ຊາວເມືອງຕົ້ນເຜິ້ງເສັຽດິນໃຫ້ ສນາມກອຟ

ປະຊາຊົນເມືອງຕົ້ນເຜິ້ງ ແຂວງບໍ່ແກ້ວ ຖືກຍຶດທີ່ດິນ ເພື່ອເອົາໄປສ້າງ ສນາມກອຟ ໃຫ້ແກ່ ບໍຣິສັດ ຄາຊີໂນ ດອກງິ້ວຄຳ ໂດຍສະເພາະ ປະຊາຊົນ ບ້ານ ສາມຫລ່ຽມຄຳ ຖືກໂຍກຍ້າຍ ຫມົດທັງ ຫມູ່ບ້ານ ອອກຈາກ ບ້ານເດີມ ໄປຢູ່ບ້ານໃຫມ່ ຫ່າງຈາກ ບ່ອນເກົ່າ ປະມານ 5 ກິໂລແມັດ. ດັ່ງຊາວບ້ານ ທ່ານນຶ່ງ ກ່າວຕໍ່ ເອເຊັຽເສຣີ ວ່າ:

"ຕອນທີສອງນີ້ແມ່ນ ເຂົາຕັ້ງໃຈ ພູ້ນເຂົາຈະເອົາ ສນາມກອຟ ເບີ່ງກວດກາ ໄວ້ຫມົດແລ້ວ ບາງບ່ອນ ກໍຊົດເຊີຍແລ້ວ ບາງບ່ອນ ກໍຍັງຢູ່ ບໍ່ມີແຫລະ ບ່ອນທີ່ ທຳກິນ ນີ້ກໍເຫລືອແຕ່ ດິນນາ ທີ່ເຫລືອໄວ້ ນັ້ນແຫລະ ແລ້ວບາງເຈົ້າ ກໍດຽວນີ້ ເຂົາເອົາອີກ ເອົາແປງ ເຂົາຊິເອົາ ເຮັດບ່ອນ ນ້ຳປະປາ".

ທ່ານກ່າວຕື່ມວ່າ ປະຊາຊົນ ຜູ້ທີ່ຍ້າຍໄປ ຢູ່ບອ່ນໃຫມ່ນັ້ນ ບໍ່ມີດິນ ປູກຝັງ ທຳມາຫາກິນ ປະຊາຊົນ ຕ້ອງໄດ້ ເອົາເງິນໄປ ຊື້ດິນນາ ແລະສວນ ທີ່ໄກໄປອີກ ຫຼາຍ ກິໂລແມັດ. ນອກຈາກ ບ້ານສາມຫລ່ຽມຄຳ ແລ້ວ ທີ່ໄດ້ຮັບ ຄວາມເດືອດຮ້ອນ ກໍຍັງມີ ອີກ 3-4 ບ້ານ ທີ່ໄດ້ຮັບ ຜົລກະທົບ ຈາກ ໂຄງການ ສ້າງສນາມກອຟ ຂອງ ບໍຣິສັດ ດອກງິ້ວຄຳ ເປັນຕົ້ນ ບ້ານຕົ້ນເຜິ້ງ ບ້ານດອນມູນ ແລະ ບ້ານສີບຸນງາມ.

ທ່ານວ່າ ປັດຈຸບັນ ການສ້າງ ສນາມກອຟ ຍັງບໍ່ມີ ຄວາມຄືບຫນ້າເລີຍ ເຖີງແມ່ນວ່າ ຈະໃຫ້ ຄ່າຊົດເຊີຍ ປະຊາຊົນ ແລ້ວກໍຕາມ ທີ່ດິນ ຂອງປະຊາຊົນ ນັ້ນຍັງບໍ່ຖືກ ພັທນາ ແຕ່ຢ່າງໃດ ຄາດວ່າ ບໍຣິສັດ ອາດ ບໍ່ມີທຶນ ໃນການກໍ່ສ້າງ.

ໂຄງການສນາມກອຟ ເມືອງຕົ້ນເຜິ້ງ ໃນເບື້ອງຕົ້ນ ມີແຜນການ ກໍ່ສ້າງ ທີ່ບ້ານ ສີບຸນເຮືອງ ແຕ່ ປະຊາຊົນ ຄັດຄ້ານ ບໍ່ຍອມໃຫ້ ທີ່ດິນ ທາງໂຄງການ ຈຶ່ງຍ້າຍໄປສ້າງ ຢູ່ບ້ານ ສາມຫລ່ຽມຄຳ ແທນ. ກ່ຽວກັບ ບັນຫາ ດັ່ງກ່າວ ວິທຍຸເອເຊັຽເສຣີ ກໍໄດ້ ສອບຖາມ ໄປຍັງ ເຈົ້າຫນ້າທີ່ ເມືອງຕົ້ນເຜິ້ງ ແຕ່ບໍ່ໄດ້ຮັບ ຄຳຕອບ ໃນເຣື້ອງນີ້.