ອອສເຕຣເລັຽຊ່ອຍການສຶກສາ ໃນລາວ

ຍານາງ JULIE BISHOP ຣັຖມົນຕຣີ ການຕ່າງ ປະເທດ ອອສເຕຣເລັຽ ໄດ້ ແຈ້ງການ ຊ່ອຍເຫລືອ ໃນຂະນະ ທີ່ ນາງ ຢ້ຽມຢາມ ສປປລາວ ອາທິດ ຜ່ານມາ ວ່າ ອອສເຕຣເລັຽຈະໃຫ້ເງິນ ຊ່ອຍເຫລືອ ທາງດ້ານ ການສຶກສາ ແກ່ ສປປລາວ ປະມານ 86 ລ້ານ ໂດລາ ໃນຣະຍະ 4 ປີ ຂ້າງຫນ້າ ເພື່ອຊ່ອຍ ເດັກນ້ອຍ ນັກຮຽນ ລາວ ຈຳນວນ 4 ແສນ 5 ຫມື່ນຄົນ ໃຫ້ສາມາດ ອ່ານອອກ ຂຽນໄດ້ ພ້ອມທັງ ປັບປຸງ ຄວາມຮູ້ ດ້ານ ຄະນິສາຕ ແລະ ວິທຍາສາຕ ວັດຖຸເຄມີ.

ທາງການ ອອສເຕຣເລັຽ ຫວັງວ່າ ເງິນ ຈຳນວນ ດັ່ງກ່າວ ຈະສົ່ງ ຜົລປໂຍດ ໃຫ້ແກ່ ເດັກນ້ອຍ ນັກຮຽນ ລາວ ໃນເຂດ ຊົນນະບົດ ຫລາຍຂື້ນ ໂດຍສະເພາະ ເດັກນ້ອຍ ຊົນ ເຜົ່າ ສໍາລັບ ຜູ້ຍິງ ແລະ ນັກຮຽນ ຜູ້ທີ່ດ້ອຍ ໂອກາດ ແລະ ເສັຽອົງຄະ ໃນລາວ ໃຫ້ໄດ້ຮັບ ການສຶກສາ ທີ່ມີ ຄນຸນະພາບ ຊື່ງ ໃນ ປັດຈຸບັນ ໃນລາວ ມີເດັກນ້ອຍ ຜູ້ຍິງ ສາມາດ ຈົບ ການສຶກສາ ຂັ້ນຕົ້ນໄດ້ ພຽງແຕ່ ນື່ງສ່ວນສີ່ ຂອງຈຳນວນ ເດັກນ້ອຍ ນັກຮຽນຍິງ ທັງຫມົດ ໃນທົ່ວ ປະເທດ.

ໃນການ ຢ້ຽມຢາມ ສປປລາວ ເປັນເວລາ ສອງວັນ ຣັຖມົນຕຣີ ຕ່າງປະເທດ ອອສເຕຣເລັຽ ຍັງໄດ້ເພີ້ມ ຄວາມຮ່ວມມື ກັບ ສປປລາວ ທັງ ຣະດັບ ພາກພື້ນ ແລະ ສາກົນ ຮ່ວມທັງ ການແລກປ່ຽນ ເຈົ້າຫນ້າທີ່ ຣະດັບສູງ ຣະຫວ່າງ ປະເທດ ນຳອີກ. ອອສເຕຣເລັຽ ເປັນນຶ່ງ ໃນບັນດາ ປະເທດ ທີ່ໃຫ້ການ ຊ່ອຍເຫລືອ ແກ່ ສປປລາວ.