ဒလမြို့က ဆန်တန်းစီဝယ်ယူကြသူများ

• RFA Burmese
  2023-09-22

ရန်ကုန်တောင်ပိုင်းခရိုင် ဒလမြို့နယ် ဒလ-တွံ့တေးလမ်းပေါ်မှာ ဆန်တစ်ပြည်ကို ၂၅၀၀ ကျပ်နှုန်းနဲ့ ရောင်းပေးနေလို့ ပြင်ပပေါက်စျေးထက် ချိုသာတဲ့အတွက် မြို့ခံတွေ တန်းစီဝယ်ယူနေကြတာကို စက်တင်ဘာလ ၂၂ ရက် ဒီနေ့မှာ မြင်တွေ့ရတာ ဖြစ်ပါတယ်။

လူတစ်ယောက်ကို ဆန်တစ်ပြည်နှုန်းနဲ့သာ ရောင်းပေးနေပြီး ဧည့်မထဆန် ၂၅ အိတ် ကုန်သည်အထိပဲ ဒီနေ့ရောင်းပေးမယ်လို့ ဆန်ရောင်းချနေသူတွေကပြောပါတယ်။

သက်သာတဲ့စျေးနှုန်းနဲ့ လူတစ်ယောက်ကို ဆန်တစ်ပြည်နှုန်းပဲ ရောင်းချပေးတဲ့အတွက် ကျောင်းပိတ်ရက်ဆို အိမ်ရှိကလေးတွေကိုပါ ဆန်ဝယ်ဖို့ တန်းစီခိုင်းတယ်လို့ ကျန်စစ်သားရပ်ကွက်မှာ နေထိုင်တဲ့ ကလေး ဆယ်ယောက်မိခင်က ပြောပါတယ်။

ပြင်ပဆန်ဆိုင်တွေမှာတော့ ဆန်ကြမ်းတစ်ပြည်ကို ကျပ် ၃၅၀၀ ကနေ ကျပ် ၄၀၀၀ နီးပါးထိ စျေးပေါက်နေတာပါ။

မြန်မာနိုင်ငံ ဆန်စပါး အသင်းချုပ်ရဲ့ ဆန်တစ်ပြည်ကို ၂၅၀၀ ကျပ်နှုန်းနဲ့ ရောင်းချစေခဲ့တဲ့ ဒီအစီအစဉ်မှာ ဆန်အရောင်းဆိုင်တွေ အနေနဲ့လည်း ဆန်အိတ်အရေအတွက် ၂၀၀ ထိ ရောင်းကုန်သွားတာနဲ့ ကျပ်ငွေ တစ်သိန်းခွဲကျော် အရှုံးပေါ်နေတယ်လို့ ဆန်ရောင်းချသူတွေက ပြောဆိုကြပါတယ်။