກ ມາ ເລ ເຊັຽ ຊື່ໆ ເປັນ ຂບວນ ຣົ ຖ ໄຟ ຕູ້ ຄ ຕອ ນ ເທນ ເນີຣ໌ ເປົ່າ ຊື່ໆ. ຍັງ ບໍ່ ທັນ ຂົນ ສົ່ງ ສິນ ຄ້າ. ໄດ້ ທົດ ລອງ ແລ່ນ ແລະ ຣົ ຖ ໄຟ ກໍ ແລ່ນ ຕາມ ປົກ ຕິ. ແລ່ນ ທົດ ລອງວ່າ ຈະ ໃຊ້ ໄລ ຍະ ເວ ລາ ຈັກ ມື້, ຈາກ ມາ ເລ ເຊັຽ ຮອດ ໜອງ ຄາຍ ຍັງ ບໍ່ ທັນ ກຳ ນົດ ວ່າ ຈະ ເຣີ່ມ ຂົນ ສົ່ງ ສິນ ຄ້າແບບ ເປັນ ທາງ ການມື້ ໃດ ເປັນ ພຽງ ການ ທົດ ລອງ ແລ່ນ ເທົ່າ ນັ້ນ ."
ໃນຂະນະທີ່ ບໍຣິສັດ ໃຫ້ບໍຣິການຂົນສົ່ງສິນຄ້າບາງແຫ່ງ ທີ່ມີພື້ນທີ່ເກັບເຄື່ອງຢູ່ເຂດໂລຈິສຕິກສ໌ ທ່າບົກ-ທ່ານາແລ້ງ ນະຄອນຫລວງວຽງຈັນ ກໍຕຣຽມພ້ອມທີ່ຈະໃຫ້ບໍຣິການຂົນສົ່ງສິນຄ້າ ຜ່ານຣົຖບັນທຸກ ໂດຍຜ່ານປະເທດໄທຍ ນັ້ນຈະມີຕົ້ນທຶນສູງ.
ພະນັກງານບໍຣິການ ຂົນສົ່ງສິນຄ້າແຫ່ງນຶ່ງ ໃນເຂດໂລຈິສຕິກສ໌ ທ່າບົກ-ທ່ານາແລ້ງ ໄດ້ກ່າວວ່າ:
" ມີໆ ! ເຈົ້າ ສິນ ຄ້າ ທີ່ ໄປ ຈາກ ຈີນ ກັບ ມາ ເລ ເຊັຽ ກະ ມີ ນ່າ ເພາະ ວ່າ ເຮົາ ກຳ ລັງ ເປີດ ທາງ ແຕ່ ຈີນ ໄປ ມາ ເລ ເຊັຽ ກະ ໄດ້ ຫຼື ວ່າ ຈີນ ໄປ ມາ ເລ ເຊັຽ ກະ ມີ . ສ່ວນ ຫຼາຍ ມັນ ກະ ເນັ້ນ ທາງ ຣົ ຖ ນ່າ ຂົນ ສົ່ງ ທາງ ຣົ ຖ ໄຟຂອງ ໄທ ຍນີ້ ເຮົາ ນີ້ບໍ່ ໄດ້ ອັນ ນັ້ນ ເທື່ອ ນ່າ, ເພາະ ວ່າ ຂບວນ ໄທ ຍ ກັບ ຈີນ ຍັງ ບໍ່ ສາ ມາດ ເຊື່ອ ມຕໍ່ ກັນ ໄດ້ ."
