ຄົນລາວຫຼັ່ງໄຫຼ ໄປເຮັດວຽກ ຢູ່ໄທຍຫຼາຍຂຶ້ນ ນັບມື້
2023.04.28
ຮູບໂຕຢ່າງ ຄົນງານລາວ ກຸ່ມທຳອິດ ເດີນທາງເຂົ້າໄປເຮັດວຽກຢູ່ປະເທດໄທຍຕາມ MOU. ຂົວມິຕພາບ ລາວ-ໄທຍ, ນະຄອນຫຼວງວຽງຈັນ-ໜອງຄາຍ ວັນທີ 28 ມີນາ 2022.
RFA
ປັດຈຸບັນ ຊາວລາວຫຼາຍຄົນ ພາກກັນໄປເຮັດວຽກຢູ່ປະເທດໄທຍ ຫຼາຍຂຶ້ນ ຍ້ອນປະເທດລາວ ປະສົບບັນຫາຄ່າຄອງຊີບແພງຂຶ້ນ ໃນຂະນະທີ່ເງິນກີບອ່ອນຄ່າ ແລະ ຄ່າແຮງງານຂັ້ນຕ່ຳໜ້ອຍ-ບໍ່ກຸ່ມຄ່າໃຊ້ຈ່າຍ.
ສ່ວນວ່າ ຂແນງການແຮງງານງານ ແລະ ສວັດດີການສັງຄົມ ໄດ້ໂຄສະນາເຕືອນຄົນລາວ ໃຫ້ໄປເຮັດວຽກຢູ່ຕ່າງປະເທດ ຢ່າງຖືກຕ້ອງ ແລະ ໃຫ້ໄປຜ່ານບໍຣິສັດຈັດຫາເງິນ ພາຍໃຕ້ໃບອະນຸຍາດ ແລະ ຄຸ້ມຄອງຂອງກະຊວງແຮງງານ ແລະ ສວັດດີການສັງຄົມ ເພື່ອໃຫ້ສິດທິທາງແຮງງານເຂົາເຈົ້າ ໄດ້ຮັບການປົກປ້ອງ ໃນກໍລະນີທີ່ເກີດບັນຫາຂຶ້ນ.
ຜູ້ທີ່ໄປເຮັດວຽກ ແບບຜິດກົດໝາຍ ກໍ່ໃຫ້ເກີດຄວາມສ່ຽງ ທີ່ຈະຕົກເປັນເຫຍື່ອ ການຄ້າມະນຸດ ແລະ ສ່ຽງທີ່ຈະຖືກນາຍຈ້າງ ກົດຂີຂູດຮີດແຮງງານ ເອົາລັດເອົາປຽບ, ບໍ່ໄດ້ຄ່າຈ້າງເຕັມສ່ວນ, ບໍ່ເຂົ້າເຖິງສວັດດີການສັ່ງຄົມ ໂດຍສະເພາະການດູແລ ຂຸຂພາບ.
ເຈົ້າໜ້າທີ່ດ້ານແຮງງານ ແຂວງຈຳປາສັກ ທ່ານນຶ່ງ ທີ່ຂໍສງວນຊື່ ແລະ ຕຳແໜ່ງ ໄດ້ກ່າວໃນວັນທີ 25 ເມສາ ວ່າ:
“ພາກສ່ວນທີ່ຢາກໄປ ອອກແຮງງານບໍ່ຖືກຕ້ອງ ເພິ່ນຈັ່ງວ່າ ໃຫ້ແນະນຳ ໃຫ້ແຈ້ງເຕືອນ ເມື່ອເກີດອຸບັດຕິເຫດບໍ່ ເມື່ອເກີດບໍ່ໄດ້ຮັບເງິນຄ່າແຮງຈ້າງ ຄ່າແຮງງານບໍ່ ຈັ່ງຊີ້ນ່າ. ຜົລກະທົບນີ້ນ່າ ຫຼືວ່າ ສວັດດີການ ເຂົ້າປິ່ນປົວເວລາເຈັບເປັນ ຕ່າງໆ ເຂົາເຈົ້າ ຈະບໍ່ໄດ້ຫັ້ນແຫຼະເນາະ.”
ຄົນລາວທີ່ໄປເຮັດວຽກ ຢູ່ຕ່າງປະເທດໄທຍ ຢ່າງຖືກຕ້ອງຕາມກົດໝາຍ ຈະໄດ້ຮັບການຄຸ້ມຄອງ ຕາມກົດໝາຍ ໃນກໍລະນີທີ່ຖືກນາຍຈ້າງເອົາປຽບ ຫຼື ເກີດບັນຫາຂຶ້ນ.
