ກໍາພູຊາຂໍໃຫ້ສຶກສາເຣື້ອງ ເຂື່ອນ ຕື່ມອີກ

ກ່ອນໜ້າ ທີ່ ກັມມາທິການ ແມ່ນໍ້າຂອງ ຈະຈັດ ກອງປະຊຸມ ປຶກ ສາ ຫາລື ແລະ ຖາມ ຂໍ້ຂັດຂ້ອງ ຂອງ ປະຊາຊົນ ເຣື້ອງການ ສ້າງເຂື່ອນ ດອນສະໂຮງ ຊຶ່ງ ຈະມີຂຶ້ນ ໃນວັນທີ 12 ທັນວາ ທີ່ ເມືອງ ປາກເຊ ນັ້ນ ທ່ານ ກົງ ຈັນທີ ຊາວປະໂມງ ຢູ່ເຂດ ເມືອງ ທ່າລາ ບາຣິວັດ ແຂວງ ຊຽງແຕງ ກໍາພູຊາ ໃຫ້ ສັມພາດ ຕໍ່ນັກ ຂ່າວ ວິທຍຸ ວີໂອເອ ວ່າ ຣັຖບານ ລາວ ຄວນສຶກສາ ຜົນກະທົບ ຂ້າມແດນ ທີ່ ເປັນໄປໄດ້ ໃຫ້ຄັກແນ່ ເສັຽກ່ອນ ກ່ອນ ຈະລົງມື ສ້າງ. ທ່ານວ່າ ເຂື່ອນ ດອນສະໂຮງ ຈະຢູ່ແປະ ກັບ ຊາຍແດນ ຈຶ່ງຢາກໃຫ້ ຣັຖບານ ກໍາພູຊາ ຫາລື ກັບ ຣັຖບານ ລາວ ຕື່ມ.

ກອງ ປະຊຸມ ປຶກສາ ຫາລື ແລະ ຖາມ ຄວາມເຫັນ ຂອງ ປະຊາ ຊົນ ກ່ຽວກັບ ການ ສ້າງເຂື່ອນ ດອນສະໂຮງ ນີ້ ເປັນ ສ່ວນນຶ່ງ ຂອງ ຂັ້ນຕອນ ການປຶກສາ ຫາລື ລ່ວງໜ້າ ຣະດັບ ພູມີພາກ. ທ່ານ ເສກ ໂສພານ ຫົວໜ້າ ຊາວ ປະໂມງ ໃນເຂດ ເມືອງ ທ່າລາ ບາຣີວັດ ເວົ້າວ່າ ມີ ຊາວ ກໍາພູຊາ 200 ກວ່າ ຄອບຄົວ ຈະໄດ້ຮັບ ຜົນກະທົບ ຈາກ ເຂື່ອນ. ທ່ານ ຂໍຮ້ອງ ໃຫ້ ອົງການ ບໍ່ຂຶ້ນກັບ ຣັຖບານ ແລະ ຣັຖບານ ກໍາພູຊາ ບໍ່ໃຫ້ ສນັບສນູນ ການສ້າງ ເຂື່ອນ ດອນສະໂຮງ ນັ້ນ.

ກໍາພູຊາ ເຄີຍຈັດ ກອງປະຊຸມ ປຶກສາຫາລື ແລະ ຖາມ ຂໍ້ຂ້ອງໃຈ ກັບ ປະຊາຊົນ ເຣື້ອງການ ສ້າງເຂື່ອນ ດອນສະໂຮງ ໃນລາວ ຣະດັບ ທ້ອງຖິ່ນ ແລະ ຣະດັບ ຊາດ 3 ຄັ້ງແລ້ວ. ທ່ານ ດວງ ໂປວ ເຈົ້າແຂວງ ແຂວງ ຊຽງແຕງ ເວົ້າວ່າ ປະຊາຊົນ ກໍາພູຊາ ທີ່ອາໄສ ຢູ່ຕາມ ແຄມຂອງ ຕິດຊາຍແດນ ລາວ ບໍ່ຕ້ອງການ ໃຫ້ ເຂື່ອນນີ້ ເກີດຂຶ້ນ.