ສ່ວນວ່າ ຜູ້ປະກອບການຂົນສົ່ງສິນຄ້າລະຫວ່າງ ລາວ, ໄທຍ ແລະ ຈີນ ຍັງບໍ່ທັນຮູ້ຣາຍລະອຽດເຣື່ອງນີ້. ຜູ້ປະກອບການຂົນສົ່ງສິນຄ້າ ນາງນຶ່ງ ໄດ້ກ່າວວ່າ:
" ຍັງ ບໍ່ ຮູ້ ຄື ກັນ ເພາະ ເຮົາ ກໍ ຊອກ ຫາ ບ່ອນ ທີ່ ວ່າ ມັນ ໄປ ໄດ້ , ເພາະ ວ່າ ເຮົາ ກະ ຊອກ ຜູ້ ມາ ຮ່ວມ ທຸ ຣະ ກິຈຫຍັງ ຫັ້ນ ແຫຼະ. ທາງ ເຮົາ ກະ ມາ ແຕ່ ຈີນ ມາ ລາວ, ແຕ່ ຈີນ ມາ ລາວ ຫັ້ນ ແມ່ນ ມັນ ມີ ບາງ ສ່ວນ ທີ່ ວ່າ ໃສ່ ເຄື່ອງ ໃສ່ ຣົ ຖ ໄຟ ມາ ເປັນ ປະ ເພດ ເຄື່ອງ ໃຫຍ່ ."
ການສົ່ງອອກ ຫຼື ນຳເຂົ້າ ສິນຄ້າ ໂດຍ ຜ່ານທາງຣົຖຂົນສົ່ງ ຈະມີຄ່າໃຊ້ຈ່າຍສູງ ເພາະວ່າ ນ້ຳມັນແພງ.
ທ່ານ ສະຣິດພົນ ວິຊິດວົງ ປະທານຜູ້ປະກອບການຣຸ້ນໃໝ່ ຫໍການຄ້າແຂວງໜອງຄາຍ ໄດ້ກ່າວວ່າ:
" ການ ສົ່ງ ອອກ ຫຼື ນຳ ເຂົ້າ ສິນ ຄ້າ ຈະ ໄດ້ ຜົ ລ ປ ໂຍດ ເພື່ອ ທີ່ ຈະ ປະ ຢັດ ເຣື່ອງ ຄ່າ ຂົນ ສົ່ງ ເທົ່າ ທີ່ ເຮົາ ເຫັນ ໂຕ ເລຂ ໄລ ຍະ ຜ່ານ ມາ ການ ຂົນ ສົ່ງ ດ້ວຍຣົ ຖ ບັນ ທຸກກໍ ຈະ ຜັນ ຜວນ ຕາ ມລາ ຄາ ນ້ຳ ມັນ ເຊິ່ງ ປັດ ຈຸ ບັນ ລາ ຄາ ນ້ຳ ມັນ ຂ້ອນ ຂ້າງ ມີ ລາ ຄາ ສູງ. ຕົ້ນ ທຶນ ການ ຂົນ ສົ່ງ ກໍ ສູງ ຂຶ້ນ ໄປ ດ້ວຍ, ດັ່ງ ນັ້ນ ຖ້າ ສາ ມາດ ທີ່ ຈະ ໃຊ້ ຣົ ຖ ໄຟ ແທນໄດ້ ກໍ ເຫັນ ວ່າ ແມ່ນ ເຣື່ອງ ທີ່ ດີ ."
ປັດຈຸບັນ ຢູ່ໃນເຂດໂລຈິສຕິກສ໌ ທ່າບົກ-ທ່ານາແລ້ງ ມີບໍຣິສັດ ທີ່ໃຫ້ບໍຣິການ ດ້ານການຂົນສົ່ງສິນຄ້າແຜ່ນແດນ ຫຼັກໆ 3 ບໍຣິສັດ ຄື ບໍຣິສັດ ສິດທິໂລຈິສຕິກລາວ ຈຳກັດ, ບໍຣິສັດ ລໍວົງຄຳ ຂົນສົ່ງ ແລະ ບໍຣິການ ສຖານນີຂົນສົ່ງສິນຄ້າ ຈຳກັດຜູ້ດຽວ, ແລະ ບໍຣິ Speed Logistics and Transportation Laos. ແຕ່ລະບໍຣິສັດ ໄດ້ເຊົ່າພື້ນທີ່ ຢູ່ເຂດໂລຈິສຕິກສ໌ ແລະ ມີສາງເກັບສິນຄ້າ ເພື່ອເຮັດໜ້າທີ່ຄ່ຽນຖ່າຍສິນຄ້າ ແລະ ອຳນວຍຄວາມສະດວກ ແກ່ການກວດກາສິນຄ້າ ຂອງເຈົ້າໜ້າທີ່ ກ່ອນທີ່ຈະນຳເຂົ້າ ຫຼື ສົ່ງອອກ ໄປຕ່າງປະເທດ.