ເຈົ້າໜ້າທີ່ ດ້ານແຮງງານທ່ານນຶ່ງ ຢູ່ ແຂວງສວັນນະເຂດ ໄດ້ກ່າວວ່າ:
“ຣັຖບານກໍຢາກເນັ້ນ ຂໍໃຫ້ໄປດ້ວຍຖືກຕ້ອງ ໄປມີບັດແຮງງານ ໄປດ້ວຍຮັບການຄຸ້ມຄອງ ຈາກພາກຣັຖຫັ້ນນ່າ ບໍ່ຢາກໃຫ້ໄປຄື ຜີນ້ອຍຫັ້ນນ່າ ໄປໃຫ້ຕາມຖືກຕ້ອງນຶ່ງ ບໍຣິສັດທີ່ສົ່ງໄປ ເຂົາຈະຕິດຕາມວ່າ ຜູ້ກກ່ຽວເຮັດວຽກຢູ່ໃສ ຢູ່ໃສ ເກີດນັ້ນເກີດນີ້ ເຮົາກໍສາມາດເຂົ້າເຖິງໄດ້ງ່າຍ ເບື້ອງໄທຍກໍໄດ້ຮັບການຄຸ້ມຄອງ ເບື້ອງລາວ ກໍມີທູດລາວ.”
ຍັງມີຄົນລາວຈຳນວນນຶ່ງ ທີ່ໄປເຮັດວຽກຢູ່ໄທຍ ແບບບໍ່ມີເອກກະສານ ໃຊ້ໜັງສືເດີນທາງໄປແບບທ່ອງທ່ຽວ ໂດຍຜ່ານນາຍໜ້າ ແລະ ບາງຄົນກໍລັກໄປແບບບໍ່ມີໜັງສືເດີນທາງ.
ເຈົ້າໜ້າທີ່ດ້ານແຮງງານ ແຂວງສວັນນະເຂດ ໄດ້ກ່າວວ່າ:
“ເຣື່ອງມີເງິນເຂົາອາດຈະມີ ແຕ່ວ່າ ໃນຂັ້ນຕອນແລ່ນເອກກະສານ ມັນຢາກດົນເນາະ ນຶ່ງມັນເສັຽເວລາ ສອງມາ ກະຄ່າໃຊ້ຈ່າຍ ມັນກໍຢາກຈະສູງແດ່ ຫັ້ນນ່າ ບາງເທື່ອນາຍຈ້າງເມືອງໄທຍ ຕ້ອງເຮັດເອກກະສານ ຂໍໂຄຕ້າທຳເອກກະສານ ເຣື່ອງແຮງງານເບື້ອງພຸ້ນນ່າ.”ຄົນລາວບາງຄົນ ກໍໃຫ້ຢາກໃຫ້ຣັຖບານແກ້ໄຂ ບັນຫາການລັກລອບໄປເຮັດວຽກ ຢູ່ຕ່າງປະເທດແບບຜິດກົດໝາຍ ໃຫ້ຫຼຸດລົງ, ແຕ່ ໃນອີກດ້ານນຶ່ງ ເຫດຜົລທີ່ເຂົາເຈົ້າຕ້ອງລັກລອບ ໄປກໍຄື ຄ່າແຮງງານຢູ່ປະເທດລາວ ຕ່ຳ.
ຊາວລາວ ຢູ່ນະຄອນຫລວງວຽງຈັນ ໄດ້ກ່າວວ່າ:
“ຢູ່ບ້ານເຮົາວຽກເຮັດງານທຳ ກະບໍ່ມີ ສອງມາກະມີກໍຄ່າແຮງງານຕ່ຳ ຂັ້ນ ຫັ້ນນ່າ ໄປເຮັດ MOU 5-6 ເດືອນ ກະຍັງບໍ່ແລ້ວ ຕົກຢູ່ລາວໆ ເກືອບ 2 ໝື່ນບໍ່ດຽວນີ້ ສະນັ້ນ ຈຶ່ງເຮັດໃຫ້ຄົນຈໍາເປັນຕ້ອງເດີນທາງໄປຜິດແດ່ຫັ້ນແຫຼະ ສ່ວນຫຼາຍກໍເຮັດພາສປອດໄປຊື່ໆ ກໍລັກລອບທໍາງານເລີຍ ຂັ້ນເປັນໄປໄດ້ ກໍຢາກໃຫ້ຄ່າແຮງສູງແດ່ ມັນກໍຊິຫລຸດຜ່ອນ.”
