နိုင်လွတ်လုံဥပဒေပြင်ဆင်ရေး အရပ်ဘက်အဖွဲ့တွေ ပါဝင်ခွင့်

• နန္ဒာချမ်း
  2020-02-18

"နိုင်လွတ်လုံ"လို့ အများသိကြတဲ့ "နိုင်ငံသားများ၏ ပုဂ္ဂိုလ်ဆိုင်ရာလွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကို ကာကွယ်ပေးရေး ဥပဒေ" မှာ အားနည်းချက်တွေ ရှိနေတာကြောင့် လွှတ်တော်မှာ ပြင်ဆင်ဖို့ ကြိုးပမ်းနေပါတယ်။

နိုင်ငံသားတွေကို အကာအကွယ်ပေးဖို့ ရည်ရွယ်ချက်နဲ့ ပြဌာန်းထားတဲ့ ဒီဥပဒေကို ပြင်မယ်ဆိုရင် အရပ်ဘက်အဖွဲ့တွေ ပါဝင်သင့်တယ်လို့လည်း လူ့အခွင့်အရေးအဖွဲ့တွေက ထောက်ပြနေကြပါတယ်။

ဒီဥပဒေကို ပြင်သင့်တယ်ဆိုပြီး လွှတ်တော်ကိုယ်စားလှယ်တွေ ကိုယ်တိုင်က လက်ခံလာတာပါ။ အဓိကကတော့ “နိုင်ငံသားတွေကို အကာအကွယ်ပေးဖို့” ဆိုတဲ့ မူလရည်ရွယ်ချက် ပျောက်လာပြီး၊ အမြင်မတူသူတွေကြားမှာ အလွယ်တကူ တရားစွဲလို့ရတဲ့ ဥပဒေတစ်ခု ဖြစ်လာလို့ပါပဲ။

ဒါပေမဲ့ နိုင်လွတ်လုံဥပဒေကို ပြင်ဖို့ ကြိုးစားတာထက် အသစ်ရေးဆွဲဖို့ တိုက်တွန်းသူတွေလည်း ရှိနေပါတယ်။ NLD အမျိုးသားလွှတ်တော် ကိုယ်စားလှယ် တစ်ဦးလည်းဖြစ်၊ ဥပဒေပညာရှင်လည်း ဖြစ်တဲ့ ဦးအောင်သိန်းကတော့...

"ပြင်ဆင်တာက ပိုကောင်းမယ် ထင်တယ်။ အစိုးရ အဖွဲ့အစည်းတွေက သူတို့ဂုဏ်သိက္ခာ ထိတယ်ဆိုရင် သူတို့က စွဲလို့ရတယ်။ ပြည်သူတွေထဲမှာလည်း အစိုးရကြောင့် ဂုဏ်သိက္ခာ ထိခိုက်တယ်လို့ ယူဆလို့ရတဲ့ ကိစ္စရပ်တွေ ရှိတယ်။ ပြည်သူအချင်းချင်းပေါ်မှာ ပြုမူဆောင်ရွက်တဲ့ ကိစ္စတွေကလည်း Facebook တွေ ဘာတွေမှာ ရေးကြတင်ကြတဲ့ ကိစ္စတွေ ရှိတယ်။ အဲဒါမျိုးက ဖျက်သင့်တယ်၊ မဖျက်သင့်ဘူး ဆိုတာထက် ပြင်ဆင်ပြီးတော့ အများပြည်သူ အကျိုးအတွက်ဆိုတဲ့ အယူအဆနဲ့ ပြင်ရင်တော့ ကောင်းမယ်လို့ ကျနော် မျှော်လင့်ပါတယ်"

ညီမျှခြင်းမြန်မာအဖွဲ့ရဲ့ ဒါရိုက်တာ ဦးအောင်မျိုးမင်းကလည်း... ဒီဥပဒေကို ပြင်ဆင်ဖို့နဲ့ ပြင်ဆင်တဲ့ နေရာမှာ လူထုအသံတွေကို ကိုယ်စားပြုမယ့် အရပ်ဖက်အဖွဲ့အစည်းတွေ ပါဝင်သင့်တယ်လို့ ပြောပါ တယ်။

ဒါပေမဲ့လည်း နိုင်လွတ်လုံဥပဒေကို ပြင်ဖို့ထက် ဖျက်သိမ်းဖို့ကို လိုလားပြီး၊ အထူးသဖြင့် ဒီဥပဒေထဲက အသရေဖျက်မှုဆိုင်ရာ ပုဒ်မ ၈ (စ) ကို လုံး၀ဖျက်သိမ်းဖို့ တိုက်တွန်းခဲ့တာကတော့ အသံအဖွဲ့ရဲ့ အမှုဆောင်ဒါရိုက်တာ မောင်ဆောင်းခပါ။

နိုင်လွတ်လုံဥပဒေကို ၂၀၁၇ မတ်လ ၈ ရက်နေ့မှာ ပြည်ထောင်စုလွှတ်တော်က အတည်ပြုပြဌာန်းခဲ့တာပါ။ ပြဌာန်းပြီးချိန်ကစလို့ ဖေဖော်ဝါရီလ ၁၇ ရက်နေ့အထိ တရားစွဲဆိုတဲ့အမှုပေါင်း ၄၆ မှုရှိခဲ့ပြီး၊ တရားစွဲဆိုခံရသူပေါင်းက ၁၁၃ ဦးရှိတယ်လို့လည်း အသံအဖွဲ့က ဖေဖော်ဝါရီလ ၁၈ ရက်နေ့က ကြေညာချက် ထုတ်ပြန်ထားပါတယ်။

ဒီအထဲမှာ အစိုးရနဲ့ လွှတ်တော်ကိုယ်စားလှယ်တွေကို ဝေဖန်လို့ တရားစွဲဆိုခံရတာက ၁၅ မှု၊ တပ်မတော်က တရားစွဲတာ ငါးမှုနဲ့ နိုင်ငံရေးပါတီတွေက တရားစွဲတာ ကိုးမှု ရှိတယ်လို့လည်း အသံအဖွဲ့ရဲ့ ကြေညာချက်မှာ ထောက်ပြထားပါတယ်။