ກ່ອນໜ້ານີ້ ທ່ານ ຊະຍະທັນ ພົມສອນ ປລັດກະຊວງຄົມນາຄົມ ຂອງໄທຍ ກໍໄດ້ປະຊຸມກັບ ທ່ານ Isham Ishak ປລັດກະຊວງຄົມນາຄົມ ຂອງມາເລເຊັຽ ພ້ອມກັບບໍຣິສັດຕ່າງໆ ຂອງປະເທດແກ້ຄຽງ ເພື່ອປຶກສາຫາລື ຊອກຫາຊ່ອງທາງ ໃນການກໍ່ສ້າງຈຸດເຊື່ອມຕໍ່ ທາງຣົຖໄຟຂອງ 2 ປະເທດ.
ທີ່ຜ່ານມາ ຣັຖບານມາເລເຊັຽ ເຄີຍຮ້ອງຂໍ ການເຊື່ອມຍົງ ທາງຣົຖໄຟຄວາມໄວສູງ ກັບໄທຍ ເພື່ອໃຫ້ເປັນຈຸດເຊື່ອມຕໍ່ໄປ ຫາທາງຣົຖໄຟ ລາວ-ຈີນ.
ອີງຕາມການຣາຍງານ ຈາກສື່ມວນຊົນມາເລເຊັຽ, ຣັຖບານໄທຍ ແລະ ມາເລເຊັຽ ໄດ້ປຶກສາຫາລື ກ່ຽວກັບໂຄງການດັ່ງກ່າວ ແລະ ຣັຖບານມາເລເຊັຽ ກໍເຫັນດີກັບແນວຄິດ ຂອງຝ່າຍໄທຍ ໃນການສ້າງຕັ້ງຄະນະເຮັດວຽກຮ່ວມກັນ ເພື່ອປຶກສາຫາລື ໃນການເຊື່ອຈອດທາງຣົຖໄຟ ສິງກະໂປ, ມາເລເຊັຽ ແລະ ໄທຍ ມາສູ່ເສັ້ນທາງຣົຖໄຟ ລາວ-ຈີນ.
ລະຫວ່າງ ວັນທີ 30 ສິງຫາ ຫາ ວັນທີ 1 ກັນຍາ 2022, ເຈົ້າໜ້າທີ່ທາງການໄທຍ ຈະເດີນທາງມາປະຊຸມກັບ ເຈົ້າໜ້າທີ່ທາງການລາວ ແລະ ພາກເອກຊົນລາວ ເພື່ອຫາລືກ່ຽວກັບການເຊື່ອມຕໍ່ ທາງຣົຖໄຟ ໄລຍະທາງ ລະຫວ່າງ ນະຄອນຫລວງວຽງຈັນ ກັບ ແຂວງໜອງຄາຍ, ແລະ ເພື່ອເພີ່ມຂີດຄວາມສາມາດ ແລະ ພັທນາລະບົບໂລຈິສຕິກສ໌ ດ້ວຍການຂົນສົ່ງສິນຄ້າ ຜ່ານທາງຣົຖໄຟ, ອີງຕາມການຣາຍງານ ຂອງ ທ່ານ ສັກສຍາມ ຊິດຊອບ ຣັຖມົນຕຣີ ກະຊວງຄົມນາຄົມ ຂອງໄທຍ ໃນວັນທີ 8 ສິງຫາ ທີ່ຜ່ານມາ.