ບາງຄົນ ກໍໄປເຮັດວຽກແບບບໍ່ຖືກກົດໝາຍ ຍ້ອນບໍ່ຢາກເສັຽເງິນ ສະນັ້ນ ເຂົາເຈົ້າກໍເລີຍເລືອກໄປແບບໃຊ້ວີຊ້າ ທ່ອງທ່ຽວ.
ຊາວລາວອີກທ່ານນຶ່ງ ໄດ້ກ່າວວ່າ:
“ທີ່ວ່າລັກໄປຫັ້ນ ບໍ່ຢາກສຽງເງິນ ຕ້ອງໄດ້ເສັຽຄ່ານັ້ນ ຄ່ານີ້ຫຼາຍ ແຕ່ສ່ວນຫຼາຍທຸກໆມື້ນີ້ ຄົນມັນໄປແບບວ່າ ໄປນາມທ່ອງທ່ຽວ ແລ້ວໄປເຮັດວຽກເຮັດຫຍັງຫັ້ນນ່າ ມັນຈະສ່ຽງ ກໍການຄ້າມະນຸດ ຫັ້ນນ່າ ໄປໃຫ້ມັນຖືກຕ້ອງ ບໍ່ແມ່ນລັກໄປ ຣັຖບານກໍຕິດຕາມໄດ້.”
ໂຕຢ່າງນຶ່ງ ທີ່ສະທ້ອນໃຫ້ເຫັນ ເຖິງການບັງຄັບໃຊ້ແຮງງານ ແລະ ເຂົ້າຂ່າຍການຄ້າມະນຸດ ໃນກຸ້ມຄົນງານລາວ ທີ່ໄປເຮັດວຽກ ແບບບໍ່ຖືກຕ້ອງ ກໍແມ່ນເຫດການນຶ່ງ ໃນວັນທີ 9 ມົກຣາ 2023 ທີ່ຜ່ານມາ.
ເຈົ້າໜ້າທີ່ທາງການໄທຍ ແລະ ເຈົ້າໜ້າທີ່ມູນລະນິທິ LPN ໄດ້ເຂົ້າໄປຊ່ວຍເຫຼືອ ແມ່ຍິງລາວ ທີ່ຖືກນາຍຈ້າງໄທຍ ທໍາຮ້າຍຮ່າງກາຍ ແລະ ບັງຄັບໃຫ້ໃຊ້ແຮງງານ ໃນຮ້ານອາຫານແຫ່ງນຶ່ງ ຢູ່ແຂວງນະຄອນນາຍົກ ປະເທດໄທຍ.
ຈາກການສອບສວນ ຂອງເຈົ້າໜ້າທີ່ໃນເບື້ອງຕົ້ນ ພົບວ່າ ແມ່ຍິງຄົນດັ່ງກ່າວເປັນຄົນເມືອງເລົ່າງາມ ແຂວງສາຣະວັນ ອາຍຸ 34 ປີ ໄດ້ໄປເຮັດວຽກ ຢູ່ປະເທດໄທຍ ແບບບໍ່ມີເອກກະສານ ຕາມລະບົບ MOU ມາໄດ້ 10 ປີແລ້ວ.
ໄລຍະ 5 ປີຫຼັງ ລາວໄດ້ເຂົ້າມາເຮັດວຽກ ກັບນາຍຈ້າງຄົນດັ່ງກ່າວ ແຕ່ ພັດຖືກບັງຄັບໃຫ້ເຮັດວຽກ ຕັ້ງແຕ່ 6-7 ໂມງເຊົ້າ ເຈົ້າຮອດ 8 ໂມງແລງ ໂດຍບໍ່ມີວັນຢຸດພັກ. ນາຍຈ້າງຄົນໄທຍ ຍັງໄດ້ທຳຮ້າຍຮ່າງກາຍ ແລະ ຍຶດເອກກະສານຕ່າງໆໄວ້.
ອີງຕາມຂໍ້ມູນ ຈາກທາງການລາວ ໃນໄລຍະໂຄວິດ-19 ຣະບາດ, ມີຄົນງານລາວ ກັບມາຈາກປະເທດໄທຍ ຫຼາຍແສນຄົນ.