တစ်နာရီအတွင်း ရေအလုအယက်ခပ်နေရတဲ့ ရသေ့တောင်မြို့
ရသေ့တောင်မြို့မှာ မိုခါမုန်တိုင်းအလွန်မှာတော့ ရေရှားပါးမှုကို ပိုပြီး ဆိုးဆိုးရွားရွားကြုံတွေ့နေကြရတယ်လို့ ဒေသခံတွေနဲ့ ကူညီရေးဆောင်ရွက်နေသူတွေက RFA ကို ပြောပါတယ်။
- 2023-05-26
-
-
-
မိုခါမုန်တိုင်းမတိုက်ခင် မတ်လလောက်ကတည်းက ရေရှားပါးမှုကို ကြုံတွေ့နေရတဲ့ ရခိုင်ပြည်နယ်၊ ရသေ့တောင်မြို့မှာ မိုခါမုန်တိုင်းအလွန်မှာတော့ ရေရှားပါးမှုကို ပိုပြီး ဆိုးဆိုးရွားရွားကြုံတွေ့နေကြရတယ်လို့ ဒေသခံတွေနဲ့ ကူညီရေးဆောင်ရွက်နေသူတွေက RFA ကို ပြောပါတယ်။
ချောင်းဝ၊ အရှေ့တောင်၊ အရှေ့မြောက်၊ တောင်ရင်းတန်း စတဲ့ ရသေ့တောင်မြို့ပေါ် ရပ်ကွက်လေးရပ်ကွက်မှာ အိမ်ခြေပေါင်း ခုနစ်ထောင် နီးပါးရှိပြီး လူဦးရေ သုံးသောင်းခွဲကျော်ရှိပါတယ်။
ဒါ့အပြင် ရသေ့တောင်မြို့ပေါ်မှာ စစ်ဘေးဒုက္ခသည်စခန်း ၂၈ စခန်း၊ ဒုက္ခသည် နှစ်သောင်းကျော်ရှိနေပါတယ်။
ဒီလူဦးရေ ငါးသောင်းခွဲကျော်ဟာ သုံးရေအတွက် ရေငန်ဝင်ရောက်ထားတဲ့ ကန်တချို့နဲ့ မြောင်းတချို့က ရေငန်တွေကို ခပ်သုံးနေကြပေမယ့် သောက်ရေအတွက်ကတော့ ရေချိုကျန်ရှိနေသေးတဲ့ ပြည်တော်သာရေကန်ကိုသာ အားကိုးနေကြရတာပါ။
ပြီးခဲ့တဲ့ ရက်ပိုင်းက လေပြင်းတိုက် မိုးရွာခဲ့လို့ ရေခန်းခြောက်နေတဲ့ ကန်တချို့မှာ မိုးရေအနည်းငယ် ရခဲ့တာကြောင့် ဒီနေရာမှာလည်း သောက်ရေအတွက် ခပ်နေကြတာရှိပါတယ်။
ဒါပေမဲ့ ရေအနည်းငယ်သာ ရှိတဲ့အတွက် ဗွက်ရေ နီးပါးဖြစ်နေတဲ့ အခြေအနေလို့ ဒေသခံတွေက ပြောပါတယ်။