ຊາວໄທລຸ່ມນໍ້າຂອງຂໍເຂົ້າຮ່ວມ ເວທີຫາຣື

ຊາວບ້ານ ໃນແຂວງ ພາກເຫນືອ ແລະ ພາກ ຕາເວັນອອກ ສ່ຽງ ເຫນືອ ຂອງໄທ ໄດ້ ສົ່ງຫນັງສື ເປີດຊອງ ຫາ ຣັຖບານ ເພື່ອຂໍ ເຂົ້າຮ່ວມ ເວທີ ການປືກສາ ຫາລື ລ່ວງຫນ້າ ໃນ ໂຄງການ ເຂື່ອນ ດອນສະໂຮງ ຂອງລາວ.

ຊາວບ້ານ ຈາກ 8 ແຂວງ ຜູ້ທີ່ອາສັຍ ຢູ່ຕາມ ແຄມ ແມ່ນ້ຳຂອງ ຮ່ວມກັບ ກຸ່ມ ອະນຸຮັກ ສິ່ງ ແວດລ້ອມ ຜູ້ທີ່ເຮັດ ຫນ້າທີ່ ປົກປ້ອງ ຊັພຍາກອນ ທັມມະຊາດ ແລະ ວັທນະທັມ ລ້ານນາ ໄດ້ ສົ່ງໜັງ ສື ເປີດຊອງ ໄປຫາ ເລຂາ ປະຈຳ ກະຊວງ ຊັພຍາກອນ ທັມຊາດ ແລະ ສິ່ງ ແວດລ້ອມ ຂອງໄທ ໃນ ມື້ວານນີ້ ເພື່ອສະແດງ ຄວາມ ເປັນຫວ່ງ ກ່ຽວກັບ ໂຄງການ ເຂື່ອນ ດອນ ສະໂຮງ.

ທ່ານ ນີວັດ ຣອຍແກ້ວ ຕົວແທນ ຂອງ ຊາວບ້ານ ເວົ້າວ່າ ພວກ ເພິ່ນ ບໍ່ໄດ້ຍິນ ຫຍັງຫມົດ ຈາກ ໂຄງການ ເຂື່ອນ ດອນສະໂຮງ ຫລັງຈາກ ທີ່ ທາງການ ລາວ ໄດ້ຕົກລົງ ຈະໃຫ້ມີ ການ ປຶກສາ ກ່ອນ ລ່ວງຫນ້າ ໃນໂຄງການ ດັ່ງກ່າວ ກັບ ປະເທດ ສະມາຊິກ. ທ່ານວ່າ ຊາວບ້ານ ຫລາຍຄົນ ມີຄວາມ ເປັນຫວ່ງ ຢ້ານວ່າ ພວກຂະເຈົ້າ ຈະບໍ່ຖືກ ໃຫ້ເຂົ້າຮ່ວມ ໃນເວທີ ຫາຣື ດັ່ງກ່າວ ນັ້ນ.

ໃນເດືອນ ມີຖຸນາ ຜ່ານມາ ທ່ານ ວີຣະພົນ ວິຣະວົງ ຮອງ ຣັຖມົນຕຣີ ກະຊວງ ພລັງງານ ແລະ ບໍ່ແຮ່ ໄດ້ກ່າວຕໍ່ ຄນະ ກັມມະການ ແມ່ນ້ຳຂອງ ໃນກອງ ປະຊຸມ ທີ່ບາງກອກ ກ່ຽວກັບ ໂຄງການ ເຂື່ອນ ດອນສະໂຮງ ວ່າ ຈະເລື່ອນ ເວລາ 6 ເດືອນ ເພື່ອປືກສາ ຫາລື ກັນ ລ່ວງຫນ້າ ກັບ ປະເທດລຸ່ມ ແມ່ນ້ຳຂອງ.